Read Ninia Yali PENGKHOTBAH 4 Bible Online

PENGKHOTBAH 4 - Ninia Yali bible

PENGKHOTBAH 4

¹Ai en eke o kwenangman katukdoho duruk eleg on etma an eke nim fureberuk kahi. Ap homi sebeloho feseruk on omano anggin hauk kwit oba yatuk famen ap homi en eke let enepuk fug. Ap enenggik omamne fam sebel enusug wereg on etman de enomamne humon fam airoho debeserukmu re, ap misig en oho eke let enepuk fug.

²Ap homi enoluk wereg on en hauk famen ohore ap homi waratswa on en enendama enahayegdoho welatswareg waratswa ale eta fahet nahummu het enepuk kahi.

³Famen de it ap owan endag-atuk eleg on etma neg de o kwenangma suman siag ale atuk on etma hauk fug mu re mun ebereho enehayeg deg.

⁴An eke noluk deg on de su, it ap homi en yabuk enomaneroho wutuk aire it inim erareg ma on etma eneyabuk ambiangma humdoho wereg ale en enehummu siag en duruk. Aire hol mutlug lauk hag we alemaroho neg duruk.

⁵Ap morue on ai eitogdoho hweriako neg wereg lit, enggik aho waroho wereg lit, siburu obok en wararuhuk ai fano ulug ebe hesangge embeselug wereg.

⁶Airoho wereg ale aire fanoreg famen de enangge dorangge wereg ma enenda hambukdoho wereg aire fano boruk kahi. Famen enenggik biren fam yabuk humdoho dil lauk aire hol mutlug lauk on hag ai.

⁷Neneluk su fam alemaroho wereg on de eke wereg.

⁸Ap eke we eyog misig on omaliki eleg angge amu wereg lit ori oho eleg angge en wereg. Airoho wereg famen aren yabuk neg omamne fam dil lauk fam de angge etman obam homoreberuk fug. Mu re aren ahayeg hauk kwit wereg ale embeselug lisag wiliboho duruk on etma re sa fahet dil lauk? Airoho duruk on etma ohore we alemaroho neg duruk ne aire enobam anggin-fanggin hauk kwit wereg ale neg.

⁹Ap misig amu wereg ai siag famen, ap biren ai mun fano. It yabuk duruk on ambiangma fano aruhu.

¹⁰Ap eke bule wamburuk halug eke en let duk alereg, famen ap misig neg deg ma bule wamburuk halug ai ap let duruk on eke wereg fug mu anggere namelmel deg.

¹¹Hup anggo ohore ap biren walinggoho nohoruk halug ahanhan enepuk, famen ap misig amu neg nohoruk halug de keroho ahanhan duk alereg, amu neg deg ma anggere?

¹²Ap enebe biren lauk halug de ap en it ininim yeik yapuk men oho enalong am alereg, famen ap misig amu lauk halug de seroho along elehap debouk alereg. Sabu henahan sapliroho soaleg on de seroho lebeg duk fug alereg.

¹³Ap kunggu on raja am alereg, ap sabu hetdoho wereg on de ap raja huratuk angge takhta fam huram alereg. Famen de ap raja ebe mun sobal atuk li em ap en komo ale hweag-utuk on etmano holuk fug angge morueroho duruk on de ap sauwe on eke ebe kunggureg famen mun enggatdeg on en deg alere horog hareg famen de at neg de mundoho nong-hongdoho am alereg.

¹⁵An den de ap kwenangma on abirangge oma fahet wenggel-hauk kwit de it mundoho enesahalimu en de ap sauwe on eke raja unduhuk fouk alereg ma hauk kwit fureberuk kahi.

¹⁶Ap homi aren melal-enepuk on etma re, ap en oho wenahauk fug aleroho am alereg, famen at ebe mundoho aik laman de aren enepuk ale etmano fahet ebet halug dang duk fug alereg. We demdoho abirangge etma re alemaroho hol mutlug lauk hag deg.

¹⁷O TUHAN Obam wirigmu lauk kwit halug de henda wenggeloho neg lakiyug. Etman mamuldaroho lauk aire fano famen de ap morue on en duruk hagdoho di on su on TUHAN obahet feik lauk ale aire siag. It aireg on ai en de siag on di fano on de di ulug aham deberuk fug.