Read Ninia Yali AMSAL 24 Bible Online

AMSAL 24 - Ninia Yali bible

AMSAL 24

¹Ap siag duruk on fahet holok enebuk fug, it aireg on etma nim mangmangno duruk fug.

²It de enolok en duhuk ale ulug neg wenggelduk kwit siahap duruk ale fahet neg enele matuk.

³Ap homi enahain elekwe enobam fano welamag ulug de enenda wenggeleg on en enenda enggat fam wutuk.

⁴It enelukdeg aleroho ambe huli-huli bale folug etma sumenggan enengge anyo hundomog mun fano angge along angge welaruhu mu ulug wituk.

⁵Ap enomamne wereg on de ha hag famen ap enda wereg on etma along humdeg; enomamne ai ha famen eneluk deg ale ai neg de along deg.

⁶Aire owan weim yabik lauk eleg kweleg wene dam furoho melale fohup ai fano, ne ap komo enepuk on humdoho wereg halug de ambiangma it along amuhup lit deg.

⁷Ap morue on en enenda hapuk on atuk fug mu ap wene along on fahet enele matuk kweleg aren eke diroho suroho uruk fug.

⁸Ap siag ale duhuk ulug neg melaloho foruk on ai unuk de seiale on.

⁹It ap morue on en hundig duruk alere siag neg. Ap amu on siahap debeseruk kwit ap misig eke enahayeg deg on wereg fug.

¹⁰Hat hobam anggin wereg li hat henda fituk kahen halug de hat ap maben on welahen.

¹¹Ap unggum waramag ulug og-utswa on ai loloho wilibikoho lit henda biren-baren uruk kam fug. Ap suknoho belabe feserukmu etma iringgoho feseswa on etma enahap wendat enebiyug.

¹²Hat hele diroho uhun ane, “Wene ai an den dukwag ulug wereg fug.” Uhun lit deg famen de Allah en hat il kumu husug laruhu. Aren neg hat hendama wenggelduk kahen ale oluk deg ma siagdoho uruk kahen ulug hweag-hutuk karuhu. Aren neg ap homi en duruk ale higitdoho onggo enobam debeseruk.

¹³Namloho kin ahalue etma re fanoreg ma anggere, kin ahalue a famen walug naukmu unduk mit deg anyo hag nauk kamin.

¹⁴Ai hagdoho re enggat atuk on etma hebe holuk wereg ale hwelauk kamin. Ne, hat henda wenggeleg neg deg laruhun halug de hebe fobik welaruhun li etma seleg neg deg ma hauk karuhun.

¹⁵Ap onolok on en ap bekitdoho wereg on angge delug obam oho faloho hwelahuk uruk on ai hinim mangmangno duk fug.

¹⁶Ap enggat on de hundig dalo dulug en de sombandoho inaruhu famen ap olok ale duruk on de daloruhup deg fobik inamuhup fug it duruk onggo eleg amuhup.

¹⁷Haselei on siahap enepuk on fahet hahayeg hauk kam fug at bule wamburuk halug lahe hahayeg duk fug.

¹⁸Demdoho hat duruk kahen ale aire TUHAN il heaukmu siag deg ma hauk. Haselei on etma unggum eke og-esahu fug.

¹⁹Ap olok ale duruk on fahet holok en hahummu het obam fouk fug.

²⁰Ap olok ale duruk on etma enonggombi fobik eke welamuhup fug mu enenda ebereg eke wereg fug.

²¹Namloho TUHAN fahet hakol boruk kwit raja halug leho foruk kamin. Ap iren enerim enepuk enap omano mug eneplug lauk kam fug.

²²Ap aireg on etma re oweal lepengdoho elehap debesehu. Aire wene Allah en ane raja en a duhup ale etma re dot deg fug.

²³Ap enenda mun wenggeleg neg deg enap en diroho uswa: Ap wene katukdoho kong-duruk ahun en de foma neg fano ap debeseruk karuhu ai ousa.

²⁴Ap siag disi on famen disi fug ulug enameg wereg kweleg duruk halug bilingguruk ahun ai hururung obam folug ap homi en sebeloho embeseruk kamuhup.

²⁵Famen bilingguruk ahun en ap siag disi on unggum og-utuk halug de enahayeg en wel-duruk kamuhup.

²⁶Wene onggo folo-folo uruk on aire enori nim hundig wereg ale ai eneg alereg.

²⁷Heyabuk dam wirig eleg angge en hobam dam wuruk fug, wereg lit nauk karuhuk on ulug hwaleg eleg angge o dam wuruk fug.

²⁸Indip elegma uk fug alereg kweleg famen ap inil hanim seiale uk fug; at ai fahet seiale laloho oho uk fug.

²⁹Hiren uruk kwit, “Aren an nobam debesi hag an den oho at obam onggo debemin,” ulug uk fug.

³⁰Eke salim an de ap ko morue siag on eyabuk anggur yaho kwe lauihik.

³¹Lauk kwit kumu hauk men de yabukmu etma enggela alok on mel osuk angge mel neg laharukmu elehet oho meiyal heheg wambisimu hauihik.

³²An den airoho deg ale anyo fahet fureberihik deg nenda meneni wenggelduk kwit wene su on noluk atsi:

³³ Noho il durukmu nohoruk kwit enggik unggul en leho folug wereg lit kel wat-dauk kwit wereg ma,

³⁴angge elegdoho wereg ale nim kungguroho wereg ale nim de ap heraharuk on en sehen haroho kwik waharuk hag obam aik waharuk ulug noluk atsi.