Read Ninia Yali AMSAL 29 Bible Online

AMSAL 29 - Ninia Yali bible

AMSAL 29

¹Ap eke en hundig komo-duruk kweleg famen ap ele sahalduk kwit neg wereg halug; misig am eke al bereluhumu, fobik eke buhunduk fug ale aruhu.

²Ap dipdoho duruk on en ap homi melal-enepuk em de ap homi enahayeg hauk; famen ap siag duruk on en melal-enepuk mu re, ap homi anggin enobam feseruk.

³Ap eke en enggat ale endareg halug de akni endama healduk; ap eke hwe hambena on nim mangmangno duruk halug de, uang elehap duruk.

⁴Melal-enepuk ahun en dipdoho bilingguruk ale fureberuk halug de, o kwenang aren melal-enepukmu etma omamneroho unduhuk laruhu. Famen de aren uang neg along bolug duruk halug de o kwenang etma fam mundoho siag aruhu.

⁵Ap eke en ori mot-debesemin ulug duruk famen de, onggwareg yoma-dauk.

⁶Ap demdoho duruk on de enahayeg enepukmu fanoroho wereg; famen de ap siag duruk on de enesiag fam enonggwareg yep-dauk.

⁷Ap fano on en de ap maben on enengge ai ulug ebet hauk; famen ap siag duruk on en, airoho ebetuk fug.

⁸Ap siag ale neg dil noruk on en kota siahap duruk; famen ap enggat deg on en enolok anyo sebeloho belabe foruk.

⁹Ap enenda wenggeleg on nim ap morue on nim wene wut duruk kwit de, ap morue on anyo en sipukdoho yeik lahabe foruk kwit unda yatuk fam etma enele saling-kwaling esauk.

¹⁰Ap enenda bekitdoho wereg on de it ap enamep obok enepuk on omano en enelitno enepuk, famen ap fano on en il baloho fahat-enesug.

¹¹Ap morue on en de suahal enameg sipukdoho bet enepuk famen ap enggat on en de, enehummu het lahaik waharuk on omano sebeloho belabe foruk kwit wereg.

¹²Melal-enepuk ahun en de wene seiale wene uruk su ulug fureberuk; famen de it eyabuk duruk enap omano fobik mundoho enolok amuhup.

¹³Ap enggik eleg on nim ap sebeloho folug wereg on nim etare higit deg ma; it ap biren eta TUHAN nim ambi atuk kwit inil seleg hauk on og-esauk.

¹⁴Raja en ap maben on ili og enepuk halug de, at de tahun humdoho wereg lit hundig-hundig melal-enepuk kwit welaruhu.

¹⁵Komo ale mel, enenggali watuk ale mel etma re ap enggat amag ulug enepuk; famen omalik at enda boruk ale neg duruk halug isinga enggaliap deberuk.

¹⁶Ap siag duruk on en siag ale humdoho eke nim duruk kamag ulug melal-enepuk. Famen ap dipdoho duruk on en neg de, fobik ap siag on enebe elehap enepukmu hahup.

¹⁷Hat homalik komo duruk karuhun, ai aren lioleg ale mel, hat hendama aho wareg ale mel hobaharuk karuhu.

¹⁸Ap homi enunggul unuk TUHAN en melal-enepuk ale wauk eleg obam halug de; siag ale en hoporeg obam welamuhup Ap TUHAN wene melaleg fam dipdeg on ai mundoho enahayeg boruk kamag.

¹⁹Ap amingmingon eke furoho hweag-itsi fug mu we ele fam uruk ale neg holsi. At de fureberuk famen de eberuk fug alereg.

²⁰Ap sohou on fahet wene humdoho hweag-esowag ulug wereg, famen ap enenda dam wenggel-ha fug angge enele matuk on ai fahet de anggin deg.

²¹Amingming on owan dot deg li fanoroho komo-disi fug halug de ambiangma abut siag[9] hape on aruhu.

²²Ap folo-folo suahal uruk on ai ap humdoho suahal uruk kwit siag duruk;

²³Ap leho bahat-dauk on fobik sebel aruhu; ap enda sebeleg on de fobik welduhup.

²⁴Ap heraharuk on nim yabuk misig duruk on de, ebe enonggwareg siahap dauk, Ne, aren bilingguruk men selegdoho fag-duruk halug de, at unggum obam fohup. Famen aren bik-bok neg wereg halug Allah en hururung debehumu hwelahu.

²⁵Ap en uruk on fahet hakol duruk karuhun halug de siag on ambiangma aruhu, ne TUHAN fam henda demdoho ulug dip debehun halug de hat fobik hili oho welaruhun.

²⁶Ap humdoho en it enalong wereg on en let nenebukwag ulug duruk, famen ebe dipdoho bilingguruk on de TUHAN neg wereg.

²⁷Ap fano duruk on de ap siag duruk on nim endareg fug; ap siag duruk on en ap bekitdoho duruk on fam enolok enepuk.