Read Ninia Yali PENGKHOTBAH 12 Bible Online

PENGKHOTBAH 12 - Ninia Yali bible

PENGKHOTBAH 12

¹Hebe sauwereg lahen li eta ne tahun anggin-fanggin hoporoho omano owan hobam aik waharuk eleg kweleg, At Wal-hapsi on anyo ebet hauk kamin. Eta li em haren uruk kwit, “An nebe noluk sure fanoroho welahi fug,” uhun lit deg.

²Li ai salim horog aik waruhu mu re hil mum-mam uhumu, mo ombagbag oho kun aheg ne bigalem sohwalanggen inim il mum aheg duhu. Hena heik debelug osit belabik waharuk on de, howarukoho waharuk on hag deg laruhu.

³Henggik elek-elek angge durukmu hambuk ap husug on eke welaruhu fug. Heyog ning-ning angge deg on ai omamne elegdoho elek duruk karuhun. Haeg de wutdoho wereg fug mu nauk angge sahaluk fug alereg laruhu, Hil heik-hak urukmu fu hauk ale mum-mam uruk karuhu.

⁴Kobokwe en ap homi enele amusun uruk on de hat hesanggoma we anggungga neg aik waharuk karuhu. Binggong watuk on ele mel ne di on su on anggen sahalduk angge ele mel de hol ha fug alereg laruhu. Hat hebere hanoho homogdoho nohouk fug alereg laruhu, ne suwe ele uruk on en de hat hil oluk welam ale neg duruk karuhu.

⁵Hat duk leho on fam laharuk ale hakol atuk en de, kwe dohwen-dohwen lauk karuhun. Horuk mundoho eleg aruhu mu heyog de lit-hil lauk karuhun. Ai fam de hat hendama dimin ulug boruk on mel wenggelduk ale mel omano eleg aik lauk karuhu. Nit de nenebe nenobale munmu welamuhukmu etmano laukmu, ap homi en de kwebene omano oba yareheg fong wareheg, duruk kamuhup.

⁶No perak on kumbi yihig anyo kongdoho lol heheg amu-amu aheg, lampu emas on anyo wamburuk kwit erap deheg; bohwe habuligmen ik hwenangguruk angge ahale anyo dekikdoho siag aheg, ikwag erapdoho del-fol eheg, duruk.

⁷Nenahap de fobik sombandoho kwenangma kwenang ahe atuk. Sat niren on nenelugap nenepuk on ai sombandoho Allah akit lauk. Aire Aren neg enda fano en we og-nesasi angge deg ma airoho atuk.

⁸An den uruk kwit, demdoho abirangge etma re we alemaroho neg, abirangge etma we hesangge ale ebe diroho fahet ulug wereg fug boruk kahi.

⁹Wene Wenggelni aire hebeleg lit enda wenggeleg neg deg ahun deg ma re eneluk atuk ale abirangge ap homi mundoho fam hweag-esasi. Komo ale omano mundoho indip bilinggisireg, ai demdoho a eleg a ulug abut baldil lasi.

¹⁰Aren de wene enenda aho ware feseruk on fahet hweahamin ulug amururu doho disi, famen de ele aren bale fesi on etma re we mun bekitdoho neg.

¹¹Ap hebeleg on ele etma re domuk wereleg on, ap gembala en domba hwalduk on fahet foroho anyo hag. Enele ahutdoho uruk on mel komo ale mel kabog-disi on etma re bosimanggen omamneroho deleg on hag deg. Abirangge etma re Allah, nit nenakni gembala we misig neg angge ai en og-nesauk on.

¹²Namloho wene misig ai fahet de enggatdoho welaruhun. Buku balduk ale etma re ahae fotog duk fug alereg, humdoho mamulduk kwit wauk on etma fam de enebe fam enendama mel koap enepuk angge en deg.

¹³Mundoho abirangge ai an den wil-wal hauihikdeg, ambiangma seberoho an den berihik on de ebe su. Allah en ap homi wal-nenepsi aire Allah fam nenakol boruk kwit welamag ulug deg ma we ai fahet neg deg ma re At fam hakol boruk kwit awene melaleg fam dipdoho duruk kwit welamuk.

¹⁴Nit abit en duruk kahe on mundoho Allah en ayo wiroho biling nenebuhu; siag on et fano on et, ai en heraho on et biling nenebuhu boruk kahi.