Read Ninia Yali KIDUNG AGUNG 2 Bible Online

KIDUNG AGUNG 2 - Ninia Yali bible

KIDUNG AGUNG 2

¹An de mawar owil angge o Saron on deg lahi, An de no bakung owil fanggong kwe deg hag deg lahi.

²Alog-alog angge sahalimu bakung owil wereg hagdoho, An nenda hundig on ai ohore it hwelani enesahalimu airoho wereg.

³Ohweimu en e sahalimu e apel wilibig hagdoho, An nenda hundig on ai ohore ap omalik enesahalimu airoho wereg. An de at apma lombog ik kuruk ale fahet nahayeg deg lahi, ne anggen yihig on de unduk mit deg.

⁴Aren an og-naplug ambe soni esetuk on fam lasi, aren an enda nauk on ename foruk.

⁵Anggur anggen mitdeg on etman nomamneap nobahain, An de hat fam nenda naukmu ouk hauk kwit, e apel anggen fam seap nobahain.

⁶Enggik hware fil en nunggul leho nobaharuk, Enggik bekit fil en nebe mako bug-nobaharuk.

⁷Hwelani o Yerusalem hwelani, enda mulug duruk on aire, kwe bale fouk fug angge weregman neg at homorebeiyug ulug, hiren o leimu etma no rusa mel, kijang mel unuk fam hombuk baliek.

⁸Holiek, an nenda hundig on anyo waharuk angge! At ebere no rusa mel kijang mel omalik en duruk ale hag deg. Dom kwe etma hweik sombo lahapuk, duk-duk fene etma hweik solog duruk. Furiek, at ebere fak lehet oho on alukwe fil etma unduhuk wereg, il en wauk kwit, jendela fololeg elekwe en ben duruk.

¹⁰An nenda hundig on anyo en an nobam ele uruk angge holiek. Hat hebe buhun on lakohon ma, hat hebe ebe on ninim laul en walen!

¹¹Osit sanim deg on mundoho bal-aha angge furin, o muru deg on mundoho oko laha angge hakin.

¹²Yabuk wiroho yaho kwe omano owil angge mundoho feheleheik; owil angge balduk li em mundoho horog aik waha; ne suwe muluk ele nit neneyabukmu en uruk.

¹³E ara anggen yihiruk ale indip disi, ne e anggur owil hum-hamdoho yihisi. Hat hebe buhun on, hat hebe ebe on lakohon ma.

¹⁴Hat de an nasuwe bel helep elekwe on hag deg lahen, ne dom il bulereg kwe herag atuk on hag deg lahen, Horohole il aluli deg lit hele mun buhundeg lahenma, an den hat horohole heeheg, ne hele holeheg, dimin.

¹⁵No olomene hag on etman de nit neneyabuk anggur yabuk omano siahap duruk on angge, olomene dot-doron etma seneriek.

¹⁶At nenda hundig on aire an nonggwareg nangge, ne an de at onggwareg angge on. At ebe hubet hol fi ha waharuk on en mum deg on anyo firoho eleho fouk eleg kweleg,

¹⁷no bakung owil angge sahali kwe etma andomba hwal-enepuk kwit neg wereg. An nenda hundig on, hebere no kijang mel rusa omalik mel dom Beter fam etman deg hagdoho deg lahenma re manu.