Read Ninia Yali PENGKHOTBAH 8 Bible Online

PENGKHOTBAH 8 - Ninia Yali bible

PENGKHOTBAH 8

¹Ap wenggeleg neg duruk on de ahayeg neg hauk, aren de di wene su wene fahet onggo uruk ale oluk deg. Enda enggat deg fam de ahayeg en nim-num urukmu, hundig-hundig orohole fam healeg lit neg wereg.

²Raja en wene melal-henepuk halug furoho neg wauk kamek, ne hiren Allah fam henele sali hesangge waruk fug.

³At raja en de di ale su ale etma aren enda boruk ale neg duruk karuhu anggere aren hit fam enda ahayeg boruk eleg halug de ohwaloho yatma lakiyug.

⁴Raja en along-balongdoho di ale su ale re durukmu re, enakol eleg angge ele sahaleg ale eke duruk kam fug alereg.

⁵Ap at ele holoho duruk on de akol elegdoho lombuk welaruhu, ap hebeleg on en de nunggwe li em ne nangginoho raja ele holduk ulug ai oluk deg.

⁶Di ale su ale duruk on omano fahet de di li em suli em humdoho wereg; famen de niren we dorangge neg fureberuk kahe.

⁷Ebe ke on aruhu ulug nangno enepuk on aire ap misig en oho oluk deg fug, ne fobik aruhu on fahet diroho aruhu ulug de ap eke en uk fug alereg.

⁸Ap misig eke en waratuk on bok ap debeheg, hihili feheg, duk fug alereg. Aire ap homi abirangge en enabiroho hauk alereg ma re atmisi fug ulug uk fug alereg. We seiale wene fam ulug oho ne hwenaroho ulug famen oho, waratuk on ai fam en ohwaloho la fug alereg.

⁹Etma abirangge re an den o kwenangma suma atuk ale fahet fureberuk men hauihik. Eke li em ap enalong wereg on en enalong anyo fam it ori inim wereg on etmano alema re feseruk katsi.

¹⁰Ap kwasik duruk on waratuk mu sal enepuk mu etmano saldukmu esauihik. Famen ap salik lausa on etmano sombandoho enobam lauk kwit, ap anyo en o kota wereg li kwasikdoho disi ale omano leho feil lauk katswa. Aireg ma re ai oho we alemaroho neg.

¹¹Nunggwe fahet ap homi en enambong seroho siag ale duruk? Aire unggum folo-folo og-esauk eleg ai en duruk.

¹²Ap siag neg duruk on en siag indip seratus en dil lauk men oho at ebe oluk umur yatdoho wereg. Famen de ap Allah fahet enakol boruk on halug de oluk fano enahayegdoho welamuhup.

¹³Ahamdoho re ap kwasik ale duruk on de anggin-fanggin humdoho hauk kamuhup. At ebe oluk wereg on de ahohwe baloho eleg atuk hagdoho folo-folo eleg aruhu. At ebe fobik umur owan sauwe deg kweleg wararuhu, aire aren akni TUHAN fam dipdeg eleg ai fam sauwe angge wararuhu.

¹⁴Famen abirangge etma re we seiale neg wereg, kwenangma suma nunggwe ale aruhu ulug kumu hauk kamek. Ap demdoho neg wereg on ap siag ale duswa on hagdoho unggum og-esauk, ne ap eke mun olok hasimeg neg duruk on de ap demdoho neg duruk on hagdoho debeseruk. Mu re airoho we alemaroho neg duruk.

¹⁵Wene ambiangma seberohore ap en we enahayeg neg boruk kamuhup ai. Aire at ebe o kwenangma suma wereg lit, enahayeg amu ale eke wereg fug we enasiburu nenggeg, enahaik nenggeg enahayeg deheg, duruk ale eta neg. Oluk Allah og-itsi on eta fam wereg lit de, aren duruk angge etmano fam en we eta neg hauk kwit welaruhu.

¹⁶Ai en de an de di ale su ale kwenangma suma atuk ale etma fureberuk ale fahet enggat on og-nomag ulug deheg, ne o kwenangma suma enolok fam duruk ale etma furebeheg, dimin ulug duruk men de an den fureberihik on de, nit kel wat-da fug angge nukoho hundig hup hundig di on su on duruk kwit neg welahe,

¹⁷ne Allah en duruk ale aire niren neneluk am fug alereg. Niren nenebiroho hera dehe ha man ohore furebehe ha fug alereg. Ap hebeleg on en noluk deg ulug fag-duruk famen apeleg deg kweleg famen uruk.