Read Ninia Yali KIDUNG AGUNG 6 Bible Online

KIDUNG AGUNG 6 - Ninia Yali bible

KIDUNG AGUNG 6

¹Hwele hil aluli buhun on, hat henda hundig on aire kema laha? Nit hinim herarik laul en de hat henda hundig on aire kema laha?

²An nenda hundig on aire at eyabuk amben-amben angge yahoma, eyabukmu etma angge domba omano hwal-enebeheg, ne no bakung owil angge etmano baleheg dimin ulug laha.

³An nebere an nenda hundig on ai angge, ne at aire an nangge, at ebere no bakung sal kwe etma domba hwal-enepuk.

⁴Hat hebere mun buhundeg lit ebereg lahen, O Yerusalem kota buhun-bahan deg ale mel, ne o Tirza il alulireg ale mel eta hag deg lahen. Hat de ap tentara esan en bendera boreg on indipmu deg etma hag, hat hebe mun nik alereg lahen.

⁵Hat horohole fu-neauk kahenma an nenda nong-hong uruk, anggere horohole enden amin. Hat horuk de no kambing uluk lohwaleg angge, O Gilead dukmu en wambik waharukmu hag deg lahen.

⁶Hat haeg de no domba uluk oruk ket bale folug kume ware forukmu kut deg eta hag deg lahen; domba biren omalik on hagdoho mun wut deg ma, misig ulug oho eke longgo uk fug alereg.

⁷Horoholanggen de no delima anggen biren belangdoho, hunggul sal angge ilonggoma herahoma hag deg lahen.

⁸Homi ap raja enohwesi enebe enam puluh en wereg famen oho, ne hweimohe on enebe 80 en wereg famen oho, ne hwelani duhum hum-hamdoho wereg famen ohore,

⁹an nendama heraho lahi on nasuwe bel aire we misig neg, isinga en ahaloho we misig neg angge ai. Hwelani duhum en inil halug at mot-duruk, ne raja ohwe en mel, ohwesi hweimohe on en mel ohore at fahet inil along deberuk.

¹⁰O sekan duruk hagdoho mel, ne bigalem funureg ma deg hagdoho mel, mo yahoma deg hagdoho mel aire sa waharuk no? At de ap tentara esan bendera boreg on apma waharukmu, deg hagdoho at ebe nik aleroho deg.

¹¹An de no hendahe yabukmu wahireg, o fanggong kwe etma owil mumung deg on hil ha wahi; e anggur etmano owil mundoho mumung deg ane, e delima etmano mundoho owil yihig ane.

¹²An de ap en kereta dog yapil lauk on fam laharuk ale fahet it ap enunggul unuk wereg enap nim en nonoureg eta hag, haren henda hundig napuk ale fahet mun ebereg lahi.

¹³Yaho, hwelani Sulam hwelani, henebe siriek, niren yande henepuk kamukohon de maseriek. An ap homi kumu napuk on sahalimu en yunggulduk kweleg, hiren nunggwelug an kumu napuk kamluhup no?