Read Ninia Yali AMSAL 28 Bible Online

AMSAL 28 - Ninia Yali bible

AMSAL 28

¹Ap siag duruk on mug eneplug lauk eleg kweleg famen al hweiroho buroho lauk famen ap demdoho neg duruk on de no singa hag ambong seroho wereg.

²It ap homi enunggul unuk we on siag duruk halug de, enalong wereg enap etma eke obalma eke inaheg duruk; famen, enda wereg on en melal-enepukmu etma bik bok unduhuk lit furoho wereg lamuhup.

³Enalong wereg enap etman ap enenggik eleg on sebeloho feseruk on de, osit fo osit humon hag wamburuk kwit yaho angge anggen siahap duruk hag debeseruk.

⁴Ap eke en wene melaleg sebeloho foruk halug de aren ap siag on fil ili og enepuk; ne ap eke en wene melaleg higitdoho duruk halug de aren ap siag on nim minggirig wereg.

⁵Ap Allah enapeleg on en demdoho wene fureberuk fug; famen ap TUHAN apne wauk on en de, dik-demdoho fureberuk.

⁶Ap enggik eleg on enda bekitdoho wereg ai fano; famen ap dungon de hwenaroho duruk ai neg de siag.

⁷Ap sauwe eke wene melaleg furoho duruk on halug mundoho enda wereg on aruhu; famen ap di angge su angge o faldil lauk on omano nim mangmangno duruk halug de akni enggaliapdoho foruk.

⁸Ap eke dung atuk aire angge fam dopno angge foma humdoho hwelauk ai fam enggikmu humdoho wereg atuk mu angge etma re it ap enenggikmu eleg on fam enenda esalug let enepuk on omano enobahet kabogdoho foruk.

⁹Hat en oho Allah wene melaleg anyo higitdoho duruk karuhun fug halug; Allah en oho haren somban uruk on me aperuruk karuhu.

¹⁰Ap eke en ap bekitdoho duruk on omano siag ale dukwag ulug limi enepuk halug, ap ai at onggwareg sabu yepdeg ma kwik lauk.

¹¹Ap dungon at onggwareg en an enggat on welahi boruk, famen de ap enggik eleg on ai demdoho on en de an nebere sa no ulug onggwareg oluk deg.

¹²Ap fano duruk on de enalong wereg on atuk halug ap abit en enahayeg enepuk; famen ap siag duruk on en ap homi melal-enepuk halug ap homi herag atuk.

¹³Ap eke en asiag endama herako fahat dalug halug ai fam fobik fano angge eke hwelahu en de fug; famen ap eke asiag anyo fag-dulug embeseruk halug de TUHAN en enda hundig duruk karuhu.

¹⁴TUHAN hundig along bolug duruk kamin, airoho duruk halug ambiangma fano aruhun; haren At ele sahalduk karuhun halug siahap habuhu.

¹⁵Singa en nginog dil lauk hag mel beruang en senggel enepuk hag mel, ap siag duruk on de ap anggoloroho wereg on sebel enusug wereg.

¹⁶Ap melal-enepuk on en ap homi sebeloho feseruk kwit wereg on ai at wenggelduk on siag en duruk; melal-enepuk on en siag ale erim boruk on halug de hundig-hundig unduhuk wereg lit melal-enepuk karuhu.

¹⁷Ap watuk ahun halug de at oho mutlug duruk men ilowag eleg aruhu; ap eke en at bokapdoho foroho lam fug alereg.

¹⁸Ap siag ale enapeleg angge wereg on de fobik enahap wendareg welamuhup. Ap siag ale neg dil lauk kwit wereg on etma bule wambuhup.

¹⁹Ap yabuk omamneroho wutuk on de nauk angge humdoho nauk; ap nukoho alematuk kwit wereg on de nauk angge elegma anggolo hauk.

²⁰Ap bekitdoho duruk on TUHAN en fanoap enepuk karuhu; famen ap folo-folo dung atmin ulug duruk on anyo unggum famen lil aruhu fug.

²¹Ap homi esalug direg on sureg on ulug enetuk ai siag; famen it wene katukdoho balduk on en de uang dorangge lohon hwelamin ulug hwenaroho duruk on oho wereg neg.

²²Ap kibu on anyo folo-folo dung aruhuk fano boruk; famen at folo-folo enggik eleg on aruhuk anyo apelegdoho duruk.

²³Ap eke en are eke enggali waruhu men fobik en ap kain on ulug mot-deberuk karuhu; ne ap mot-deberuk karuhu on de airoho duhu fug.

²⁴Ap eke en akni isinga enangge heraharuk kwit, ai siag alere boruk fug; famen aren haraharuk on aire amu on duruk ale nim higit deg.

²⁵Hat de TUHAN fam demdoho boruk kahen ai fam de mun fano welahen ha alereg; enonggwareg neg boruk on ai fam de minggirig wene enam atuk.

²⁶Ap eke en at onggwareg en uruk ale neg fano boruk halug de at wenggelduk on fanoreg fug, famen at eke ap enggat on en hweag-utuk ale higitdoho duruk halug de ahap wendareg laruhu.

²⁷Ap eke en ap enggik eleg on fam angge og-utuk halug de fobik anggolo deg laruhu fug; famen ap eke en ap enenggik eleg on il esa fug angge duruk halug de, fobik unggum hwelahu.

²⁸Ap dipdoho duruk on de siseroho melal-enepuk karuhu famen de; it ap siag duruk on en melal-enepuk halug ap homi herag atuk.