Read Ninia Yali KIDUNG AGUNG 1 Bible Online

KIDUNG AGUNG 1 - Ninia Yali bible

KIDUNG AGUNG 1

¹ Suni leho on Salomo en felalfag on

²Hat hambilik en an dopdoho dang neakin; haren henda hundig napuk kahen on etare anggur ahaik naukmu unduk sebeleg famen mun alongdoho duruk kahen!

³Hat hamben mun fano ale sang-fang uruk, hunuk de ahalue amben fano on hililoho wamburukmu amben duruk hag deg lahen; ai fam hwelani duhum en enenda nauk!

⁴Raja nakni folo-foloroho neg din, an og-naplug ambe hat hebe nohoruk kahenma etma kwin. Hat fahet nit mundoho en nenahayeg duruk kahe, henda hundig duruk kahen on aire anggur ahaik maben deg famen ai neg mun lehoma re, hwelani duhum en hat hobam sukaleroho enenda nauk!

⁵Hwelani Yerusalem hwelani, an nebe sing deg lit il aluli buhundeg lahi; an nebere o Kedar fam kemah salegma sing deg hag deg lahi, famen o Salomo obam olma ambe hulireg on buhundeg etma hag deg lahi!

⁶Mo en nahap han weraho on etma fahet, ahap sing deg ulug fu-nobahauk fug. An nowesi en bet-napuk kwit, anggur yabukmu yabuk dukwag ulug mingming napukmu re, an nebe buhun-dauk kwit wereg ale fahet nukoho eke wereg fug mu deg lahi.

⁷Nenda hundig on, hat de hebe o kema domba hwal-enepuk kahen, ne o hupmu atuk mu re it enebe kema yinggi feseruk kahen, furoho hweag-nimin? An de ap homi dag watuk on hag, hat hori enowam domba enesahali kwe etma noruk katmin a?

⁸Hwele it homi enesahalimu en mun ebe on deg lahen on, obale re hat hapeleg deg lahen a? Domba uluk etma eneyog obale kwe lalug, it ap gembala en enobam sabo saloho wereg ma etman horogma etma hangge kambing, domba mel hwal-enepuk kamin.

⁹Nenda hundig on, hat de no kuda hwe on, raja Mesir en on kereta lisulug waharuk angge anyo hag deg lahen.

¹⁰Horoholanggen de owil angge boreg on etma sahalimu en buhun-bahan deg lahen, hanggolobag de siong permata on wandeg laheg ai fam il buhundeg.

¹¹Niren hat halili angge emas on hat hobahet buhun hobaharuk kahe, ne hasiong perak on nim buhun hobaharuk kahe.

¹²An nowe raja at nohoruk angge fam yinggig wereg ma re, an nangge ahalue narwastu amben sang-fang uruk.

¹³An nenda hundig on ai an namigmu ying-atuk mu re, no mur amben duruk hagdoho amben duruk.

¹⁴Nenda hundig on aire o En-Gedi anggur yabukmu en, owil angge unuk pacar lohwaleg hag deg.

¹⁵Mun hebe buhundeg lit hil aluli buhundeg lahen on, hat de mun buhun-bahan deg lahen! Hat hil de suwe bel il hag deg lahen.

¹⁶Helaheg, hat oho hebe re sauwe ebe on, dik-demdoho anggere mun ebe on welahen. Nit nenebe nohorukmu re enggelangge hesilig on fam etma.

¹⁷E lak de nit nenobam owag lahap atuk, ne e lak re dum ahan wit-atuk.