Read Ninia Yali PENGKHOTBAH 7 Bible Online

PENGKHOTBAH 7 - Ninia Yali bible

PENGKHOTBAH 7

¹ Ahalue amben fano on onggo leho on ai hareg famen, enenuk abug uruk ai neg mun leho wereg; ne nukoho enam atuk salim ai ha famen, waratuk salim ai neg de mun fano.

²Soni esetuk mu lauk ai ha famen, fong watuk obam lauk ai fano. Aire waratuk on ai en ap homi enebe hundomog nangno enepuk, ulug wenggel-hauk kamul.

³Unda yatuk ale ai ha famen enehummu siag duruk ale ai mun fano. Orohole hesiloho wereg liren de enda healeg wereg ai fano.

⁴Ap morue on en de enahayeg boruk ale anyo neg mutlug lauk famen de; ap hebeleg on en waratuk ale anyo fahet neg wenggel-hauk kwit wereg.

⁵Ap wenggeleg on en bet enepuk aire fano, ne ap furebuk fug alereg on en mot-enepuk ale ai hareg.

⁶Enggelangge alog on indok en han nauk kwit aplohok uruk hag, ap morue on en unda ai alemaroho yatuk.

⁷Ap hebeleg on en seiale uruk halug aren duruk ale aire morue ale duruk; ap en uang enenggik apmane herako wauk halug obabut siag atuk.

⁸Wene keram uruk ai fano fug famen, fobik uruk ai fano; enawonog atuk ale ai siag famen sebele fahat-dauk kwit wereg ai fano.

⁹Ap morue on en enehummu ahe endama heraho lit wereg ma; enolok folo-folo laharuk ai siag.

¹⁰Hiren hein wauk kwit, Nunggwelug o endam etma fanoreg latsi, ne ketia siag? ulug uk fug. Aire ap sohou on en airoho hein og-enepuk.

¹¹Ap enoluk wereg on aire enggat on welamuhup ai fano. Enggat atuk on aire enabinggi angge hwelauk on nim higitdeg.

¹²Aire uang enahap wendarangge og-esauk on anyo hag deg. Ne, enggat on aire mun leho angge en deg! Ne, at ai indip ahun de ahap wendareg welaruhu.

¹³Allah eyabuk duruk ale anyo furoho wenggel-hauk kamek. Allah en kwasikap deberuk on anyo ap san bekirap debouk alereg?

¹⁴Anggere hat hobam fano ale eke atuk mu halug de hahayeg boruk kamin. Famen hat anggin ale hobam atuk halug de, Allah en neg birenet og-hutuk anyo hapeleg am fug. Nit de fobik aruhu ale aire keroho aruhu nenapeleg welahe.

¹⁵An noluk de we alemaroho hag welahi famen an nebe noluk wereg li em eke durukmu hauk kahi alere su: Ap eke obam siag duk fug angge wereg famen ap ebe on omano waratuk. Ne, eke ap kwasikdoho neg duruk on at ebe siag neg duruk famen de ebe oluk yatdoho wereg.

¹⁶Mun fano ale neg oho fug, ne mun wenggeleg ale neg oho fug. Enonggwareg en wat-dauk ai fam ambiangma nanggin atuk?

¹⁷Henolok hum ale oho fug ne sohou mireg ale oho fug. Obahatman li higit atuk eleg kweleg waramuhuk ai nunggwe ulug no?

¹⁸Wene birenet etan ohwal dakiyug. Nit Allah fam nenakol boruk halug de, ambiangma fano dil lauk kamuhuk.

¹⁹Enggat on ai en de onggwareg ahun anyo mun leho on deberuk, ap o kota misig on fam enalong wereg enap numen wereg famen ohore ap enggat on ai neg de mun leho.

²⁰Kwenangma suma re ap mun fano higit on eke wereg fug; mun fano ale neg duruk kwit siag mun apeleg on eke wereg fug.

²¹Hat ling-long ale wene etma holduk ale hambono boruk kam fug. Ap misig obahet duruk on en hat hururung hapuk on aire sa oluk deg.

²²Ap amu on oho haren hururung debesirihin ale aire hat honggwareg oho holuk deg.

²³Abirangge aire an den nenda enggat fam abut bale ferihik, famen de an den enggat atuk on ai heraruruk kahimen de enggat atuk on ai yaratuk mu hauihik.

²⁴Sa en oluk indip au diroho deg ulug hweahauk alereg? Ai mun ilonggoma deg ma furebuk fug alereg!

²⁵Famen an den noluk amag ulug on herareheg, domogdoho mamuleheg duruk kahi. Enggat on hweleheg, ne hein og-napuk on onggo eheg duruk karuhuk en ulug duruk kahi. An den noluk on fam wal hauk kwit, siag aire morue alereg, ne enolok fam duruk ale aire dimin ulug wenggelug duruk on.

²⁶An hauihik on de waratuk on ha famen hwe neg de mun ale on wereg. Homi enenda naukmu duruk ale aire sabu yep duruk on mel sum ahe yihig mel fam luhutuk angge on hag deg. Aren mako bug esauk on etma re sabu en bug-bag esaukmu hag deg. Ne, ap Allah enda boruk ale duruk on de yepdeg ma ai en ohwal atuk famen de ap siag duruk on de elma yohwat aruhu.

²⁷At Wene Wenggelni en uruk ale furiek: Abirangge etma re an den il misig-misig onggo hweahamin ulug heraruruk men hweaharihik.

²⁸Ne, foma onggo heraruruk kwit neg welahi famen, higit am fug ale atuk. Ap enebe seribu en sahalimu en de ap misig an den along boruk kahi on eke hweaharihik. Famen it enesahalimu etman hwe eke an den along boruk on eke wereg ma hauihik fug.

²⁹We su neg an noluk atihik: Allah en de nit we seroho eitog aleroho buhun disi. Famen de nit nenonggwareg en di ale su ale melaloho kabog-duruk kwit da kwani ya kwani duruk kahe.