Read Ninia Yali AMSAL 30 Bible Online

AMSAL 30 - Ninia Yali bible

AMSAL 30

¹Agur hun Yake amloho obam Masa on anyo en wene uruk katfag alere su: “Nakni Allah, an lilipna napuk! airoho napukmu nomamne mundoho eleg aha!

²An wam hagdoho morue deg lahimu; fureberuk on wereg fug.

³Nenda enggat on ai an wauihik fug mu; hat Allah deg lahen ale fahet dorangge oho lohon noluk deg fug.

⁴Ap keman boholma lahakeg wambeheg duswa? Ap ai en hol enggikmu yinggiloho wasi a? Ik oho asum ebe sum fam het disi a? Ite kwenang ambiang huli-huli waroho feil lasi a? Ap aire sa, ne amlohore sa? Demdoho hat de holuk deg lahen!

⁵Allah en sali wene abirangge omano dipdoho duhu, at de ap homi At fam herag atuk on omano enobahet dog bei angge wereg.

⁶Ne, haren de At ele uruk ale omano eke nim dopno deberuk karuhun halug de Aren hat bet habuhu, ne hat de ap seiale on ulug eneg aruhun,” ulug ebag.

⁷Eke uruk kwit, “Nakni Allah, an waram fug angge wereg lit wene indip biren eta an og nuruhun en heng hapuk kahi.

⁸An den seiale wene mel nele en laloho mel ihi hano, an nenggik elegdoho mel, dungdoho mel welamag ulug fotog nea fug. An oho nenda anggoloreg lahi ale etaroho og-nutuk kamin.

⁹An dung aruhukdeg halug de an nele uruk kwit hat fahet nenda habihi ha fug no. Ai en an nenggik eleg on atlug an den ap enengge herahaki ha man, Hat hunuk siahap debehi hale deg ane,” ulug ebag.

¹⁰Ap amingming angge on eke akni fam abug siag uruk kam fug, airoho duruk men fobik aren hat hururung habuhumu re hat siag dirihin bouk no.

¹¹It foman enaknisi hururung debeseheg, enesinga along bolug duk fug angge welaheg duruk.

¹²It eke enenda sing humdeg liren famen, it enonggwareg en de an nenda horeg lahi boruk.

¹³It eke en de at fano duruk eleg liren de; an neg mun fano duruk on welahi boruk.

¹⁴Ap foma enangge nauk on heradauk kwit enolok fam heradauk; ai en ap sebeleg on mel enenggik eleg on mel enerim enusug lit enenggik omamne fam sebel enusug wereg.

¹⁵Muli amep nauk on de omaliki biren wereg; biren-biren eta enenuk de, “An nobahet!” ulug soaleg. Wene ohwan wereg on aire homo debeseruk fug on wereg;

¹⁶kwenangma ap waratlug laukmu ai mel, hwe omalik endetuk eleg on ibili wereg ale ai mel, kwenang iringgig on en osit obok anggolo hauk ale ai mel, indok ambulbul amu-amu kwe melelang dik lauk on ai mel eta wereg.

¹⁷Ap enaknisi enesingasi ane sobal[10] il en senggelduk on ai, higitdoho dagma hwik enebuhupmu, suwe homale hag en inil huliluhumu enebe suwe ikwesahop en nahup.

¹⁸Eke wene ebe ohwan an den furebehi ha fug alereg ma anggolo deg on de su wereg:

¹⁹Suwe ikwesahop bohol hweyanggunggu fene etlema daruruk, Kisu helep sili fene belelang duruk, Kapal de ik laut bul emberim kwe lauk, Duhum sauwe enenda nauk fam enenda belap atuk.

²⁰Hwe eke ahun wereg famen enda kwelabeg eleg lit babi dil lauk on anyo abut duruk ale su: At mundoho nalug en de ele fam de, “An de di su ale etma dihi fug!” uruk.

²¹Wene ohwan eke anggin deg ma it ap homi kwenangma abirangge en wa fug alereg on de su:

²²Ap misig mingming on famen raja atuk, ap misig morue on en di on su on at ambono boruk angge omano hwelauk,

²³Hwe eke ap en enerim duruk on famen ahun hwelowag ulug lombo enepuk. Hwele amingming angge on eke en hwe isinga log hwe obalma inatuk ale etma.

²⁴Kwenangma suma no lobo duruk angge orohole re ohwan on enebe dorangge wereg famen de enebere engat humon deg on de su:

²⁵Nini ai omamne eleg angge famen hobireg li nauk angge ondoloho fahat-dauk.

²⁶No eke unuk bak pelanduk ai ebe omamne eleg angge famen de obam de helep dom indipmu etma a wit-dauk.

²⁷Buluwe ai hweren angge enebe melal-enepuk on wereg fug angge famen bekitmiroho deik debelug lauk.

²⁸Berug ai ap homi enenggik en senetuk angge famen ap raja obam olma etma kwik lauk.

²⁹Eke wene ohwan ai eke lauk ale fureberuk men de amuroho deg ma yande duruk on de su:

³⁰No singa aire olomene hag famen de it amu angge maben deg kweleg at neg omamne humon deg lit olok deg ma re amu angge fahet akol duruk fug.

³¹Kambing yohombuk on, ayam yohombuk on hi hemetdoho lauk, raja ap homi inil hanim ambong seroho lauk.

³²Hat sohou ale duruk kahen ale fahet de, haren hawonok atuk kwit, wene siag on fahet melaloho foruk kahen aire hape hebeloho welamin.

³³Haren ahowe mulelelduk men de wam amug hag angge mentega aheg, haren ap ambiang fam yeik waruhun halug mep wilibik waheg, duruk hag, haren holok aruhundeg welaruhun halug de, hat hinim minggit amuhup.