Read Ninia Yali PENGKHOTBAH 3 Bible Online

PENGKHOTBAH 3 - Ninia Yali bible

PENGKHOTBAH 3

¹Di ale su ale o kwenangma suma atuk ale etma re Allah en li enda wenggeloho febag aleroho atuk.

²Allah en de endag-atuk li fahet inim ne waratuk li fahet nim, a yatuk li mel, henetuk li mel eneko febag.

³Watuk ale fahet mel, hiling atuk ale fahet mel, meiyalduk ale fahet mel wutuk ale fahet mel li febag.

⁴Allah en de oba yatuk li mel unda yatuk li fahet mel febag, fong watuk li suni yunggulduk li mel febag.

⁵Ohwe ahun seberuruk li we wereg li oho, mako bug-bug atuk li oho enenda sebel hauk li oho febag.

⁶Allah en li hweaharuk li fahet oho longgo uruk em duruk li fahet oho febag, kabogdoho foruk salim fahet oho elehap duruk salim fahet oho febag.

⁷Dilip duruk salim fahet oho seleben duruk salim fahet oho febag, enemu enele eleg angge wereg on fahet oho, enele matuk ale fahet oho febag.

⁸Allah en de enenda hundig enepuk salim oho enerim enepuk salim oho febag, dog yapuk salim fahet oho lioloho wereg li fahet oho febag.

⁹Nit nenenggik fam duruk kahema ambiangma atuk on de nunggwangge?

¹⁰Allah en de anggin humon nit nenobam nenobahasi ale aire an noluk deg.

¹¹Aren de di ale su ale dukwag ulug li eneko neg febag. Aren de nit fobik amuhup ale fahet neneluk amag ulug nenenda boruk ale og nesebag famen de, Allah en indipmen onggombimu huli duruk ale etma fubi debehe fug halereg.

¹²Nit de we nenahayegdoho welaheg, nenoluk welamag ulug og nesebag on eiya fam di ale su ale dauk kwit wereg lahe ale eta neg, ne eke etan alongdoho wereg fug ale aire an noluk deg.

¹³Ma re niren nenasiburu nenggeg, nenahaik nenggeg, ne niren nenenggik ambiangman anggen yihig nenggeg duruk ale aire Allah en neg og-nesaukmu re airoho duruk kwit welamuhuk ai neg de fano.

¹⁴An noluk deg alere Allah en di on su on wal-debebag on etma mundoho-mundoho welaruhu. Ne, ap homi en eke obam dopno-debeheg, eke minggiri feheg, duk fug alereg. Ne, Allah en airoho duruk ale aire niren At fam nenakol bolug welamag ulug duruk.

¹⁵Ketia atuk on etma atam owan deg kweleg atfag on, fobik welaruhu on etma, endam welatfag on. Allah en de atfag on etma ekenim amag ulug debebag.

¹⁶O kwenangma suma an den hauk kahi on eke wereg on de: ekema etma katukdoho duruk on mel fanoroho duruk on mel welama etmano re enolok ale neg duruk wereg.

¹⁷An den wenggelduk kahi alere, di on su on mel di duruk su duruk mel atuk ale etma re li Allah en febag aleroho fam neg atuk mu re, Allah en ap homi siag ale duruk on et fano ale duruk on et ayo wit enebuhu.

¹⁸An den ambiangma seberoho boruk kahi alere su: Nit ap nenebe welahe on aire wam di on su on enambiangma atuk ale anyo nim de aham deg fug ale anyo Allah en unug nesauk kwit nenobabut balduk.

¹⁹Diroho suroho ulug famen ohore wam di angge su angge enambiangma atuk ale nim ap homi nenambiangma aik lauk ale nim de aham deg fug we higitdeg. Eke waratuk halug ai amu on oho waratuk. Enebe birenet de enoluk angge on deg ai fam de wam di on su on enambiangma siag aik lauk kweleg ap homi enambiangma along atuk kweleg duruk fug. Ai indip de enebe birenet de we alemaroho wereg.

²⁰It ai inindip de kwenang ahe on deg ma re, kwenang ahe on atuk. Airoho atlug de it enebe birenet de obale misigmu neg lauk.

²¹Ap heime ambol fil laharuk ne wam heime kwenang apma fil wamburuk ulug aire nit nenapeleg deg.

²²Ai fahet de an fureberuk kwit de ap homi fahet de enenggik ambiangman angge neg nauk ale eta neg we alongdoho eke wereg fug. Eta wereg kweleg eke amu on de duk fug alereg. At ebe waratlug ambiangma aruhu ale at oluk am fug alereg.