Read Ninia Yali AMSAL 6 Bible Online

AMSAL 6 - Ninia Yali bible

AMSAL 6

¹Namloho eke haren ap ekenim sali watuk kwit, hat hobam baleg angge anggin wereg on ai an den obalma baluhuk irihin ane,

²ai fam de hat honggwareg hele sali irihin fam sabu yepdoho dauihin ai i, ne hele sali en yomaroho fahat dauihin ai i.

³Namloho ai demdoho irihin halug de ketia hat hebe ap ai apma wereg lahen. Famen hat hebe lol damin ulug duhun alere diroho su: Folo-folo ap ai akit lahun deg, aren hat loloho wilibi hobahaukwag ulug heng diyug.

⁴Wene ai wut deg eleg angge en de kel wat-deheg, nohweik laheg duk fug.

⁵Suwe mel, no kijang mel ap en watul ulug huk degman foldongdoho wilip atuk hag, hat sabu yep deg ma ai en loloho wilip aruhun.

⁶Ap ko on de it nini en duruk ale fam furebelug iren duruk ale etma mamulukwag.

⁷Nini re enowe melal-enepuk on mel, along baloho fahat-enusug on mel, it il kwelap enusug on mel, wereg fug

⁸famen de iren de di angge su angge anggen balduk salim de fobik anggolo atuk salim nauk on ulug foukdoho fahat-dauk ai.

⁹Ap ko on aire nohoruk kwit weregman neg de ke huli welatmisi? Ne, at de kea li em inatmisi?

¹⁰ At de enggik elahandu ahoroho folug kel watuk kwit neg wereg lit, aren uruk kwit, “Ah, an kungguk duruk kahimu noho filikdoho nohoruk kaikohon” uruk.

¹¹Famen de at nohoruk kweleg angge eleg atuk on nim, anggolo atuk on nim, obam ai waharuk ai ap enangge delduk on hagdoho waharuk kwit, elehap deberuk.

¹²Ap siag on mel kwasikdoho duruk on mel, en di kwe su kwe seiale lal-enebil lauk.

¹³Aren il hombut uruk kwit de ambilik mul mul fam eneg ale duruk kwit lal-enebil lauk.

¹⁴Enda wenggel duk indip mundoho filik atsi, aren wene siag on melaloho foruk kwit wereg ai fam di kwe su kwe omano yeik suahal neg uruk.

¹⁵Abirangge ai fam de bolan ale fetagdoho at onggwareg obam aruhu mu re, at ebe mundoho al bereloho embesehu.

¹⁶TUHAN en alitno duruk alere indip sabit en wereg ma Aren embesehu fug: Abut winik-wonok on, ele seiale uruk on enggik fam ap siag duruk eleg on enowatuk on unggul abohwe fam wene olok on melaloho lahapuk on, eyog olok ale dik laroholit lauk on, hundig hundik seiale wene saharuruk, ap ori on nim ildoho welamag ulug duruk on, TUHAN en alitno duruk.

²⁰Namloho, hakni en melal-hapsi ale eta neg duruk kamuk. Hisingan komo hapuk ale etare hapelehapdoho fouk fug.

²¹Wene etma hundig hundig ebetuk kwit, hendama furoho foroho lamin.

²²Wene iren hweag-hutuk ale etma hat kwe laukmu kwe hweag-hereheg, hupanggo fahat-husug laheg, ne hat nohoruk men inatuk mu diroho din ulug hweag-hereheg duruk karuhu ale fahet.

²³Hakni hisinga en diroho suroho ulug hweag-hutuk ale aire, esahe fisak hapuk on fahet; iren hat bet-habuk on aire hat holuk fano bekitdoho wereg laruhun ale fahet.

²⁴Airoho duruk fam de hat hebe homi enebut siag on etma horogma en nim, ap amu on enohwesi enele ahalue fam henda wakoho duruk men nim ohwale hobaharuk karuhu.

²⁵It inilmu buhundeg etman hat siahap habuhup i, it inil aluli buhun etman ulug henda nahu hayog.

²⁶Hambena[3] duruk on de nauk on olog angge misig onggo baloho nauk hag fam onggo og-utlug duruk, famen de ap enohwesi nim babi duruk halug de ap ebe wareg nim aeg nauk.

²⁷Ap eke en indok anggen fut duruk angge sum ebe sum wan-duruk on fam hulilip duruk halug sum indok en baluk fug angge walug lauk behep?

²⁸Ap en indok wabunak naukmu eneyog en berelduk halug eneyog han na fug angge sobiruk alereg behep? Mun eleg.

²⁹Airoho duk fug alereg on aire ap en ap amu on ohwe nim babi duruk halug de anggin hum deg. Ap eke en duruk halug, at fam unggum eleg angge lil aruhu fug.

³⁰Ap eke en nauk angge obok en herahaku famen, unuk siahap deg laruhu.

³¹Ne, aren heraharukmu ap en seneruhupdeg halug de aren onggo tujuh kali lipat fohu, fam de at amunangge manangge mundoho eleg aruhu.

³²Famen de ap eke en hwe ap ohwe eke nim babi duhu halug de at ebe mundoho onggwareg en siahap dobahat dahu! Moruwe mireg ahun ai e!

³³At de ebe fam yeik waroho anggin-fanggin hahureg siahapdoho fahat dahu. Unuk de hundig-hundig siahap deg lit neg wereg laruhu.

³⁴Ai duruk fam hwe ahun anyo olok apdoho forukmu, ahummu ahe humdoho laharuk. Aren onggo watamin boruk kwit halug de elaheg en ulug aldoroho feheg watuk fug.

³⁵At uang fam enda lombuk ap dul ulug duruk famen, enda lombuk uk fug alereg ma, onggo hum-hamdoho og-utuk famen ohore, ahummu het aire sebeloho belabe fouk fug alereg.