Read Ninia Yali PENGKHOTBAH 1 Bible Online

PENGKHOTBAH 1 - Ninia Yali bible

PENGKHOTBAH 1

¹Hun Daud amloho Wene Wenggelni Daud obalma raja Yerusalem inatfag on anyo en wene uruk katfag ale wenggeloho febag on buku au fam baleg wereg.

²Hun Wene Wenggelni ai en ele diroho ebag: Abit ale oma re ahilig eleg ale alemaroho neg wereg! Eneluk wereg aire indip wereg fug mu we alemaroho wereg.

³Nit neneluk yatdoho wereg lit yabuk lisagdoho wutuk kahe famen de ai ambiangman nit nenawonog atuk kahe on de?

⁴Nenomaliki keron endag-atuk kwit atam on eleg atuk famen, kwenangma deg ale re mundoho eitog neg wereg.

⁵Mo lahabik waheg, obuk ik laheg dulug, obam songdoho obalma sombandoho lalug nikangge lahabik waharuk.

⁶Hol selatan fil firulug lalug utara fil warik lauk, at kwani-kwani uruk katlug, sombandoho lauk.

⁷Ik eleruk wiliplug lauk on de laut fam neg kwelabik lauk, famen laut fam ik en hopo uruk fug. Ik anyo sombandoho elerukmu lalug fobik wiliplug lauk.

⁸Abirangge airoho duruk on etma re ko nenepuk famen diroho ko nenepuk uk fug alereg. Nit ninil oho fu hauk-hauk homo nenobaharuk fug; nenesanggo oho holduk-holduk homo deberuk fug neg.

⁹Eke atsi mu hauhuk ale omano eke nim atuk karuhu. Durukmu hauhuk ale anyo fobik eke nim durukmu hauk kahe. Ma re o kwenangma suma mun keron eke wereg fug neg.

¹⁰Ap homi en enele uruk kwit, “Hakin daure kerale duruk”, uruk famen aire nit owan endag-atuk eleg kweleg etma atuk katfag ale neg.

¹¹Ap homi en endam mundoho atfag ale etma ebetuk kamuhup fug. Ai hagdoho re di ale su ale ketia atuk on mel, fobik aruhu on mel, etma it ap fobik welamuhup on en de ebetuk kamuhup fug.

¹²An Wene Wenggelni, nebe raja o Yerusalem fam etma ap homi Israel on melal-enepuk katihik.

¹³Airoho wereg lit an den nenda wenggeleg fam furebelug o kwenangma suma atuk ale indip bilinggimin berihik. Allah en nit fobik amuhup ale ulug nit fahet fouk debebag on de mun nahummu siagdoho deg.

¹⁴Ap homi kwenangma on oman duruk alere an den mundoho esauihikdeg welahi. Dem beiyek, abirangge airoho duruk on etma re alemaroho hol mutlug lauk hag duruk.

¹⁵Ebe eleg kweleg wenahauk fug alereg, ne kwasik deg on de bekitdoho hwale fouk fug alereg.

¹⁶ An den boruk kwit, “An sure ap melal-enepuk on mun nalong deg lit enggat hebeleg on welahi, ne an noluk deg lahi ale etma mundoho re ap raja an inam fug kweleg o Yerusalem inatswareg melal-enepuk katswa on etma mun sebeleg kweleg an neg de mun along on welahi,” berihik.

¹⁷Ai fam de an den boruk kwit ap homi enggat atuk ale nim morue deg ale nim aham deg on mel, ne enenda wenggeleg wereg ale nim enenda sohoureg ale nim etma aham deg faham deg ale noluk amag ulug herarimin berihik. Famen eleg en de an sure hol mutlug lauk on hag deg lahi oma re berihik.

¹⁸Aire nit nenenda enggat atuk ale humdoho deg famen de nenenda firatuk ale humdoho atuk neg. Nit nenoluk atuk ale humdoho atuk famen de anggin-fanggin humdoho nenobam atuk.