Read Ninia Yali AMSAL 23 Bible Online

AMSAL 23 - Ninia Yali bible

AMSAL 23

¹Hat ap lohon nim hweria atlug siburu nauk kwit halug; an ap sa nim[7] siburu nauk kahi no ulug ebet hauk nu.

²Ekere hat ap humon nim siburu na ale hapuk halug nale hapuk on ai sebe hauk nu.

³Hat yomaroho osoko foruk angge unduk buhundeg en namin ulug eneg sibogle atuk kam fug.

⁴Dung ale ulug henda fituk kam fug. Ai wenggelduk kahen ale aire sebeloho embeseiyug.

⁵Misig am oweal lepengdoho hangge ai eleg aruhu ne ahwerabul wereg aruhureg suwe ikwesahop hag bohol hweyanggunggu fam etlema lahu.

⁶Ap enda kibu on nim nauk kam fug ne at angge unduk kin-kain angge etma fahet an nele ahi ulug hambono duk fug.

⁷Fobik aren uruk kwit “Nama; uhureg eke nim dopnoroho nakin abi” uhu etare kin-kaindoho fahet de uhu fug ambilikmu buhun-bahan ale uhu famen de endama amureg lit uhu.

⁸Fobik haren bil hahun angge anyo sombandoho luko wilibi feik waruhun deg haren hele buhun-bahan ale at obam uhun ale etma re alemaroho uhun hayog.

⁹Ap morue on ai haren komoruk fug aren wene komo eta demdoho eheik ulug furobahat-dahu fug.

¹⁰Kwenang huli baleg kwe enaknisi enebinggi angge hwelausa kwe omano hihilik laheg, omalik wetien on enanggwenang omano hweleheg duk fug.

¹¹TUHAN omane humon en ili og enepukmu Aren neg it inibil atlug hat halong elehapdoho hobahaku anggere.

¹²Haknisi guru en hweag-hutuk ale etma ebetuk kwit furoho wauk nu. Ne, furoho holuk amag ulug de hum-hamdoho mamul-dauk kamuk.

¹³Homaliki henda anggin fam komo enepuk kam fug. Ne, haren lalfisog waruhun halug de at ebe wararuhu fug,

¹⁴ite enebe enahap wendat amuhup.

¹⁵Namloho hat enggat on aruhun halug de an de nahayeg humon habuhuk.

¹⁶An hol-haukmu hat wene enggat-benggatdoho urukmu halug de an mun nawonok atuk karuhuk.

¹⁷Ap siag duruk on fahet henolok enebuk fug. Allah fam neg dip deberuk kamek.

¹⁸Henebe fobik welamuhup li etma fanoroho welaheg, henendama ebereg ai elegam fug angge welaheg duhu.

¹⁹Namloho holiyug! Enggat on atlug welamuk. Ne, hat hebe welahen ale etma fureberuk kamuk.

²⁰Ap siomo duruk on nim mangmangno duk fug it ap huguruwe on nim mangmangno duk fug.

²¹It aire fobik enenggik eleg amuhup anggere. Hat nohoruk kwit neg wereg laruhun halug de hasum de bubun-bubun lauk karuhu.

²²Hakni ele furoho holduk kamin at welalep fug men de hat welalen fug. Hisinga ebenaheg sobal atsi angge aire at fahet along deg boruk kahen ale unug utuk kamin.

²³Enda enggat on demdoho on melal-enepuk ale eneluk atuk ale abirangge hweag-hutswa ale anyo onggo hunduruk famen onggo walere along deg.

²⁴Ap akni eke awonog aruhu ai amloho enggat on oluk humon atuk halug amloho hebeleg on aruhu halug de at enda leho fahat dahureg asowi aruhu.

²⁵Hakni hisinga hat fahet enawonog amuhup ai hisinga hat endag-hapsi on ai fanoap debehup.

²⁶Namloho furoho ebetuk kamin an nabut anyo wal-hauk kamin.

²⁷Hwe abut siag on hambena duruk ai sabu yep enepukmu namelmel deg.

²⁸It ai en de del-dauk on anyo hag wereg lit ap abirangge omano babiap debeseruk.

²⁹Ap anggur ahaik homoroho nauk on nim ahalue asig omamne on nim nanggeleg-hanggelegdoho naukmu atuk alere hat holuk deg no? Ap aire anggin anggolo hauk kwit wereg. Airoho hauk kwit ap aireg on aire hundig suahal neg uruk kwit ngururuk kwit wereg. Il de mep sahaloho ebene yebilangge muluna sulukdoho atuk ale aire oluk deg lit en durukmu atuk.

³¹Anggere anggur ahaik fam hat siahap habukwag ulug embesouk fug ebere orohole enenda oho alereg ma ikwag gelas elma etma il mereng-mereng angge durukmu nauk men enanggolobag elma kuruk.

³²Airoho duruk men de sono hubet de hat kisu olok on en senggel hapukmu hag deg ma hahun.

³³Hil de omamne elegdoho elek-elek angge durukmu haren wenggelduk ale sel kwel eheg hambilikmu hesangge wene matuk karuhun.

³⁴Hat hebe boruk kwit de an kapal ambiangma ik laut emberimmu etma welahi boruk karuhun; Hunggul mundoho siomo duhumu douk-douk angge duruk karuhun.

³⁵Airoho durukmu haren diroho uhun, “An ap en nowareheg domag neheg dehesa famen an nebe fam aha ale an furoho hwale fesehi fug mu keroho aha e. Yehei an noho nil napuk! An eke nim ik siomo duruk on namin!” Uruk karuhun lit deg.