Read Ninia Yali AMSAL 9 Bible Online

AMSAL 9 - Ninia Yali bible

AMSAL 9

¹Ap enggat en de o wiri fesireg e lang owag sabiren lahapsi.

²Wiri fesireg soni esetuk on fahet de wam waroho feheg anggur bereloho ahaik ap yohwan enepuk on fahet ikwag fam hwenanggoho feheg disi.

³Airebelug hwelani amingming on omano fam de o kota kwe obale lehoma etma lalug hum ngairik lakiek ulug mon-enepsi.

⁴Hwiruruk kwit, “Hat duruk ale hapeleg on ai enggat on akit suma ma!” ulug hweag-esakiyug. Ne, it furoho wenggelduk eleg on fam, a enggat en uruk kwit,

⁵“Watlug siburu nenggeg, anggur ahaik beteroho hwenangge fehi angge oma nenggeg, dik ma.

⁶Hat morue deg lahen ale etma embesein, hat holuk fanoroho wereg laruhun anggere ap furoho duruk on en duruk ale etma higitdoho duruk kamin,” ulug iyug.

⁷Ap eke hweag-utuk ale erim boruk halug, ap ai fam siag alereg on etma unug umuk, unug utuk mu aren unda yag habuhu lit deg. Ne, ap eke olok on fam komo-duhun men de aren hat bilip hapuk karuhu lit deg.

⁸Ap eke hweag-utuk ale erim boruk on fahet hat holok duk fug, airoho duhunmen de aren hat erim hapuk karuhu. Famen ap enenda wenggeleg on fam neg de haren at fam siag deg ale hweag-uruhun halug leho hobahaku lit deg.

⁹Ap enenda wenggeleg on haren komo duhun halug de, at eke nim alongdoho enda wenggeleg on aruhu. Ne, ap Allah fam neg dip deg on komo-duhun halug, oluk atuk alere eke nim humdoho oluk aruhu.

¹⁰ Ap enenda wenggeleg on amukoho halug, kirim-keram de TUHAN fam along bolug akol boruk karuhu. Ne, haren lahe At Mun Amu Eneg wereg on anyo holuk atuk halug de furebelug duruk ale hwealauk karuhun.

¹¹Enggat on ai en de hat hebe umur yatdoho wereg on og-huruhu.

¹²Enggat on hat foroho laruhun halug de ambiangma hat fano atuk karuhun famen, enggat atuk on ai herim en domako embesehun halug de honggwareg alemat-dauk karuhun.

¹³Moruwe deg ale aire homi di ale su ale duruk ale apaleg deg lit enggali ha fug angge ele awerahap siagdoho il noruk on hag deg.

¹⁴At obale re, o kota fak lehet sokolma ane, ite onggwareg obam fak lehet sokolma ane etma neg hwerieg lit wereg.

¹⁵Etman de ap kwema lauk on wol enebeheg, ap enendama bekitdoho neg duruk on enenda weheg, duruk kwit de diroho uruk,

¹⁶“Yaho hit duruk ale henapeleg on etma suma manik!” uruk. Ne, it ap enenda wenggeleg eleg angge duruk on fam aren uruk kwit,

¹⁷“Ik heraho on aire unduk de mit deg, ne, herag-herag angge nauk on aire alongdoho unduk neg deg,” ulug hweag-esauk.

¹⁸It hwe ai en wol-enepukmu lauk on etma re hwe ai ambilik elma angge atuk anyo enapelegdoho laukmu etman enebe nal aik lauk; ne it foma hwe ai obam kwik lausa on de ketia re enebe ap homi waratlug laukmu etmano aik lausareg wereg.