Read Ninia Yali AMSAL 25 Bible Online

AMSAL 25 - Ninia Yali bible

AMSAL 25

¹Ombolim sure komo ale foma Raja Salomo en komo enepuk katfag on de, Hizkia raja Yehuda wereg li, it o raja obam etma yabuk duruk on welatfag on etman lisu fam bale febag.

²Allah unuk eneg wereg ai Aren di ale su ale endaman heraho foroho wereg ai fam; ne raja along bolug leho foruk aire aren di ale su ale selegdoho hweag-esauk ai fam.

³Ik laut ilonggoma erahamu mun yit-yatdeg hag, ne bohol yatma etlema deg hag, at raja en wenggelduk ale ohore, ap en di huli wereg ulug uk fug alereg.

⁴Atam perak ai singdoho siag deg on horuhupdeg mun fano keron ap enggik buhun on en buhundeg on hwaloho hilinggi fohumu ebe aruhu.

⁵Raja obam etma ap onolok on en komo enepuk on wereg etma wilibi fesehup; airoho duhupmu neg de ap raja wereg lit melal-enepukmu etma dipdoho neg duruk fam omamne aruhu.

⁶ Hun raja akit kwik lauk kwit halug de henenda sebele fahat dalug kwik lahup; hiren ap yabuk leho on wereg on omano en duruk hag leho fahat dil kuk fug.

⁷Hit hweag-hesauk kwit hat hobalma ap eyabuk leho on eke welamag ulug uk ale aire siag hag famen de, heyabuk emberimmu leho on fam eke lahain ulug lahabe feseruk ai neg de mun along deg.

⁸Hiren wene elaluwe sifan walug dipdoho bilinggurukmu la fug; airoho duruk men de hat hele seiale deg ma hweag-haplug de nanggini hobahauk alereg?

⁹Hare nim siag ale atsi halug de henemu en at hinim elehap debehup fano famen ap amu on en enawene heraho on de haren fag-duk fug.

¹⁰Fobik hat hunuk ambilik yendeg on ulug sowal habuhup deg, hebe holuk weregli hunuk siahap deg lit neg welaruhu.

¹¹Boruk ale folo-folo eta li em uruk on aire emas anggen perak on olog angge humon fam wereg ma hag.

¹²Ap enenda wereg on en komo ale ai ap hole foruk on hweag-umuhup on aire; emas enenggik seheletma kwelabeg on mel ne enelili angge emas on hag deg.

¹³Ap wene walug lowag ulug mondotuk on fano higitdoho dik lauk halug de, mondotsi ahun anyo ahayeg hauk; ik fano on en yabuk yahoma sako durukmu fano anggen dahanduk ai hag deg.

¹⁴Sali wat-esauk on dipdoho duruk eleg on aire; hena nim hol nim en osit belabik waharuk fug hag deg.

¹⁵Ap enebut fetagdoho duruk eleg on aire enele sako fam uruk kwit duruk; airoho duruk fam de ap enalong wereg on oho demdoho boukwag ulug hweag-esa alereg, ne ap minggit-manggat deg wereg on oho elehapdoho fouk alereg.

¹⁶Hat fobik me hape habuhu anggere; kin ahalue neg humdoho ulug oho na fug.

¹⁷Hori haluluk kwe wereg enakit obam olma hundig neg waharukmu; at obamlele duhureg erim hapuk haruhu anggere akit hundig obam olma waharuk kam fug.

¹⁸Ebe demdoho fug kweleg enobam hekip esauk ware feseruk on etma re; fit mel, bosiemanggen delduk angge mel dog en olok fam watuk hag ware fohup.

¹⁹Enobam anggindoho wereg li ap henebug balduk on en uruk ale fahet demdoho bolug duruk on de; enaeg lang duruk kweleg sahal-sahal nauk on mel ne eneyog holuroho lauk on mel hag deg.

²⁰Ap en suni hunu suni uruk on de hol en kwel duru kwit uruk hag nim ai en yebil fam ahalue asig on belabe forukmu elek-elek angge duruk kwit uruk hag.

²¹ Hinim minggirig on obok duruk halug siburu nowag ulug og-umuk; ne, ahaik obok duruk halug ik nowagdoho hwenang umuk.

²²Haren airoho duhun halug de, at enggaliapdoho fohun mu, TUHAN en hat fanoap hapuk karuhu.

²³Hol utara emberim fil en firik waharuk on ai fam osit walug waharuk; ai hagdoho ap en it eke deg ale fahet enabug dindilduk on aire ambiangma yeik suahal uruk.

²⁴Olma ohwesi suahal ele neg uruk on nim misigmu seberoho wereg ai siag; famen ambolman o unggutmu etlema hamu wereg laruhun aire mun fano.

²⁵Wene fano on o yatman waharukmu holduk aire ik ahe enepukmu ik habup on nauk anyo hag wereg.

²⁶Ap fano duruk on en ap siag duruk on sebeloho feseruk ai ik eleruk eke bogwe ele mun singon famen wilipuk on mel ik ebe siag on wirig atuk on anyo hag deg.

²⁷Kin ahalue alongdoho nauk ale aire siag deg anyo hag; ap en humdoho wel-enebuhup[8] ai siag.

²⁸Ap onggwareg en hwal-dauk eleg on aire o kota hulug daloroho wambisi on hag.