Read Ninia Yali KIDUNG AGUNG 3 Bible Online

KIDUNG AGUNG 3 - Ninia Yali bible

KIDUNG AGUNG 3

¹O hup anggo an nebe nohoruk kahimu en, an den na og-hauk kwit de an nenda hundig on anyo heraruruk kahi famen de we alemaroho neg duruk kahi.

²Airoho duruk kwit an nebe inatlug o kota kwe maseroho lauk kwit, kobokwe fene mel, eneyog obalereg kwe mel mundoho yami nowag atuk kahi. An den nenda anggen on herarauk kahi famen we alemaroho neg atuk.

³Airoho duruk men ap hup anggo o kota kahaleg wereg on ninim ambi atlug, an den it fam hein og-esauk kwit, “Hit de an nenda anggen ai eke hehep a?”

⁴Ulug hein og-esalug, it enebe etano embeselug lalug duruk men, an nenda anggen anyo hweag-dihi. Hweag-dihireg an sen-dalug o fotog ha fug angge neg hondoholug de, o an nisinga obam ambe at an endag-napsi on akit lauk kahi.

⁵Hwelani Yerusalem hwelani, hiren de nit kwe bal-nenebuk fug angge neg duruk men at ebe fam homorebeiyug, ulug hiren no rusa mel no kijang mel o lei kwe wereg on, etma enunuk fam hombuk baliek.

⁶O iliangge lei fil en hobu mondoko lahabeg hagdoho, waharuk angge aire nunggwangge no? Amben de no mur amben mel, kemenyan amben mel, ne it onggo wauk on en enahap fene ambendoho ulug areruruk angge amben hag duruk.

⁷Furiek, aire at Salomo en o beahan fam wirig angge fam waharukmu, Israel enap en ap sehen anggen enap, ne enebe sehen anggen on de enam puluh en angge waharuk,

⁸it etare dog yapuk alere mun wil-wal deg enap neg. It enebe re o hup anggo enowarik kurukmu kahaldul ulug, enahauwagma karog ahunggwa elma kwelaboho wereg.

⁹At Salomo onggwareg fahet hweria atuk mu bearulug lauk angge, e mun ebe on fam wit-dasi.

¹⁰Owag de perak on fam wirig, ne ambol dimi anggere emas on fam wirig. At ebe hweriegma re orohole ungu on fam deg, aire hwelani duhum o Yerusalem on en enenda enahayeg fam yihusa angge.

¹¹Yaho, o Sion hwelani, henebe wilibik watlug, hun Raja Salomo isingan at ebe ohwe og-utuk salim, ite at ahayeg hauk salim mahkota bug debesi angge bugdoho wereg ai fu hakiek.