Read Ninia Yali KIDUNG AGUNG 8 Bible Online

KIDUNG AGUNG 8 - Ninia Yali bible

KIDUNG AGUNG 8

¹Yehei, hat de a nonggwareg namep, an nisinga fam ag misigmu nauhuk on deg lalenman, kwema sal-kwal ulug de horohole kwe dop helema re, ap homi en eke an enal belesim wat neelep fug.

²Hat de hebe hondog haplug an nisinga obam lelareg, haren an mamul-naplen. Hat de an den anggur amben ebe on mel, e delima anggen mel og-hetle.

³Henggik hware fil en an nebe leko fahat nusug lit, henggik bekit fil en an nebe mako bug neauk kahen.

⁴Yaho, o Yerusalem hwelani, hiren de at nenda hundig bolug duruk men neg, owan homorebouk fug kweleg kwe bal-hapul fug ulug sali wariek.

⁵O Ik inggi leimu en at enda hundig boruk fam hwenaleg lit waharuk on aire sa behep? An den hat hebe hisingan ahummu hapsireg endag hapsimu, e apel indipmu etano en elele-hobaharihik.

⁶Anggere an nebe sure hat henda hamigmu on nobahain, amu on fam eke mako bug-enebuk fug we an namu neg; enenda nauk on aire waratuk on en lit haukmu omamne deg ai hag deg ma, ne enebe ahanhan enepuk on aire waratuk on along deg ai hag deg ma. Anggere indok ambulbul nik aleroho kulung duruk ai hagdoho duruk.

⁷Ik humdoho en ohore enenda nauk on ai nahuli fouk fug alereg, ik fu waharuk kwit ohore harulug la fug alereg. Ap eke en enda nauk on ai onggo bal-damin ulug, angge mundoho og-omman ohore we enal belesim en wat-ha on neg hwela alereg.

⁸Nit de nenerek hwele misig eke wereg, at ag de we dorangge dukdeg. Ne, ap nenenda ulug nenekit waharuk halug, niren at fahet keroho dehe ha alereg?

⁹At ebe ai fak lehet wirig hag deg lalepman de, niren ai emberimmu menara perak fam witla. At ai wembit ele hag deg lalepman de, niren e lak fam kelog watla.

¹⁰An nebere fak lehet hag deg lahi, ne nag de ap lahalug fururuk angge menara hag deg lahi. An nenda hundig on ai en de, at fam nenda nahayeg deg lahi ale at oluk deg.

¹¹Salomo eyabuk anggur yabuk o Baal-Hamon etma wereg, ne aren yabuk etma re ap hwalduk on fam og-esasi. Airoho og-esasimu anggen yihig fahet it enebe domog en de uang perak on seribu en foruk.

¹²ne it enebe yabuk duruk onggo re uang dua ratus en hwelauk. Ma re Salomo ao, uang etma re hat hebe nim, it heyabukmu hwalduk enap nim fahet. Famen, yabuk anggur yabuk ai neg de, an nalukwema wereg ma re an nonggwareg nangge on.

¹³Yaho, hit yabukmu etma welahep on, it nori en hit henele hola boruk, anggere henele an nobam iyek!

¹⁴Nenda hundig on, hat hebe re no kijang hagdoho, ne no rusa omalik dom Beter fene on hagdoho manu.