Read Ninia Yali AMSAL 4 Bible Online

AMSAL 4 - Ninia Yali bible

AMSAL 4

¹Yaho nomaliki henaknisi en komo henepuk on ai enele holiek! Hiren wene etma furebelug duruk kamuhup halug hit ap enggat on amuhup.

²An den hat hweag-hutuk kahi on aure fano on, deg ma re haren seramap debehun ale fahet de fug.

³An ohore nebe dot deg li re nakni nisinga en de neyog misig on namu deg liem,

⁴an nakni en wene komo hweag-nutuk katsi. Hweag-nutuk kwit de diroho uruk katsi, “Komo hapuk kahi ale oma re mun ebereg lit neg welamuk, ne we dem misiham dik-demdoho hapelehapdoho embesehun fug deg, hebe fanoroho neg welaruhun en de hweag-hutuk kahi on ai higitdoho dil lauk kamuk.

⁵Henda enggat habut mun hebeleg on atuk kamin! An den komo hapuk kahi on etma ebetuk kamuk, embesouk de fug,” ulug hweag-nutuk katsi.

⁶Enggat atuk ale ai along deg boruk kamin, ne ai duruk karuhunmu enda wenggeleg ai en apma fahat-husug laruhu. Hambono deg laruhun halug ai en hat hambukdoho welamag ulug fahat-husug laruhu.

⁷Wene mun leho on atam haren duruk karuhun on de enenda enggat atuk on ai aruhuk ulug duruk karuhun ale ai neg de along deg. Haren amu ale eke fahet mutlug lauk karuhun famen de yugdoho re di wene su wene furebelug duruk ale on ai hwelamin ulug mutlug lauk karuhun.

⁸Henda enggat atuk on ai olohotma ap deberukmu, ai en hat leho hobaharuk karuhu, ai mako bugdoho foroho laruhun halug, hat hunuk leho on apdoho hobahaku.

⁹Ai en hat hunggulmu kware-kware owil angge on henaho bug deg ma hag orohole fanoe hobaharuk karuhu.

¹⁰Namloho an nele komo ale ai holduk kamin! Ne haren lahe an den wene komo ale hweag-hutuk kahi on fik-furebelug duruk karuhun halug de hat hebe umur yatdoho welaruhun.

¹¹An den de ap homi enggat on atuk ale mamul habeheg, enebe fanoroho wereg ale diroho ulug melale hobahakeg duruk katihik.

¹²Mu re haren airoho neg welaruhun halug de kwe lauk mu kwe bal hapuk karuhu fug. Ne buroho laukmu salog kwalog angge hapuk karuhu fug.

¹³An den hweag-hutuk mu wauk katihin ale etma ebetuk kamuk. Komo ale ai furoho hwalduk karuhun halug de hat hebe fam ambiangma anggen yihig fano on neg hauk karuhuk.

¹⁴Ap enebut siag ale duruk on omano enabut wereg aleroho duruk kam fug. Iren duruk ale hat ilitdoho duk fug.

¹⁵Hendare it fam belap am fug, it ai mundoho fotog-esalug, hat bekitdoho lauk kamin!

¹⁶Ap enolok on ai siag ale duk fug anggere hup nohoruk fug. Iren ap amu on eke siahap debesouk fug anggere, noho inil enepuk fug.

¹⁷Enolok fam duruk ale mel siahap enepuk ale etma re, it enahaik enesiburu nauk hag deg.

¹⁸Ap siag on kwe lauk kwe re hubanggo mun hag kuruwag deg ma, it eneyog dungdoho bule kema wamburuk kahi ulug enapeleg deg kweleg wamburuk. Famen de it ap fano on enanggobokwe lauk kwe re mo lahaik waharukmu seleg hag deg ma, fobik seleg dil-dil de ambiangma re seleg humon birim debehu.

²⁰Namloho an nele hweag-hutuk kahi ale eta fureberuk kamin, an den komo hapuk kahi on furoho holduk kamin.

²¹Wene ai hwik-esa fug, famen hendama uluhun waroho foroho laruhun.

²²Ap wene komo etma fanoroho oho folug duruk on de oluk nim, ouk eleg angge nim wereg laruhu.

²³Henda fano fanoroho hwal-dauk kamuk, henda ai ende kwe fano on fam lauk ale hweag-hutuk karuhu anggere.

²⁴Eke salim wene siag on de uruk kam fug, enele sei-sei ale uruk on mel, enele fam ap homi laloho feseruk on mel etma embeseruk kamuk.

²⁵Hendama bekitdoho wereg on anyo re holohotma enamduk kamin, hendama amuroho deg liren holotman neg duruk kam fug.

²⁶ Duk fuk angge owanam henda fanoroho fi furoho wenggele folug duruk karuhun fam haren di ale su ale durukmu ambiangma anggen fano on neg hauk.

²⁷Siag on mundoho embeseruk kwit, holuk mun bekitdoho wereg laruhun. Kobokwe demdoho on ai fam en dahandoho eke wilibik la fug.