Read Ninia Yali YESAYA 1 Bible Online

YESAYA 1 - Ninia Yali bible

YESAYA 1

¹ Wene sure ap homi Yehuda on it enowesi Raja Uzia mel, Yotam, Ahas mel, Hizkia mel, atam deg fobik deg unduhuk wereg lit melal-enepuk li em, Allah en it Yehuda on mel Yerusalem on mel en duhup ale ulug, Yesaya hun Amos amloho anyo fene en hweag-esowag ulug Allah en a hauk hag fam hweag-etfag.

²Hit kwenang mel bohol mel en de TUHAN ele imisi anggere furoho holiek. Aren uruk kwit, “An nomaliki nonggwareg en kul-enebeheg, melal-enebeheg, dirihik on An napma welam ale enerim en ning-ning uruk.

³Sapi en de akni onggwareg hwalduk ahun oluk deg. Ne, no keledai en de akni asiburu og-utuk mu obale foruk on oluk deg famen, An nomaliki Israel on airoho duk ale enapeleg deg. Iren fureberuk fug,” ulug isi.

⁴Hit henombasi enobabut siag on fam en ondoho lahep on henobabut mun siag lahep, siag neg duruk kwit henobabut mun nong-hong deg lahep. Hit de henesiag fam kobukdoho wamburuhup. Hiren henakni Allah mun amu eneg on apne wauk kam on anyo henambol yig-utlug de henakni TUHAN anyo nenerim ulug embeseruhupmu re alemat amuhup.

⁵Hiren Allah ebe nenerim ulug neg uruk kwit welamuhup aire nunggwelug? Hiren siag duruk kahep ai fam Allah en unggum henobam foruk on etare hareg boruk kwit fobik anggin on nenobam foukwag boruk kwit duruk kahep a? Henunggulmu re henayebil burag en neg sahareg, ne henendama mel, hiren wenggelduk on mel mundoho ouk atsi mu welahep.

⁶Henunggul owag fam en heneyog ahut huli henebe fam etma re fanoma re eke wereg fug. Hit henebe fenere firoho neg deg lit de henayebil mel, ne ket wareg mel hum alereg liren de, eleg amag ulug horeheg, ahalue folug het deheg, ne obat feheg, duruk kahep fug.

⁷Henobam di kwe su kwe mundoho elehap debelug, henobam kota re mundoho harep fisatswa ma re mun felelengdoho nasi ai. Hit hinil hanim de ap bohon en hit henanggwenang sebel deheg, di angge su angge mundoho luluhun eseheg, duswa ai.

⁸Airoho duruk kwit de we hit Yerusalem on neg henobahausa ma welahep famen de o sabo anggur yabuk ane, kuluk yabukmu ane we elamna fahet wirig ai hag, henobam kota ap en maseroho kwelabegma ape songdoho wereg on hag welahep.

⁹ Nenakni TUHAN Mun Omamne wereg on anyo en nit del-neneplep fugmen de nit nenebere ap homi o Sodom mel Gomora mel Allah en mundoho elehap enepsi ai hag elehap neneplep on welala.

¹⁰Hit ap homi Yerusalem on henowesi melal-henepuk on nim en de ap homi o Sodom Gomora on enobabut wauhup on suma re. Nenakni TUHAN en hweag-hesauk on ai furoho holug de nit nenakni Allah en wene hweag-hesauk on ai fanoroho wauk kamek.

¹¹ TUHAN en uruk kwit, “Hiren wam di angge su angge kabogdoho folug og-nutuk kahep on etma re nunggwe fahet? Hiren domba waroho yal-nutuk kahep on mel, sapi omalik asei nobaharuk kahep on ai mel, sapi yohombuk on mel, domba mel, kambing mel, amep nobaharuk kahep on etma mel an nerim boruk kwit welahi.

¹²Hiren an nobahet dul ulug watlug an nonggwareg nobam wirigmu etma heneyog sobirik kulug hesangge lag-wag uruk kwit duruk kahep on etma re san hweag-heseheikma duruk kahep?

¹³Hiren di angge su angge an nobahet nobahaul ulug walug waharuk kahep on etma re we obahareroho walug waharuk kahep. An den amben sang halug de me nape napuk. Hiren bigalem keron lahaik waharukmu kabog deheg, nukoho sabat fam kabog deheg, nukoho leho on fam kabog deheg, ne nukoho an nobahet ene folug kabog deheg, duruk kahep on etma re nerim en de kumu henusuglam ale nerim napuk. Abirangge etma re hiren siag duruk kwit duruk kahepma re An nobam angginap kwelabe nobaharuk kahepma, an den duk alere mundoho nerim aha.

¹⁵Hiren somban uruk kwit henenggik lahapuk kahep on etma re an den nil fubi-henobahauk ale nerim deg. Hiren ap homi humdoho enowatuk kahep on enamep henenggikmu wereg ai en de, hiren somban humdoho uruk kahep famen de, henele nesanggo holduk ale nerim en embeseruk kahi.

¹⁶Siag on henobam wereg on ai fanoroho buhun dakiek. Hit henobabut an nil hanim siag duruk kahep on ai embeselug fobik siag duruk kam fug.

¹⁷Henobabut fano duruk ale mamul-dauk kamek. Mamul dalug de higitdoho duruk ale omamneroho oroholeam deberuk kamek. It eke ap homi foman siahap debeseruk on etma let-eneseheg, omalik wetien on enawene kaindoho hwale feseheg, homi sohwe on enawene fahet inibil aheg, duruk kamek,” ulug isi.

¹⁸TUHAN en uruk kwit, “Hit siag duruk kahep on ai mep henenggikmu wereg ai hag unggum henobam wereg famen de an den suwe bondol oruk[1] il kutdeg hag horoho henobahakuk. Ne, siag humon deheg, anggin on deheg, duruk kahep famen de an den mun napelehapdoho henobahakuk. Mu re wene henobam wereg on ai furoho hwaldul en de an nakit manik.

¹⁹Hiren an nele holoho duruk kamuhup halug, kwenang an den og-hesauihik mu suma wereg lit, di angge su angge yag dalug de fanoroho nauk kamuhup famen,

²⁰hiren lahe an nele sahale folug duruk kamuhup halug, henebe weim fam en henowaruhup ulug An henakni TUHAN en nele mundoho ihi” ebag.

²¹Hit ap homi o Yerusalem welahep on suma. Hit henobabut endam de henebe Allah fam dipdoho welaheg, katukdoho deheg, bekitdoho deheg, duruk katuhup famen, ketia re homi uang hwelakoho hambena duruk on hag atlug duruk kahep kwe omane re ap watni en neg hwilil lausa.

²²Hit ap homi Yerusalem on endam de perak fano on hag welatuhup famen, ketia re di angge su angge enetuk kwit siag on embeseruk on hag atuhupdeg welahep. Ne, endam de anggur ahaik unduk ebe on hag welatuhup famen ketia re ik we on hag atuhupdeg welahep.

²³Hit henowesi melal-henepuk on de wene sahale folug duruk kwit de ap homi yoholi angge wauk on mel sebe ulug siag duruk ai. Airoho duruk kwit de di angge su angge we og-esaukmu hweleheg, enenggik apmane hweleheg, duruk. Airoho duruk kwit de omalik wetien on ap homi unggum biling-enepukmu etmano en unggum enobam feserukmu it inibil am fug angge embeseheg, homi sohwe inibil am fug angge embeseheg, duruk ai.

²⁴Iren airoho duruk ai fam de, nit Israel on nenakni TUHAN Allah Mun omamne wereg on anyo en uruk kwit, “Hiren an ninim seleiroho wereg lit nahummu ahe lahaukwag ulug durukmu nendama sebel hauk kwit welahi on ai an den oho onggo siahap henobahakukmu re hiren an nobam angginap kwelabe nobaharuk kamuhup fug.

²⁵Ap homi en perak siag on nim wereg ma indokma werako buhun-duruk ai hag, hiren di siag su siag duruk kahep on etma An den buhun-bahandoho henobahakuk.

²⁶O endam hit henowesi unggum bilingguruk enap hakim mel, komo enepuk enap mel welatswa ai hag, fobik ap enobabut ai on unduhuk feselug og-hesahuk. Airoho og-hesahukmu re hit ap homi Yerusalem on de dipdoho deheg, katukdoho deheg, duruk on uruk kamuhup,” ulug ebag.

²⁷TUHAN de katukdoho duruk on deg ma re aren neg hit Yerusalem on nit siag dehe ulug henenda wat-dahupmu henahap wendat-henebuhu famen,

²⁸it ap homi eke siag duruk on en At Allah apma wereg ale enerim en embeselug wilip atswa on de aren mundoho elehap debesehu.

²⁹Hiren wilibig on apne weheg, yabuk kembu dewa enobahet[2] ousa feheg, duruk katuhup on aire fobik henenggali aruhu.

³⁰Hit fobik henebe e batie enggela sawet atuk hag aheg, yabuk ik kalog hwaloho kwelabeg elegma kwenang iringgig wereg hag aheg, duhup.

³¹It eke enomamne welatswa on famen de enebe enggelangge bug on indok asinggag en harep naukmu nahaluk fug ale atuk ai hag it enonggwareg enobabut fam luluhun esahumu re ap homi ahorebouk fug ale aruhu.