Read Ninia Yali AMSAL 5 Bible Online

AMSAL 5 - Ninia Yali bible

AMSAL 5

¹Namloho an nele hweag-hutuk kahi on fi furoho holduk kamin! Ai en an nenda enggat deg lahi ale ai mel ne an den fik-furebelug duruk kahi ale hat mamul-hapuk kahi ale mel etma fureberuk kamin.

²Airoho duruk fam de hat ap henda enggat on wereg lit, hele matuk ale holuk aheg hebe ap homi inil hanim wereg ale mel holuk deg laruhun.

³Hwe abut siag on[1] ai ele matuk mu re, kin ahalue unduk mit deg hag deg ma, ele ahalue en de ap enenda og enepuk.

⁴Famen de abit angge omano eleg atuk kwit, enenda ale hauk on nim ouk hauk on nim neg de wereg laruhu.

⁵Hat hebe lisoho og-haplug kwenangma ap homi waratlug laukmu belap hapukmu wambik lahundeg kobokwe fologdoho ap waratuk mu etma kwik lauk karuhun.

⁶At de kwe oluk enepuk on fam hundig lauk fug; at apeleg kweleg kobokwe ai fam en dahandoho wilip atuk.

⁷Ai fahet de hit nomaliki yaho an nele ai furoho holduk kamek, sahaloho embesouk fug.

⁸Ai fahet de, hit hwe ai horogma welam fug, embeselug henebe yatdoho wereg lamuk.

⁹Hat hwe ai nim bali waruhun halug de hunuk leho anyo longgo eheg, holuk hebe suawema welatihin ale omano longgo uhumu, it ap en enelaheg boruk eleg on enenggik mu aruhu.

¹⁰Henggikmu angge di angge su angge wereg on it ap enemu on en elehapdoho nahup, henggik ambiangma etma it ap hat hapeleg on en hwelahup.

¹¹Hebe oho ouk en mun nahummu, hat hahummu siag neg hauk karuhun.

¹²Ai duruk mu haren uruk kwit, “Yehei, nunggwe ulug airoho an de komo ale fahet nalitno duruk katihik e? Ne, nunggwe fahet an hweag-nutuk alere nerim ulug duruk katihik ahi?

¹³An it guru enele oho nunggwe fahet hole folug, higitdoho duruk katihik fug e?

¹⁴Demdoho ap homi inil hanim bule wambikoho angge fahet[2] duruk katihik ahi,” uhun.

¹⁵Ai fahet de honggwareg hohwe on fam neg duguroho oho lamin, henda nauk on anyo at neg og-utuk kamin.

¹⁶Hwe amu on herarik lahun ai alemaroho herarik lahun ai hat hohwe on fug, famen hinim fano-fano ale duhup etma re hat hohwe nim fug.

¹⁷Duruk ale aire hat nim hohwe nim fahet neg wereg, ap amu on fahet wereg fug.

¹⁸Ai fahet de, hat hohwe nim neg fano henahayegdoho welamuhup. At hwele duhum deg li keram hwelauihin on ai fam neg hera duruk nu.

¹⁹Hwele ebe duhum deg ma re, abut duruk ale, ebe fam deg alere no kijang en duruk hag duruk katsi. At ebe buhun bahan deg ai fam de hat henda mulu-malag uruk kwit, hahayeg ekenim hauk karuhun.

²⁰Namloho, nunggwe ale fahet ulug hat hwe amu on fahet hambono duruk kahen? Nunggwe ale fahet ulug hwe abut siag on nim bali watuk kahen?

²¹Ap homi en di ale su ale duruk on etma TUHAN en il kumu esauk kwit wereg. Ap homi di kwe su kwe lauk mu, TUHAN en kwelap enesug lit wereg.

²²Siag ap olok on en duruk ai onggwareg fahet sabu yep dobahat-dauk.

²³Komo ale wasi fug ai en at waratuk ai. Ne, onggwareg moruereg elekwe eleg ap debeserukmu walug lauk ai.