Read Ninia Yali KIDUNG AGUNG 4 Bible Online

KIDUNG AGUNG 4 - Ninia Yali bible

KIDUNG AGUNG 4

¹Hat de hebe mun buhun-bahan deg lit ebereg lahen, demdoho hat de hil aluli buhundoho deg lahen. Hat hil sum yanggulig lahen on ai foma fil etma re suwe bel hag deg lahen; Hat horuk de, kambing uluk esan o Gilead duk fene wamburukmu hag deg lahen.

²Haeg ilireg lahen alere domba uluk enoruk ket bale folug, kume ware forukmu ili-fea uruk hag deg lahen; Domba biren omalik wutdeg hagdoho wut deg ma, misig eke langgoreg fug.

³Hambilik de sabu mebon misig hag deg ma, hambilik mun ebeahun deg. Horoholanggen de e delima anggen biren belang deberukmu hag deg ma, sum yanggulig lahen on ilonggoma heraho wereg.

⁴Hanggolobag de hun Daud en asehen fahat daukmu fahet, helep huhulowag witsi on anyo hag deg. Hasiong de dog bei angge seribu en hag, ne ap sehen foroho on enowesi en enendomuk hag deg lahen.

⁵Hag de no rusa omalik biren angge hag deg lahen, ne no kijang omalik biren omalik on owil angge bakung sahali kwe enggelangge naukmu hag deg lahen.

⁶Airoho deg lahenma an de, dom mur fam lele, ne duk kemenyan fam lele boruk kahi. Airoho lil lauk em hol hubet on fi ha waharuk kwit, o mum wereg on anyo firulug lelep boruk kahi.

⁷Hebe mun buhun on, hat de mun hil alulireg lahen, hat hebe fam il siagdoho eke deg lahen fug.

⁸An den momal-husug lahi on, nit de o Libanon en wambukohon. Nit de duk Amana unggulmu en, duk Senir mel, Hermon mel anggolopma, no olomene olok on unuk macan tutul mel singa mel wereg ma etman wambukohon.

⁹Naut momaleg lahi on, hat hebere mundoho nendama leberuruk aleroho deg lahen, Haren hil fu-neauk kahen on eta fam en nim, ne hasiong wan-duruk kahen on eta fam inim en nenda lisuruk.

¹⁰Naut momaleg lahi on, hat nim nenenda nauk ale etare mun unduk ebereg, anggur ahaik unduk maben hag deg famen, ai neg de along deg. Haren ahulue aroruruk kahen on amben sang-fang urukmu, di angge su angge amben angge etma maben hag deg kweleg ai neg de along deg.

¹¹Ninim momaleg lahe on, hat hele uruk kahen on etma re, ahoe mel, kin ahalue ebe on mel maben hag deg kweleg, hat hele neg mun mit deg. Hat hasum wan-duruk kahen on de Dom Libanon amben hag deg.

¹²An nenda hundig on aire yabuk ap hesangge kuk no ulug hukdoho yaho on hag deg lahen, helep lehet wiroho, ik eleruk sok kelog lareg ma ap amu on husuk fug hag deg lahen.

¹³Airoho deg ma etma e delima wilibigmu, anggen unduk ebe on neg yiko suknig. Owil angge pacar mel amben fano on narwastu mel,

¹⁴narwastu mel, kunyit mel, e kami hag on mel, el mel, ne e hendali hag on kemenyan amu-amu on mel wilibig wereg. Mur mel gaharu mel, di on su on amben-amben angge mun ebe on neg wereg.

¹⁵An neyabukmu etman de ik eleruk oluk wereg on, o Libanon en wilibik waharuk!

¹⁶Hol utara fil inatlug ma, hol selatan fil en ma! Firuruk kwit an neyabuk wirig kwe etma furikma, airoho dimihin fam amben neg saha-faha ukwagdoho. Airoho dil lauk em an nenda hundig on anyo at eyabukmu etma watlug, ahan anggen unduk ebe on etma na watmisi lamag.