Read Ninia Yali PENGKHOTBAH 10 Bible Online

PENGKHOTBAH 10 - Ninia Yali bible

PENGKHOTBAH 10

¹Sobon misig wareg angge amben en de woliom misig elma ahalue amben fano hwenanggeg angge omano siahap deberuk, anyo hag morue ale dorangge en de enggat on leho wereg ale anyo elehap debouk alereg.

²Ap hebeleg on en enenda wereg ale duruk kweleg, ap morue on en kwasik ale duruk aire duk aleroho.

³Morue deg ale anyo re ap enebut duruk fam enam atuk ai, Ap homi abirangge fam de at ebe sohoureg ale anyo ename feseruk.

⁴Hat ap along wereg on en bet habuhu halug de, yabuk duruk kahi on embesik kohon ulug heng duk fug. Hat siag dirihin ale humdeg kweleg famen, nambiken dirihik boruk kwit, hape bok atlug, nangno hauk halug de ai duhun on anyo eleho fohu.

⁵Siag ale eke humdoho kwenangma wereg ma hauihik on su, aire ap enalong wereg on en dahan angge duruk ale ai.

⁶Ap morue on de enebe yabuk durukmu leho on fam lahabe feseruk, kweleg ai en ap atam on anyo re eke hwelauk fug.

⁷Eke an den hauk men de amingming on omano kuda fam huratlug lauk kweleg, ap enunggul unuk kaindeg famen kwenang kwe amingming angge en hagdoho lauk katswa.

⁸ Ap eke en bohwele habul dahu halug, onggwareg at etma obuk uhu; ap eke en fak lehet fam dung duhu halug kisu olok on en senggelik kuhu.

⁹Ap eke en helep fele durukmu etma yabuk duruk halug de helep fam dung duhureg yebil waruhu, ap eke en e belang durukmu yebildoho waruhu.

¹⁰Henggarok hobuk deg kweleg matuk kahen fug halug, hat hebe yabuk de homamne fam fuk-fakdoho wutuk karuhun. Wenggelduk ebe on ai fam de, wene duhuk ale ulug dam wenggeloho feiyug.

¹¹Kisu hwal ale fam il wareg eleg kweleg atam senggel enepuk halug; ap kisu hwal ale fam il watuk on aire we alemaroho deg lam alereg.

¹²Ap hebeleg on ele uruk em de leho foruk; famen de ap sohou on de onggwareg ele ambiangman eleg atuk.

¹³At ele uruk kwit de ket-kerale on en dam indip duruk, famen ambiangma re ap sirim duruk on enele hag matuk.

¹⁴Demdoho ap morue on en de ele humdoho matuk, fobik welamuhuk li re nit abirangge fahet mun heraho. Nit nenebe eleg amuhukdeg duhuk ale fahet ap misig eke diroho aruhu ulug uk fug alereg.

¹⁵We ap morue on en neg de kobokwe at obam lauk on apeleg, at de kel wat-da fug angge yabuk omamne fam wutuk.

¹⁶O kwenang eke raja ap ket sauwe on wereg halug, ne ap kaindeg at autsi re hup hundig soni osoko yunggulduk halug de namelmel deg.

¹⁷O kwenang ap raja along wereg on wereg obam halug, ne it ap kaindeg oho nauk ale re we nauk li em etano neg nauk halug, ne siomo duruk ale enerim deg lit ohwale fahat-dauk halug de enenda yuag deg.

¹⁸O onggwa fanoroho sale foruk fug halug de yendeg deg laruhu, ai ambiangman de onggwareg ko fam de o ai filik duruk karuhu.

¹⁹Soni osohoman de ap unda yatuk angge, anggur ahaik nauk men de ap enahayeg ap kwelap enebeheg duruk; famen de etma onggo balukwag ulug de uang anggoloreg neg.

²⁰Hat hendaman famen oho re raja abug baluk fug, ne hat honggwareg hobam nohorukmu en oho re ap dungon halitno enebuk fug. Hat airoho duruk men de suwe misig en hol-halug, it ap haren enabug uruk on etmano fam hweag-esa lahu lam no.