Read Ninia Yali AMSAL 31 Bible Online

AMSAL 31 - Ninia Yali bible

AMSAL 31

¹Sure at Lemuel o Masa etma raja welatfag on at isingan hweag-utuk katfag ale.

²Hweag-utuk kwit de “Namloho nenda anggen on an somban irihik aleroho onggo endag-atihin mu. Nunggwe ale an den hat hobam dihi ha alereg?

³Homamne mel, hebene angge mel etma hwe fam elehapdoho fouk fug. Ap di raja su raja siahap enepsi ohwe ai fam alemaroho fouk fug.

⁴Lemuel ebetuk nu! Ap enunuk bogdeg wereg on de anggur ahaik nauk ale mel, ik siomo enepuk on nauk ale mel etma re nauk fug angge.

⁵Raja en ik siomo duruk on nil lauk kwit wene melaleg anyo hapelehapdoho embeselug it enomamne eleg on enangge etma nanggini fehen halereg.

⁶Ik asig on siomo duruk on aire it enehummu siag duruk on nim eleg amuhup on nim en nauk angge.

⁷It nil lauk kwit de it enenggik eleg anyo nim, anggolo deg ale anyo nim enepeleg amag ulug nauk angge.

⁸It ap enalong bal da fug alereg on etma ili og enepuk kamin. It ap abirangge da fug alereg on etma enengge hwal-enepuk kamin.

⁹It enobahet habiroho duruk kwit, wene ayo wit enepuk on bekitdoho duruk on welamin. It ap sebeleg on enenggik eleg on enangge along baloho fahat-enesug lamin.”

¹⁰Ohwe enda wereg on aire mun anggoloroho hweag-da alereg; hwe aire no berlian onggo mun along deg ma wauk on aire sebeleg hag famen de at neg de mun along deg.

¹¹Ahun en de ohwe fam enda dip-debelug durukmu re, ahun en di ale su ale anggoloreg ale eke wereg fug.

¹²Aren de ahun fam eke siag ale duruk fug, at oluk wereg lit fano ale neg at fam deberuk kwit wereg.

¹³At amururu doho hekel mel, domba oruk mel, omano andog dulug asing singdoho sum yihiruk.

¹⁴Kapal o yatma di angge su angge onggo balukoho walug waharuk hag; aren nauk angge o yatman wag lalug waharuk.

¹⁵Hubet-habet suwe ele areg kweleg at dag inatlug o ilonggo anyo fahet nauk angge fouk duruk. Eke aren eyabuk duruk on omano yabuk duluhup ale ulug yohwan esauk.

¹⁶Aren kwenang eke hweaho folug onggo bal-dauk; eyabuk hwelaukmu etman yabuk eke anggur fahet wiri foruk.

¹⁷At enggik omamne roho deg lit, eyabuk etma wit-dauk;

¹⁸Di angge su angge duruk kahi on oma fam de ambiangma fano hwelahuk anyo bolug duruk, mu yabuk duruk men hup andundu aik lauk.

¹⁹Hekel soaleg fam yihikeg, sum kain on fam seleben deheg duruk.

²⁰Ap homi anggolo deg on omano fam enda kibureg fug; it let-neneplep boruk on omano fam enda fano ahayeg wereg.

²¹Obam ilonggoma wereg on omano fahet ahanhan sum mundoho fouk debeseruk; o sanim waruhu salim nangginuhuk en i ulug, enda fituk fug.

²²At onggwareg en hwenie doal angge humon yihiruk; sum de kain lenan ungu il fano sako on fam yihiruk.

²³Ahun de ap o kota etma melal-enepuk on omano enesahalimen de; at unuk neg de leho on wereg.

²⁴Aren sum mel bahaluk mel wituk on; omano hundutuk enap fam onggo wak lauk.

²⁵At alongdoho leho wereg; ma fobik fahet enda fituk fug.

²⁶Ele matuk ale sako lilibandoho matuk; ele re enenda wenggeleg on en matuk aleroho matuk.

²⁷Aren de yabuk hundig abiroho duruk; airoho duruk kwit en de obam olma deg ale fahet ebereg lit hwale foruk.

²⁸Airoho durukmu at omaliki en nim ahun en nim leho foruk;

²⁹Ahun en uruk kwit, de “Homi fano on humdoho wereg famen de; Hat neg mun fano it mundoho etma we ha.” Uruk.

³⁰Enebe buhun-dauk ale re demdoho deg bouk fug alereg, ne il aluli buhundeg on de fobik eleg aruhu; famen hwe TUHAN fam enda dipdeg on de mot-debouk alere higitdeg.

³¹Hwe at de di kwe su kwe en leho foruk kam on welamag; ne hwe anyo di ale su ale duruk on etma fahet de onggo at leho fohup ai.