Read Ninia Yali PENGKHOTBAH 5 Bible Online

PENGKHOTBAH 5 - Ninia Yali bible

PENGKHOTBAH 5

¹Henele owan maruk fug angge en henenda dam wenggel-halug uruk kamuk. Ne, Allah fam henele sali waroho hweag-utuk kwit de At ebe boholma wereg, ne hat hebe kwenangma wereg lit anggere fetagdoho neg uk fug. Helere aho wat-wat neg iyug.

²Enakol hum atlug de ena nim siagdoho og-hauk. Ne, enele hum-hamdoho matuk kwit de enele morue on humdoho uruk.

³Anggere haren Allah fam hele sali hweag-utlug halug de folo-folo hele uruk aleroho diyug. Aren de ap mun morueroho duruk on nim de erim deg. Ma re haren hele sali ai folo-folo dip-debeiyug.

⁴ Sali waruhun famen higitdoho dehen ha fug no sali waruhun fug ai neg de fano.

⁵Hat honggwareg hele uhun ale fam siahap dobahat dalug en honggwareg hele omamneroho imam TUHAN obahet duruk on omano fam hweag-esauk kwit, nele sali ai ket-keraleroho irihik ehen hano. Ebe nunggwe fahet Allah en hat hobam olok hobahalug Aren hat heyabuk duruk kahen on etma siahap hobahaku no?

⁶Nangginoho ulug nena humdoho wauk kahe on etma ebe atuk eleg ai hag enele humdoho matuk ale ai oho we alemaroho neg deg. Famen TUHAN fam henakol boruk kamek.

⁷Ap enalong wereg lit melal-enepuk on en ap kunggu on sebeloho feseheg, it enangge deloho hweleheg, it enobahet katukdoho debesouk eleg angge deheg, duruk halug de yande enebuk fug. Ap pegawai wereg on de enowesi enemberimmu on en enalong baloho fahat enusug, ne it enebe birenet de it enamberimmu along wereg on en enalong baloho fahat enusug.

⁸It neg fug famen raja ebe oluk wereg ale ai oho re anggen yihig balduk on fam oluk wereg.

⁹Ap uang fam neg ilmu douk deg on de, a uang higitdoho wereg bouk fug alereg; ne ap angge dungdoho wereg ale fahet neg duruk on en de onggo bal-dalug ambiangma hwelauk on fam homorebouk fug alereg. Abirangge etma re we alemaroho neg deg.

¹⁰Ap eke enggikmu angge hum atuk kwit de, ap amu on humdoho nowag ulug og-esahu. Airoho og-esaukmu re at onggwareg dohon fahat-dauk on de eleg atuk, we an dungdeg lahi anyo ulug neg olukdeg.

¹¹Ap eke yabuk duruk on en de nauk angge eleg kweleg famen de at noho homogdoho nohoku. Famen ap dungon angge humdoho wereg famen de angge omano fahet enda ebet-ebet uruk kwit de hup fano nohoruk karuhu fug.

¹²An den hauk men de o kwenangma suma re namelmel on eke misig hauk kahi: Ap eke en anggolo aruhu li fahet ulug angge di on su on kabog-dauk.

¹³Famen de, angge kabog-duruk angge anyo ebe fam anggolo ale eke atil lauk em eleg aik laukmu re at omaliki fam abinggi angge og-esahu fug.

¹⁴Nit endag-atuk kwit, nenabulukwe kohouk endag-atuhuk hag, kwenangma su embeselug wilip atuk kwit ohore nenengge niren kabog-dauk kahe angge eke hwelalug wilip amuhuk fug.

¹⁵ Aire we mundoho nenda hesilig alereg! Nit lahuk ale aire ketia nit waharuhuk ale hagdoho deg ma, niren sat miroho hol fahet mutlug lauk kahe ale etma re, ambiangma nunggwangge hwelahuk en ulug?

¹⁶Nit neneluk wereg lit de, mum deg kwe fag-fag angge dil laheg, nit nenenda fituk kwit heradeheg, nenolok deheg, nenenda ouk deheg, duruk kahe.

¹⁷Ai fam de an fubi deberuk kwit de, nit Allah en we il misig welamag ulug og nesasimu oma wereg lit de nenasiburu nenggeg, nenahaik nenggeg, neneyabuk dauk kahe on en ambiangma hweleheg, duruk kamuhuk ale aire, niren duk alere aireg on eta deg ma airoho dauk kamuhup fano.

¹⁸Ap eke angge Allah en og-utuk angge fam enggik wereg atuk mu hwelauk kwit, at airoho dung amag ulug og-utuk mu hwelauk kwit aire, at de enggik werehap debesi ale ai fahet Allah dang duruk karuhu. Ai ohore Allah en neg og nesauk on.

¹⁹Allah en ap ai endama ahayehap debesimu at noluk horogdoho di keroho welaruhuk ulug enda wenggel-hauk fug.