Read Ninia Yali KIDUNG AGUNG 7 Bible Online

KIDUNG AGUNG 7 - Ninia Yali bible

KIDUNG AGUNG 7

¹Hwele hil, aluli buhun on su, hat de mundoho nik alereg lahen, heyog no sandal wandeg lahen on etare mun ebe alereg lahen. Haho butuk deg on etare il fanoroho ulug boruruk on hag deg, ne ap di on su on hwesesengge oko lalduk on en deberuk angge hag deg.

²Hanum de ik hwenanggeg angge abung-abang on wereg ma hag, anggur ahaik aham-fahamdoho hwenanggeg angge elegam fugdoho wereg hag deg. Hahum de no gandum anggen baleg kabog lahabegma hag deg, no bakung owil angge en maseroho kwelabeg hag deg lahen.

³Hag de no rusa omalik biren angge mel, no kijang biren omalik on en deg hag mel deg lahen.

⁴Hanggolobag de no gajah asolog on fam fesengge wiroho lahabeg hag deg lahen, ne hil de o Hesybon fam ik bohwe, o Batrabim sokole horogma habuligmu hag deg lahen. Hambiang de o Libanon Dom fam etma ap fu-enepukmu fahet ulug wiroho lahabeg angge menara o kota Damsyik fil alukwe hwaleg angge anyo hag deg lahen.

⁵Hunggul de Duk Karmel hag; Horuk feyaloho-feyaloho deberuk kahen on etare no sum bolu wareg yihig hag deg ma, ap raja famen ohore enda wa hag deg lahen.

⁶Hat de mundoho hil aluli buhundeg lahen, mundoho enahayeg boruk on enesahalimu en mun nenda hundig on.

⁷Hebere e kurma obahare faroho lahabeg hag deg lahen, hag de e ai anggen yihig hag deg lahen.

⁸Airoho deg ma e kurma ai fene lahalereg, anggen etma dahan dele boruk kahi. Hat hag de e anggur anggen yihig on hag deg lamuk, haren sat duruk kahen on de e apel anggen amben hag deg lamuk,

⁹hambilik de anggur ahaik mit deg hag deg lamuk! Anggur etma hwaloho re an nenda hundig on ai akit, bale fouk fug angge neg lauk kamag; Airoho lauk kwit ap nohoruk on fam famen ohore, it enebe fam enamolmol dik lauk kamag.

¹⁰An de nenda hundig on ai angge, aren de an fahet mun endareg.

¹¹Nenda hundig on, nit de o leimu laul deg, yabukmu etma owil angge pacar sahalimu etma nohweik lakohon.

¹²Nit de hubetdoho yabukmu laul deg, e anggur omano mundoho owil mumung deg a, ne owil mundoho fehelsi ane; ne e delima ohore owil mundoho yihisi ane ulug ha laul en ma; etman de an nenda hundig hapukmu neamihin.

¹³E arak amben de mun sang-fang uruk, nit nenobam sokolma etma re anggen unduk ebe on wereg; ket dahanoho fousa on mel endam on mel wereg; etma re an nenda hundig on ai hobahet ferihik mu wereg.