Read Ninia Yali PENGKHOTBAH 6 Bible Online

PENGKHOTBAH 6 - Ninia Yali bible

PENGKHOTBAH 6

¹Ap homi kwenangma suma dipdoho duruk elegma enobam anggin kwelabe feseruk hag durukmu an den nil esauk kahi.

²Allah en ap homi eke enenggik dungap debeseheg, enalong on welamag ulug debeseheg, angge di angge su angge ap misig eke fam og ereheg, deberukmu re at enda nauk angge etmano mundoho neg wereg. Famen Allah en de ap anyo og-utuk angge etmano nenggeg-wenggeg dukwag ulug debeseruk fug. Ite ap amuon At apeleg on en angge etmano nowag ulug debeseruk. Mu re abirangge etma re we alemaroho nahummu siag ale neg atuk.

³Ap eke omaliki enebe seratus en wereg ma oluk yatdoho wereg lit umur yat atsi famen ohore, at endama ahayegdoho welam fug angge ne ebe oho saldukmu fanoma sale fouk fug angge durukmu, an den boruk kahi alere, omalik fou ket endag-atuk kwit waratuk aire fano famen de, ap ai wereg alere mun siagdoho.

⁴Omalik fou ai fahet de at endag-aruhu a, eleg a, ulug wene wereg fug, at mumdeg ma laukmu re folo-folo enapeleg atuk.

⁵At o seleg owan hasi fug mu, ne aren noluk wereg ale diroho ulug furebouk fug angge at ebe obam bik-bokdoho yinggig wereg.

⁶Aire mun fano, ap oluk wereg kweleg dua ratus tahun disi famen obam fanoroho eke welatsi fug mu angge. Enebe birenet de o misigmu higit deg ma lauk fug a?

⁷Ap homi en yabuk wutuk aire nauk on fahet wutuk famen de, homo deberuk ale eke wereg fug.

⁸Aireg ma, ap hebeleg on nim ap morue on nim ilit ha man de ap hebeleg on hwelahup anggere nunggwangge? Nunggwe fahet ulug ap kunggu on ap homi enesalahimu en abut fanoroho wereg?

⁹Abirangge aire alemaroho neg we hol mutlug lauk anyo hag deg ma, mun fanore hum-hamdoho hwelela ulug mutlug lauk ale etma embeselug, nit nenenggikmu wereg angge et higitdeg boruk kamuhuk fano.

¹⁰Di angge su angge ketia wereg angge etma re o endam oho welatsi angge. Ap eke omamne on fahet at airoho deg ulug uk fug alereg ale aire nit nenoluk deg.

¹¹Aren ele airoho neg uruk kwit welaman de aren ele uruk on omano ebe di fahet ulug ambiangma am fug alereg, ne eke aren ambiangma eke hwela fug alereg.

¹²Nenebe we il horog angge neg wereg lit ebe ambiangma eleg ale fahet weregman we apunag baloho lauk hagdoho lauk on eta fam de ebe di on fano ulug keroho enoluk am alereg? Ne, at ebe eleg atuk kweleg fobik o kwenangma suma aruhu ale ulug keroho oluk am alereg?