Read Ninia Yali AMSAL 3 Bible Online

AMSAL 3 - Ninia Yali bible

AMSAL 3

¹Wene an den hweag-hutuk kahi on etma re hapelehapdohore fouk fug namloho, an den wene melaleg hweag-hutuk kahi on etma hundig-hundig ebetuk kamin,

²aire hat hebe umur yarap habukwag ulug nim, holuk de hahayegdoho wereg laruhun en.

³Haren de Allah fam henda demdoho boruk kaheg dipdoho neg deheg duruk wereg lit ap homi fam inim airoho duruk kamin. Abirangge aire hendama bugdoho foroho lamin.

⁴ Airoho duruk fam de Allah en oho ap homi en oho hobam enahayeg foruk kamuhup.

⁵Henda mundoho TUHAN fam neg dip deberuk kamin, hat hamu en wenggel duk kahen on fam neg dip dobahat-dauk kam fug.

⁶Haren di ale su ale duruk kwit TUHAN anyo fahet ebet hauk kamin, Aren eneluk fanoroho wereg alere diroho ulug unug huruhu.

⁷ Hat hebe fam deg lahen ale etmano wereg kweleg de an nonggwareg en noluk enggat humon deg lahi boruk kam fug; TUHAN ele holoho neg duruk wereg lit, siag alere embeselug welamin.

⁸Haren duruk ale ai fam de obat hat hebe hiling hapuk on hag mel, henda lombuk atuk on hag mel wereg hobaharuk karuhu.

⁹TUHAN mot-duruk kwit ulug de, hangge fano angge obahet folug og ereheg, hanggwenang fam en anggen yihig balduk angge og ereheg duruk kamin.

¹⁰Airoho feseruk mu re, At TUHAN en hangge gandum anggen baloho foruk kahepma etma hopo debeheg, anggur ahaik hwenanggoho foruk kahepma etma ele sopdoho yohware henobahakeg duruk karuhu.

¹¹ TUHAN en melal-hapuk ale omano fahet domako embesouk fug, namloho. Ai re an ebereg welamag ulug hweag-nutuk ulug wauk kwit, wene melaleg ale ai fahet de hahummu siag bouk fug.

¹² Hun akni en amloho enda hundig en yeik waroho komo-duruk hag, TUHAN en hat fam enda hundig en yeik waroho komo hapuk halug de, nakni airoho nowareheik ulug ele sahaloho embesouk fug angge duruk kamuk.

¹³It ap enenda enggat amuhup on aire enenda wenggeleg on amuhup anggere enendaman iyale boruk kamag.

¹⁴Ne, iren enendama boruk kamuhup on aire perak ambiangma en hwelauk ale re maben hag, ne emas onggo deg ale nim de higit deg fug.

¹⁵Enenda enggat on atuk ale aire helep permata onggo re sebeleg famen de ai neg de leho; ne haren diroho hwelahuk ulug hendama ebet-ebet neg uruk kahen on etma nim higitdeg fug.

¹⁶Enggat atuk on ai en de hat hebe umur yatdoho wereg on mel, dung atuk on mel, enenuk leho on mel, ai og-hutuk karuhu.

¹⁷Enggat on ai en de hat hebe fam hahayegdoho welamag ulug hobahakeg, hapema fanoroho welamag ulug hobahakeg, duhu.

¹⁸Ap eke en enggat on ai bugdoho foroho laruhu halug de ebe oluk wereg lit ahayegdoho neg welaheg, apema fanoroho neg welaheg duruk karuhu.

¹⁹TUHAN enda enggat ai en de kwenang wal-debag, Awenggeleg ai fam de bohol obalma etma hwerie febag ai.

²⁰At oluk deg ale fam de kwenang kahal heg kwenang apman ik eleruk-eleruk angge fulohomdoho lahabe feik waheg, hena bohol ma humdoho etleman osit hilil-haladoho kwenangma belabik waheg duruk.

²¹Degma re namloho, henda enggat atuk on ai seneg lit, ke on duk alereg ulug fukwi deberuk on seneg laheg duruk kamin. Ai o fotog-esamin ulug embesouk fug.

²²Ai durukmu re, holuk mun eberoho hwal-habeheg hendama healoho habeheg duruk karuhu.

²³Ne, hat kobokwe hakol eleg angge hambong seroho lauk karuhun, eke heyog unggum dungdoho howaruhu fug.

²⁴Hat hakol elegdoho lalug nohoruk kwit, hupanggo noho homogdoho nohoruk men, hup hunduko nohoruk karuhun.

²⁵Hol sielu fetagdoho waharuk hag anggin waharuk kwit it ap siag duruk on enobam aik waharuk hagdoho hobam aik wam no ulug hakol duruk kam fug.

²⁶TUHAN en neg along baloho fahat-husug laruhu. Hat hebe sapna elma al berel habukwag ulug fotog heahu fug.

²⁷Hat henda fano en duruk kahen ale fahen ap homi neneplep ulug borukmu haren duk alereg kweleg herim en embesouk fug.

²⁸Haren ketia let esa alereg kweleg, haren it hinim wereg on fam sono henebuhuk angge nangno hauk kamek ulug hweag-esa fug.

²⁹It ap hinim horogdoho welahep on hat hobam demdoho bolug duruk on omano fam it laloho fesemin ulug duk fug.

³⁰Ap eke hat siahap hobaharuk eleg on nim wene indip eleg kweleg hinim wene yeik suahal uk fug.

³¹It ap enabut hape ale duruk on omano fam hahum kwe het foruk kam fug, ne iren duruk ale etma enebut wal heheg duk fug.

³²Ap siag duruk on ai TUHAN en alitno boruk. Famen at ap fano bekitdoho duruk on nim horogma wereg.

³³Ap siag on enobam ai TUHAN en hururung deberuk famen ap At fam enenda dipdoho duruk on enobam olma fano ap debeseruk.

³⁴ TUHAN en ap enenda leho on alitno enepuk, famen ap enenda sebeleg on fanoap enepuk.

³⁵Ap enggat on unuk fano on dopno ail laharuk famen de ap morue on de siahapdoho fahat dalug wereg.