Read Ninia Yali AMSAL 26 Bible Online

AMSAL 26 - Ninia Yali bible

AMSAL 26

¹Osit o hobireg li waharuk hag, ne, lumbiag o ahanhan deg li wamburuk hag, ap morue on fahet mot enepuk ale aire kwasik deg.

²Suwe uluwe daroho laheg-waheg lauk anyo hag ket-ketsuwe darulug wilibil lauk kwit kolokwe lam-duruk hag ap siag duruk eleg kweleg hururung enepuk on aire enobam am fug ale deg.

³No keledai ai ambilik mu bosie omanggen ililig angge anyo lit hil lauk, ne no kuda re fetneangge watil lauk ai hag ap morue on ai yeik waruhup ai fano.

⁴Ap mun sohou on hein og enepukmu onggo hweag-utuk on de, ap ai sohoureg hag inim higitdoho morue wereg.

⁵Hein og-esauk ale morue roho uruk halug, onggo oho morue roho uhup; ai fam de ap hein wahu on anyo en boruk kwit de an noluk deg lahi behi famen de airoho deg lahi fug ulug furobahat dahu.

⁶Wene walug lowag ulug ap morue on fam lakin ulug mondotuk on aire; onggwareg en eyog somboroho yoma dale duruk hag.

⁷Ap eneyog bosigsig on eneyog aldoro fahat-dauk hag; ap morue on komo ale uruk on de ai hag uruk.

⁸Ap wenggelduk ale morue on mot enepuk aire; helep anggen eneiyog sehelet fam hopo uruk hag.

⁹Ap morue on komo ale uruk on etma re ap siomo duruk on enenggikmu alog kurukmu fuhulduk hag.

¹⁰Ap eke en ap morue on mel ap hesangge on mel yabuk dukwag ulug hweag-esauk on aire, ap abirangge alemaroho fesehu.

¹¹ Mene en me wiri folug sombandoho nauk hag, airoho ap morue on en morue-morue ale etano neg up sahalduk kwit wereg.

¹²Ap morue on etma misig am eke fano aruhu famen, ap onggwareg en an enggat on deg lahi boruk on etma re fug.

¹³Ap ko on olma neg wereg ale ambono deg lit airoho uruk, “singa dagma suma wereg anggere an kwema lauk men senggel nabikohoreg” uruk.

¹⁴Sok ambi at wereg ma en neg hut ha lat ha durukmu misigmu kwaniruruk; anyo hag ap morue on ai nohoruk angge emberimmu neg imbil-ambal uruk kwit wereg.

¹⁵Ap ko on eke mun ko siag on eke wereg; onggwareg en nauk angge oko ambilikmu kwelapuk ale oho duk fug ale duruk

¹⁶Ap sabiren enggat on en wene onggo uruk on eta we ha famen; ap ko on anyo onggwareg en de an enggat on welahi boruk.

¹⁷Ap eke en it ap enemu suahal urukmu etma inim sebe ulug duruk halug; ap en mene olomene on isanggo kwaniroho senetuk hag duruk.

¹⁸Ap ele seiale uruk kwit, “An de maheagdoho ihi,” ulug uruk on aire; ap wenenebo on en senjata indok wereg on nim unum duruk hag.

²⁰E yalduk on eleg atuk halug de indok nahul atuk; famen ap ambilik yendeg lit wene saharuruk on eleg atuk halug yeik suahal uruk on omano bal atuk.

²¹Indok anggen nim e nim en mangno deg ma indok ambul-bul duruk; ai hagdoho ap suahal angge neg uruk on ai en de ap endama ahanhan ap kwelapuk.

²²Enebug uruk ale aire mun fano deg ma; ap en bil hauk ale enahayeg deg.

²³Ukwag kwenang dangge on ahapma perak orohole deg famen ilonggoma kwenag on deg; ai hag ap siag ale duruk on airoho deg.

²⁴Ap alitno enepuk on de ambilikmu ele fano-fano ale uruk; famen endama seiale on hoporoho wereg.

²⁵At lahe ele sako ale uruk halug de demdoho bouk fug; asuahal de ahummu hoporeg lit wereg.

²⁶Aren asuahal endama herag-dauk famen; ap abit angge en eneg deg ma eneluk atuk.

²⁷Ap eke en ap amu on fahet ulug kwenang habuluhu famen; onggwareg obuk uhu. Ap eke en helep ap amu on fahet ulug yomangge fohu famen helep anyo en onggwareg dungdoho wat-dahu.

²⁸Ap enele sei aleroho lal enepuk ale aire enerim enepuk hag; enele buhun uruk famen, alemat atuk on fahet uruk.