Read Ninia Yali AMSAL 27 Bible Online

AMSAL 27 - Ninia Yali bible

AMSAL 27

¹ Sono duhuk on fahet seiale hele andung am fug; airoho uhun famen de hat sono ke ale aruha aire hat hapeleg ma anggere.

²Honggwareg en wel-dauk kam fug; it ap amu on en wene ai duhup fano, it ap hat hapeleg on en wel habuhup aire fano.

³Helep nim iliangge nim anggen de horog sereg; ne ap morue on en enenda oukapdoho foruk ale aire anggin humdeg;

⁴Suahal bet enepuk ale aire enolok atuk mu minggit atuk ale famen; ap amu on fanoreg ale esalug enehum kwe het duruk on aire ap san inim ambi am alereg?

⁵Enendama herako enenda hundig enepuk ai ha famen, enameg enenggali ware foruk on aire mun fano.

⁶Are en halug de enda hundig en watuk; inim minggirig on en watuk angge fam yoma enepuk.

⁷Homo deg lit halug de kin ahalue famen oho embeseruk; famen obok deg lit de asig angge famen unduk neg angge atuk.

⁸Suwe a wirigmu embeselug wilip atuk hag; ap enobam embeselug wilip atuk ai.

⁹Ahalue amben angge mel, no amben angge enebe watuk on omano mel de enendama healduk; ai hag enori en fano ale debeseruk on ai enendama healduk.

¹⁰Hat hakni are oho hat hare oho hapeleg am fug. Hat anggin hobam weregli hare fam let nabin ulug heng duk fug; hare o yatma wereg on nim hundig alere maben hag, famen it hinim o sokole nikama on ai neg de mundoho along deg.

¹¹Namloho hat mun henda wenggeleg on aruhun mu ap en an nenggali wat napuk li em onggo hweag-eseheg nahayeg deheg duruk karuhun en.

¹²Ap enape hebeleg on en de bolan deg ale hil lauk kwit de ohwale fahat-dauk famen de; ap morue on halug de ha fug angge long-long lauk men berel enepuk.

¹³Ap eke en ap amu on en ombaleg angge aren haruhuk boruk halug; enda lit anggre angge eke oko foroho lamuhup.

¹⁴Ap eke en hubetdoho aren dang duruk kwit; ele humon fam dag duruk halug de; aire hururung duruk kwit uruk bohup.

¹⁵Ohwe hundig suahal neg uruk on halug de; osit henangginggi bale fouk fug angge nukoho hundig lilduk kwit neg wereg hag deg.

¹⁶Hol kwe bale fouk fug alereg ai hag, ne ahalue enenggikmu olog duk fug alereg ai hag, at fam hele eleg amin il lauk men de bok am fug alereg;

¹⁷No bosie omanggen eke en eke werelduk hag; ap eke oluk deg ale famen ap eke amu on kobalolo fouk alereg.

¹⁸Ap eke en e fanoroho hwalduk halug fobik anggen nahu; ap eke enobahet duruk on en akni hwalduk halug fobik leho fohu.

¹⁹Ik ilmu enapumag belap hauk hag; honggwareg hendaman hebe welahen ale anyo hapumag unug-hutuk.

²⁰Kwenangma ap waratuk mu etma hundig obale wereg; ai hag ap homi en enambono boruk angge oho huli su huli ulug wereg fug.

²¹Emas mel, perak mel ai indok yalegman abut balduk; famen ap de abut fano duruk fam mot-duruk kwit, ai en eneluk atuk.

²²Ap morue on aire yeik ouk weregdoho enowaruhup famen; morue ale ai fobik oho eleg aruhu fug.

²³Henangge no loboruruk angge etma furoho hwalduk nu,

²⁴Henenggikmu angge femdoho welaruhu fug, ap enomamne wereg lit melal-enepuk ale oho femdoho hundig-hundig wereg laruhu fug.

²⁵Enggela angge yabukmu on mel, duk kwe on mel baloho kabog-dulug henowam fahet kabog-duruk kweleg obale kwe keron lahapuk.

²⁶Hit henen domba oruk etma oho hat hasum hwelauk kahen, kambing etman foma onggo wauk kahep on fam kwenang keron hunduruhup fano.

²⁷Hat heneng kambing foma etman de honggwareg mel hohwe homalik mel, heyabuk duruk on mel ag nauk on fahet welaruhu fano.