Read Ninia Yali AMSAL 7 Bible Online

AMSAL 7 - Ninia Yali bible

AMSAL 7

¹An nele hweag-hutuk kahi ale etma ebereg laruhun namloho, an den melal hapihik on eke hapelehapdoho embesehun hayog.

²Aire hat holuk fanoroho wereg laruhun ale fahet anggere. An den komo hapuk kahi ale etma re honggwareg hil anggen aleloho fahat dalug lahen hagdoho furoho fahat dalug lamin.

³An den wene hweag-hutuk kahi ale etma ebetuk kwit bug bagdoho henda ilonggoma atlumu kwelabe feiyug.

⁴Henda enggat on aire hare hag boruk nu, holukdoho ebetuk on de hombali mun horog deg lahep on hag boruk nu.

⁵Hwe abut siag on ele ahalue fam hat henda oko hobahaku halug, enda enggat on anyo hobahalug yatma lahu.

⁶Eke salim de an nobam jendela elekwe en fu hauihik.

⁷Fu hauk men de, ap sauwe humdoho enahap oluk on welatswa, famen de enesahalimu etman de an den ap morue on eke neg fureberihik.

⁸O mundoho hupmu atsireg heik atuk kweleg etano re ap sauwe anyo re kobokwe hwe misig eke wereg ma lauk on fam hwaninggoho laukmu etano lag-wag urukmu hauihik.

¹⁰Hwe aire hwe obam olma yuagdoho wereg on de fug. At de il misig kobokwe elan-elan etma laheg, ai en o bumbuk healeg kwe etma laheg, ne kwe handohwal durukwe etma unduhuk laheg, duruk on. Obabut de ambong sereg lit enggali ha fug angge welatsi. An hauk men de, at sum hambena duruk on sum hag wandoho wilipukmu hauihik men de ap sauwe on anyo nim seberuswareg de ele amenggel aleroho inim sali watuk katswa.

¹³Airoho watswareg de aren enggali ha fug angge ap sauwe ai omako bug deheg, dop deheg, duruk kwit ele diroho uruk katsi,

¹⁴“Yoho su an den airoho duhuk ulug nele irihik aleroho dipdoho re an den wam waroho fehi salim.

¹⁵Ai fahet de, an wilip ahireg hat hera hapuk kahi anggere yoho an hat nim ambi ahe anggere hat an nobam namihin ale fahet hera hapuk kahi! Anggere, ketia an den hat hweag-habihi su.

¹⁶An nebe nohoruk kahimu re, sum kain anggwe sako on orohole amu-amu on o Mesir en on fam hulilipdoho doale fehi,

¹⁷An den amben angge watuk kwit, mur mel, endana mel, e unduk mit on mel, ware fehi.

¹⁸Anggere yoho hup aure nambiek omako bugdoho neg nohoruk kwit dag-dag atuk men nenobam en sekan dimisi.

¹⁹An nahun de olma wereg fug, at ketia kwebene yatma lauk.

²⁰At de uang humdoho walug laha anggere somban biren iya fam de olma waruhu fug,” ulug hweag-utuk katsi.

²¹Airoho ulug hwe anyo en ele ahalue en nimi ai enda oko bule belabe fesi.

²²Airoho disimu re ap sauwe anyo enda furoho wenggeluk fug angge, wam sapi watuk mu walug lauk kwit kumbi lit haukmu lauk hag, ne ap morue on enobahet unggum og-esahuk ulug fouk debelug sabu hetdoho og eneplug laukmu lauk omano hagdoho lasi;

²³Il misig fam neg eta suwe darulug sabu yepdeg fil kwik lauk hag nimi sawe ai dog enda fologdoho watsi mu, enda hambuk hasi fug ai fam de oluk anyo alemaroho fahat dasi.

²⁴Ai fahet de nomaliki, an nele su holiek. Komo ale humdoho etma furoho ebereg lamek.

²⁵Homi aireg on ai en hera henebil lahup hayog, ne, henenda og-henebuhup hayog, de hit en at oho herarik la fug.

²⁶Hwe ai en ap abirangge eneluk siahapdoho neg fesesi. Mun elehap debesesi on de wenahauk fug alereg.

²⁷At obam lahup halug de, waramuhuk en ulug kwe horog on wak lauhup ai.