Read Ninia Yali KIDUNG AGUNG 5 Bible Online

KIDUNG AGUNG 5 - Ninia Yali bible

KIDUNG AGUNG 5

¹Naut momal-husug lahi on, an de neyabukmu etmano waharuk kahi, watlug de mur mel, amben-amben angge fano on mel kabog-debelug; An den kin ahura mel, ahalue mel nenggeg, ahoe mel, anggur ahaik mel nenggeg, duruk kahi. Siburu nenggeg, ik nenggeg, duruk kamek nehebi, airoho nauk men neg de hit henamolmol henepmisimu ap siomo duruk on hag duluhup.

²An nebe nohoruk kahi famen nenda re noluk welahi. Holiek, an nenda hundig on anyo en sok kweng duruk angge. Naut nenda hundig on, nasuwe bel hag on, nendaman mun mot-hapuk kahi on; Nunggul lil en nowareheikma owereg, noruk fene re o hup anggo henangginggi en nowareheik anggereg.

³An nebe sum mundoho nonggole fehireg welahi; mu re nikangge wan-dihi halereg a? Neyog mundoho omarihimu, nikangge singe fehi ha alereg a?

⁴An nenda hundig on anyo en sok kelog ayo sene feheikma, an nendama mulug-malag eheik.

⁵Airoho deheikma re an nebe noluk inahireg, an nenda hundig on fahet sok hut-enebihi. An nenggik sehelet fene en de mur ahalue durulug wamburuk kwit, sok kelog hilinggig on fene aroreheik.

⁶An den nenda hundig on anyo fahet sok hut-enebihi famen, at ebe ambol sombandoho laha ma. An de at ele uruk on holmin ulug nenda beg-beg uruk kwit, herarihi famen we alemaroho neg dihi. At unuk hwirihi famen, aren ele onggo hweag-nereheik fug.

⁷Airoho deheikma an de ap o hupanggo o kota kahaleg wereg on mel ambi ahereg; iren yeik nowaroho nahap bale nobahakesareg, nasum sambunig lahi on anyo enomamne hasimeg hwelehesa.

⁸Yaho, o Yerusalem hwelani, hiren lahe an nenda hundig on ai hinim ambi atlug halug de, at de endama siag ahareg ouk wauk ulug, hweag-umuluhup en sali wat-nemek.

⁹Hwele hebe duhum ebe hahaloho su, hat henda hundig on aire it foma re maben deg kweleg at neg nangginig on? Hat henda hundig on aire it fomane maben hag deg kweleg at neg along deg en, nit nenobam sali wat-nemek ulug hweag-nesauk kahen a?

¹⁰An nenda hundig on aire ap enebe sepuluh ribu en enesahalimu en at neg ebe buhun-bahan deg lit hebel-febel deg.

¹¹At unggul de emas mun ebe on hag deg, oruk de ik funag-lenggag angge duruk hag deg ma, sing elemik deg.

¹²Il de suwe bel ik elerukmu en hag deg, suwe bel ahoe fam kume watlug ik sene yenggeleg on elanma hwerieg wereg ma hag deg.

¹³Oroholanggen de yabuk amben-amben angge fahet wirig on hag deg, ne ambilik de owil angge bakung en mur ebe on liloho belapuk on hag deg.

¹⁴Enggik de buhundeg lit sehene emas on mel permata on mel kwelabeg, Obahare re no gaja solog hag angge helep nilam fam laloho wirig on hag deg.

¹⁵Eyog de o fesengge helep marmer kuron eyog hag deg ma, apmane re emas ebe on fam doaloho wirig on hag deg. Ebe re dom-dom Libanon fam wolongdoho lahabeg hag, e lak bololo hag deg.

¹⁶Ele mag hauk alere mun mitdeg, di ale su ale at obam deg ale etma re mun ebe ale neg deg. Yaho, o Yerusalem hwelani! An nenda hundig dauk kahi on ninim hundig lahe on aire ebe aireg on wereg.