Read Ninia Yali PENGKHOTBAH 9 Bible Online

PENGKHOTBAH 9 - Ninia Yali bible

PENGKHOTBAH 9

¹Abirangge deg ale ai an den indip bilinggoho wenggel-hauk kahi. Allah en de ap fano on mel ap wenggeleg neg duruk on mel, fahet enoluk hwaloho fesebag. Aire iren enerim duruk kweleg famen oho enenda hundig duruk famen oho airoho debesebag. Ne, fobik diroho aruhu ulug de ap misig en oho eke oluk deg fug.

²Demdoho ap abit angge enebut de higitdoho neg amuhup: Ap bekitdoho duruk on oho, ap demdoho on oho, ap buhun on oho ap emereg on oho, ap obahet foruk on oho, eleg on oho higit neg deg. Ap fano duruk on fahet leho kweleg ap siag duruk on sebeleg fug, ap hombuk balduk on oho re ap hombuk balduk eleg on hag deg.

³Aireg ma re enebe abirangge enebut higitdoho neg enobam fesesi, ai ohore o kwenangma suma di on su on atuk ale airoho mun nenda hesilig aleroho neg deg. Ap homi enoluk wereg li em etma re ap homi enendama re siag on en neg hoporeg, ne iren wenggelduk on de mun morue ale neg wenggelduk. Airoho deg latlug de fetagdoho eta neg at ebe waratuk.

⁴Famen de enebe fam enaheime wereg li em etare, nenoluk eke nim welahe ha alereg. No singa famen waratuk halug de mondabi waratuk neg, famen mene oluk wereg on neg de oluk welam alereg.

⁵Ap homi eneluk wereg on aire waramuhup en wereg ulug de enoluk deg lamuhup fano, ne it ap waratswa on anyo en de di on su on de enapeleg. Ap aireg on aire at fahet onggo ulug oho enggik ambiangma ulug oho obahet wereg fug, ne at unuk oho re ap homi en enapeleg atuk.

⁶Ahayeg duruk ale mel olok duruk ale mel enda ahe laharuk ale mel ai mundoho ebe nim waratuk. O kwenangma suma atuk ale fam etma, aren duk ale eke wereg fug.

⁷Anggere nauk on nauk kwit hahayeg duruk kamin, ne hahaik anggur ahaik nauk kwit hawonog atuk kamin. Allah en de ai duruk on fahet anggin deg boruk fug, ite Aren ai fano duruk boruk.

⁸Di on su on duruk kwit horohole healoho hahayeg deg lamin.

⁹Hebe holuk Allah en o kwenangma suma og-hitsi on fam we alemaroho welahen on eta wereg lit de, hohwe hambono boruk on nim hahayegdoho welamin. Ebe siag deg kweleg famen de, haren duruk on ambiangma re we eta neg airoho deg ma re nauk-wauk kamin.

¹⁰Heyabuk og-hitsi mu anyo henggik omamneroho duruk kamin. Fobik wenggelduk on mel yabuk duruk on mel welaruhu fug. Ap homi waratlug laukmu etman de di ale su ale enoluk atuk on indip mel, enggat atuk on mel wereg fug, ne hat hebe re etma at lahun.

¹¹Kwenangma suma an den eke atuk mu hauihik on eke wereg: an dam hat dam duruk on anyo fam ap folo-folo buroho neg lauk on anyo neg onggo hwelauk fug, ne weim yapuk kwit oho re ap enomamne on neg enalong atuk fug. Ne, ap enenda wenggeleg on en de it eneyabuk durukmu hweag-dauk neg fug, ne ap hebeleg on en de aren hundig angge di on su on kabog-dauk fug. Ne, eke ap enoluk enap neg di ap su ap en enoluk deg fug, aire ap nangginig enap ai deg kweleg it enobam siag ale aik wam ale neg deg.

¹²Li di salim higit aruhu ulug ap homi enapelegdoho wereg. Suwe yepdeg ma luhut aheg, ikan sum belabeg angge fam yohwat aheg duruk hag ap homi enobam oho enapeleg deg kweleg, ne di salim aruhu ulug wong deg kweleg anggin on enobam aik waharuk.

¹³Ombolim su re ilit angge misig eke ebe fik-furoho ap homi en enggat atuk ale ai along boruk on fahet:

¹⁴O kota misig doron fam ap homi we dorangge wereg latswa. Nukoho eke salim ap raja humon wahail lauk kwit kota ai enowarik kwimin ulug wahasi. Wahasireg de aren kota anyo walinggulug de fak lehet houag esalug kwimin ulug fik-fouk disi.

¹⁵O kota ai fam ap enggik eleg on eke enggat on wereg latsi. Mu aren kota ai ahap wendaruk alereg famen at ebe enggik eleg on deg ma aren disi ale anyo ambiangma ulug wenggelswa fug ne ap misig en ulug oho at furebeswa fug.

¹⁶Mu re an den boruk kwit enggat atuk on aire enomamnereg on nim higit deg fug mun along deg. Airoho deg famen ap enggik eleg on ai enggat deg ale anyo furebeswa fug ai. Ne, at ele isi on oho fubi debeswa fug neg.

¹⁷Mun fano re ap indip oluk ahun eke en ele dohwendoho uruk on ai holuhup halug fano famen ap sohou on neg kabog-duhupmu ap along wereg ahun en ele hum fam urukmu holuhup on aire maben deg.

¹⁸Sehen dog ai sebeleg famen de enenenda enggat atuk on ai along deg, famen siag on dorangge en de ahoe waruk belanga misig kwelabeg siahap duk alereg.