Read Ninia Yali PENGKHOTBAH 2 Bible Online

PENGKHOTBAH 2 - Ninia Yali bible

PENGKHOTBAH 2

¹An den katukdoho wenggelduk kwit fanoap dobahat damin ulug neg ke fano ale noluk atmisi ulug mutlug lahuk berihik famen de, ai ohore alemaroho neg.

²An noluk atuk kwit unda ai morue ale, enahayeg duruk ale mel aire fureg eleg alereg ma hauihik.

³An nebe hebeleg on atmin ulug nambono boruk kahi on anyo en domag naplug lauk katsi, an boruk katihik alere anggur ahaik nauk ale mel, it airoho ik nalug kabog-duruk kwe etma mel, etma an den boruk kwit de etma fano ale ap homi eneluk kwenangma horogdoho wereg lit duruk kamuhup fano boruk katihik.

⁴ Yabuk humon an den duruk kwit o an nobahet witil laheg, yabuk yaho angge, an den e anggur yareheg, e anggen nauk on di ahan su ahan yareheg dirihik.

⁶Airoho dirihikdeg yabuk yaho kwe e a yaho kwe omano ik oweruruk on fahet ik sene yenggeldihik.

⁷ An namingming on humdoho wereg etma foma re onggo fam hunditihik on foma re nobam olman endag-atswa on. Nowam de humdoho wereg it ap o Yerusalem wereg fam etma welatswa on enowam hag de fug an de mun along humdoho wereg.

⁸ An den perak, emas mel humdoho, it ap raja wereg kwe o an den sebel-enesug latihik kwe omano lauk mu nenda fano angge og-nutuk katswa angge mel, kabog-deberihik. Ne, it ap omalik suni uruk on mel hwelani malik suni uruk on mel en enasuni fam de an nahayehap kwelabe nobaharuk katswa. Nohwesi hweimohwe on etma humdoho an den nambono boruk aleroho wereg latswa.

⁹ Dik-demdoho ap Yerusalem wereg latswa on abirangge re mun sebeleg kweleg an neg de nalong humon. Enggat deg lahi ale oho mun along deg.

¹⁰An den di ale su ale fahet nenda nauk ale etano mundoho neg homoroho duruk kwit, eke nenda nauk kweleg famen sebel hauk kwit welatihik fug. An nenggik ambiangma angge hum atuk on omano fahet nawonog atuk katihik. Aire an nenggik onggo boruk katihik.

¹¹Famen de an den fureberuk kwit, yabuk duruk kahi ale mundoho nim, nenggik ambiangma ale etma nim, yabuk-yabuk etma fotog duruk ale mel, etma fahet fureberuk kwit, ai fam eke wereg fug mu hauihik. Nabiroho duruk kahi ale aire alemaroho we hol mutlug lauk anyo hag wereg berihik.

¹²Deg de di ale su ale ap raja eke en duruk on etma re at wereg eleg li it ap raja en duswa on neg. Ai en an den nenda wenggelduk kwit: Ap homi enenda wereg on atuk aire ebe nunggwe ale e, ite morue ale mel sohou ale mel aire nunggwe ale?

¹³Demdoho ebe an noluk deg famen, Enenda wereg on aire mun fano famen de sohou on aire maben deg, aire seleg fanoreg kweleg mum siag deg anyo hag.

¹⁴Ap hebeleg on en de etma fil lauk kahi ulug fu hauk famen, Ap morue on douk-douk anggeril fag-fag lauk hag, laukmu hauihik. Famen de an noluk deg de, it enobam airoho atuk on aire it abirangge higitdoho nenobam aruhu.

¹⁵Ai fam an den wenggelduk kwit, Ap morue on enobam atuk ale aire an nobam oho airoho aruhu; mu re nenda enggat ai fam eke duk fug alereg. Ai fahet an den boruk kwit enggat ai famen duk ale eke wereg fug berihik.

¹⁶Ap morue on de folo-folo enepeleg atuk, famen de ap enggat on oho re folo-folo ebet esauk kamuhup fug neg. We dil-dilen ohore nit abirangge nenobahet ebet nenesauk kamuhup fug neg. Ap enggat on et ap sohou on et de nenebe higitdoho waramuhuk.

¹⁷Ai fahet de neneluk ai ambiangma eke an nobahet wereg fug, amu on oho eleg. Abirangge ai alemaroho deg ma an de hol mutlug lauk kahi.

¹⁸Di yabuk su yabuk humdoho duruk kahi on etma an den ap an nobalma inaruhu on fam fohukmu deg ma re, an den duruk kahi on etma fam an fano ambiangma nabuhu on eke wereg fug.

¹⁹Ap ai morue on a, enggat on a, ulug deg sa oluk deg? Ai deg kweleg famen de at aire an den o kwenangma suma noluk wereg lit, nenda wenggeleg fam anggoloroho duruk kahimu ambiangma atuk on etma akni ahun aruhu. Degma re airoho duruk ale ai ohore we alemaroho neg.

²⁰Yabuk nomamneroho duruk katihik ale etma fahet de ketiare nambiken ahi boruk kahi.

²¹Ap homi en yabuk enggat deg on anyo fam nim eneluk deg fam nim enenggik buhundeg anyo fam nim, fam yabuk ambiangma eke angge hwelahuk ulug duruk kahe. Famen ambiangma en de at munangge-manangge anyo embeselug wilibuhumu, di angge su angge enggik ambiangma angge omano ap atlohon lisag wilipsi fug on anyo akni hiling aruhu. Aireg ma ai ohore alemaroho deg dip dohore fug.

²²Ap homi enoluk wereg on eta li hunduko re kwenangma suma wereg lit de yabuk humon duruk kwit anggin oho hauk kamuhup. Dehen anyo dirihik on nenggik ambiangma su ulug enawonog am alereg a?

²³ At oluk wereg lit nunggwe ale duruk on fam de obam anggin ale mel enda ouk ale mel kwelap atuk. O hup angge famen ohore enenda wenggelduk kwit de enobam hambuk uk fug ale duruk. Aireg ma re abirangge etma re we alemaroho neg deg.

²⁴ Ap homi enobahet mun fano angge eke wereg fug, famen we eneyabuk wit dalug siburu nenggeg ik nenggeg, amu ale foma deheg duruk ai. Ai ohore Allah en og-nesauk angge ulug noluk atuk.

²⁵Ap san Allah eleg angge ahayeg duruk kwit nauk kam alereg?

²⁶ Allah en de ap At endama fano ale duruk on anyo enggat atuk on nim oluk atuk on nim enahayeg atuk on nim og-esauk. Famen de ap siag duruk on de eneyabuk wiri folug enangge ambiangma en kabogdoho re Ap Allah endama fano ale duruk on fam og-esowag ulug debeseruk. Aireg ma re abirangge etma re we alemaroho hol mutlug lauk hag deg.