Read Ninia Yali PENGKHOTBAH 11 Bible Online

PENGKHOTBAH 11 - Ninia Yali bible

PENGKHOTBAH 11

¹Hauang de o kwenang dag fil etma haren duruk ale fam fahat da lakiyug. Airoho fahat dahun halug de fobik ambiangma ekenim dopnoroho hwelahun lit deg.

²Wene anggin on owan aik wam fug kweleg, Di ale su ale duruk on fam hat ha uang indip debeil lakiyug. Ke on eke fam duhuk ulug de di kwe su kwe humdoho herariyug. Ap en fik-fouk deg wereg ale aire fano.

³E aire orohole ke fil dukom duruk halug de, e ebe ying-aik lauk mu etma neg yinggig. Hena fam ik yohwareg lit mun hoporeg halug de, kwenangma osit alongdoho wambik waharuk.

⁴Ap eke hol mel o orohole mun fano amag ulug nangno duruk halug de, aren a yareheg, ne anggen yihig baleheg duhu fug.

⁵Allah en di angge su angge humdoho wal-debag, ne ap homi en de Aren duruk ale etma furebouk fug alereg. Ai hagdoho re ap homi en de homi enahummu omalik wereg on ai mel, ap oluk wereg on etma log atuk ale ai mel furebouk fug alereg.

⁶Hubanggo bok am fug, anggen haren on de hubet deg kweleg a folduk nu. Nit de a ke on en ebe fanoroho feheluhu ai nenapeleg deg ma, ite ebe birenet fanoroho neg wilip aruhu ane.

⁷Mo asinandi kwelabik waharuk kwit fanoap durukmu ap en yit-dauk kwit de mun enahayeg atuk.

⁸Hat hebe umur eke nim dopno hobaharuk halug de dang-duruk kamin. Ai famen de hat hebe o kwenangma suma anunuroho welaruhun famen horog hareg kweleg, waratlug laukmu etma wereg laruhun ale neg de mun anunuroho. Degma re ke on fahet enenda ebereg welam alereg? Abirangge etma re we alemaroho neg deg.

⁹Nimi sauwe on su sauwereg li eta hobam fanoroho hauk kamin! Hebe elaha sauwe ma etare hahayeg humdoho boruk nu. Hat hendaman wenggelduk ale etma re dipdoho neg duruk kamin, ne henda ahe laharuk ale etma higitdoho neg duruk kamin. Famen haren duruk kahen ale etma, Allah en fobik katukdoho ayo wit-habuhu ale ai ebet hakiyug.

¹⁰Hat hebe sauwe li em welahe ale etare il misig am neg eleg aruhu lit deg, anggere henda fituk kahen ale mel, hobam anggin hauk kahen ale etma mel muko wilibi feseruk kamin.