Read Ninia Yali AMSAL 8 Bible Online

AMSAL 8 - Ninia Yali bible

AMSAL 8

¹ Enda wenggeleg on en hwi ril laukmu, enggat on en ele anyo leg hauk ai holiek.

²At de duk-duk fene mel kobokwe elan kwe etma mel, kwe handohwal duruk kwe etma mel unduhuk wereg.

³Fak lehet oho on sokolma mel, o kota kurukmu kwema etma mel, etman ele uruk on holduk.

⁴Aren uruk kwit de, “Yaho hit ap homi henobam an den hwiruruk kahi; henebe hundomog o kwenangma welahep on, an den henelugap deberuk kahi on fureberuk kamek.

⁵Hit owan henepeleg deg lahep on de heneluk enggat atuk on mamulduk kamek, hit sohou on de furobahat-dauk ale melalduk kamek.

⁶An den nele uruk kahi on etma re mun along deg lit higitdoho on uruk kahimu re an den uruk kahi ale etma fureberuk kamek.

⁷An den uruk kahi on abiranggere demdoho on neg, an de sei-sei ale wene[4] etma re mundoho nalitno deg lahi.

⁸Wene an den uruk kahi ale etma re abirangge bekitdoho neg uruk kahi, dem misig oho eke dahandoho eheg kwasikdoho eheg uruk kahi fug.

⁹It ap hebeleg on en an nawene ai demdoho boruk, ap furebelug duruk on en de nawene etma higitdoho boruk.

¹⁰Perak wirik on onggo re maben hag famen, an den nawene komo etma along deg boruk kamek, emas ebe on de maben hag famen an den henelugap deberuk kahi on neg de along deg boruk kamek.

¹¹Helep berlian onggo along on ai sebeleg famen an nenda enggat ai neg de along deg lahi, haren di angge nenda boruk kahen angge nim ilit ha fug alereg.

¹²An de enggat ai welahi; ne an nobam neg de eneluk atuk on oho, menggeleg neg duruk on oho, enenda wereg on oho wereg neg.

¹³TUHAN along bolug duruk on de enolok fam duruk ale enerim boruk, an de winik wonok uruk on mel enonggwareg enewonok atuk on ai mel nerim enepuk kahi. An de enobabut hape on mel, enele sei-sei ale uruk on mel nerim deg lahi.

¹⁴Di wene su wene fureboukwag ulug an den neg ename feseruk kahi. Ne, an nebe fam oho duruk kahi neg. An nabe hebeleg on nim, nomamne on nim welahi.

¹⁵Ap raja en ap homi melal-enepuk kamag ulug let-enepuk kahi, it ap enalong wereg de wene dipdoho duruk on neg leho foruk kamag ulug let-enepuk kahi.

¹⁶An den duruk kahi fam de it ap yain-kain mel, enunggul unuk wereg enap mel en, fanoroho melal-enebeheg, diroho duruk on neg leho feheg, duruk etma.

¹⁷It an nobam enendareg on de an den nenda hundig enepuk kahi; an hera-napuk on de an hweag-nabuhup.

¹⁸An fam de munangge manangge fouk deg lit neg welahi, enalong boruk on mel, enangge sigdoho[5] hwelauk on mel wereg neg.

¹⁹Hit an famen hwelahup angge aire emas doleleng deg on hag anggere fug, perak wirik on hag ohore fug, ai omane humon hwelahup.

²⁰An de kobokwe dipdoho duruk on fene lauk kahi, an de kwe bekitdoho on fam lauk kahi.

²¹Ap an enenda napuk on de an den dungap debehuk, An den at obam olma munangge manangge en hoporebehuk.

²² TUHAN en an de kirim-keram wal-napsi on, An de o endam walhilmu etma Aren waldoho nobahabag on welahi.

²³Kwenang wal-duk fug angge wereg lit an atam dam wal-napsi, an de di on su on indip owan wal-duk eleg eleg kweleg wal-napsi

²⁴Ik humdoho yenggeleg on oma wal-am fug kweleg an dam endag-atihik, ik eleruk-eleruk etma fululukdoho wilibik waharuk eleg kweleg endag-atihik.

²⁵Dom-dom oma owan unduhuk fouk eleg kweleg, duk-duk oma owan foruk eleg kweleg andag endag-atihik.

²⁶TUHAN en kwenang oma inim enggelangge lei oma nim wal-duruk eleg kweleg, ne kwenang keram on lohoumdoho wal-duk eleg kweleg an dam endag-atihik.

²⁷O bohol diahandoho forukmu nim, bohol apmane ik laut emberim fene kolo kwe oma foruk li em nim,

²⁸Ai en TUHAN en hena koloma feheg, ik laut indip omano huseheg, durukmu an nil welatihik.

²⁹Ai debelug Aren ik laut huli-huli wereg on dahandoho lahaik wam no ulug hweag-utuk li, ne kwenang indip oboule foruk li em de an oho etma welatihik.

³⁰An de At aluluk amloho enda hundig ondoho welatihik, nukoho hundig handig an de At enda ahayeg angge on[6] atuk katihik, hundig an At il hanim ngwelep-ngwelep ale duruk katihin.

³¹An de At anggwenang emberimmu nahayegdoho welatihik, ap homi enesahalimu etma nahayegdoho welatihik.

³²Ai fahet de hit ap sauwe on anyo en an nele holiek, diroho diyug airoho diyug uruk kahi ale furoho duruk kamuhup halug hat ambiangma fano aruhun.

³³Wene komo su walug de henenda wereg on amuk, hiren wene etma seram ap debouk fug.

³⁴Ap homi an nele holduk on mel, nukoho hundig-hundig an nobam sokolma hwerieg lit nangno napuk on mel, ne an welahimu en fak lehet sokolma kahal nusug lit wereg on mel de enahayeg boruk kamag.

³⁵Ap sa en an nebe hwelauk halug oluk mundoho wereg on hwelauk, ne TUHAN en enda ahayeg at fam foruk karuhu.

³⁶Ap eke an nebe hwelauk eleg halug onggwareg en alemat-dauk; it ap an enerim napuk on de waratuk on enenda hundig duruk,” ulug uruk ebag.