Read Ninia Yali YESAYA 10 Bible Online

YESAYA 10 - Ninia Yali bible

YESAYA 10

¹Hit ap wene melaleg katukdoho duk fug on duruk kwit an nomaliki henomamne fam sebel-enusug lahep on etma re henebe alemat atuk kamek.

²Hiren airoho duruk kahep ai fam de ap homi enenggik eleg on omano it enangge on hweleheg, it enawene katukdoho bal-enebeheg, ne homi sohwe on mel omalik wetien on mel enengge del-deheg, dul ulug kwe bal-enepuk kahep.

³Airoho duruk kahep famen de nukoho Allah en hit unggum henobam fohu salim aire hiren nangginuhup? Ne, o kwenang yit-yatma etman anggin on henobam henobahaik waharuk salim aire higitdoho dehep halereg a? Hiren de sa fam let-nenebin ulug heng-uhup? Hit henangge henenggik weregdoho welahep angge etma re kema heraho fahat dahup?

⁴Hit henebe fam amuhup alere weim fam en waramuhup a, ite sabu hetdoho og-heneplug lahup ane? Reg. Famen de TUHAN ahummu olok deg ma re demdoho unggun henobam fohu.

⁵ TUHAN en uruk kwit, “Asyur aire alemat amag! Asyur aire an den it ap homi an nolok fesehukmu enobam aruhu etmano enowarukwag ulug fetnangge mel, e bayuk mel hag deg.

⁶It ap homi an nomaliki an fam enambol yig-nutlug lauk on mel, an nolokap kwelapuk on mel etma enowarukwag ulug an den Asyur mondorik waruhuk. Ne, ap homi an nunggul unuk on etma enangge huhul hweleheg, herag deheg, ne kwenang ahe koboke fene wereg ma sobit esauk hag sobit eseheg, dukwag ulug an den Asyur mondorik waruhuk,” ebag.

⁷Famen raja Asyur on ai en de it enunggul unuk humdoho etmano olok hasimeg mundoho elehap debesehuk ulug wenggeloho fesireg wereg.

⁸Aren onggwareg leho fahat-dauk kwit, ele diroho isi, “An den ap eneyabuk panglima unduhuk wereg on etma enebe re raja wereg!

⁹An den de o kota Kalno mel, Karkemis mel, Hamat mel, Arpad mel deluhukdeg, an den o Samaria fam mel Damsyik fam mel kota wereg on etma deluhuk neg.

¹⁰O Yerusalem mel Samaria mel fam kembu wereg on maben deg kweleg it kerajaan amu on fam kembu along on wiroho foroho on etma an den along elehapdoho fohuk.

¹¹O Samaria ebe mel ne o ai fam kembu wirig wereg on mel famen ohore an den mundoho luluhun esauihik. Ai dirihik hagdoho re an den o Yerusalem ebe nim ne o ai fam kembu apne wauk on etma nim mundoho luluhun esahuk neg.” Uruk.

¹²Famen TUHAN en uruk kwit, “An den Duk Sion fam mel ne o Yerusalem fam mel duruk kahi ale etma mundoho halug de, An den ap raja Asyur on ai winik-wonog uruk kwit onggwareg leho fahat-dauk ale ai fahet unggum og-uruhuk,” ebag.

¹³Raja Asyur on ele en werahap hauk kwit diroho uruk, “Abirangge etma re an nalong welahi on anyo fam duhuk. An de mundoho nenda wenggeleg on deg lit noluk humon deg lahi. Mu re an den it enunggul unuk amu on fahet huli-huli wereg on etma eleho feheg, ne iren foukdoho fahat-dauk on etma del deheg, duhuk. Ne, it enowei melal-enepuk on etma re no banten en eyog sobit esaukmu hag sobit esahuk.

¹⁴Ap homi enunggul unuk o kwenangma wereg on de suwe a wirig hag deg ma, ap en suwe anggen a fam wereg ma enenggik en ologdoho hwelauk hag, it enangge etma re we seroho neg hwelahuk. Ahwerabul en eke sambunig laruhu fug, ne eke ambilik ele areheg, ele eheg, duhu fug.” Uruk.

¹⁵Famen TUHAN en uruk kwit, “Yaha en ap akni ahun anyo sebele folug awonog am alereg a? Ne, gergaji re ap e balduk on anyo sebeleg kweleg at neg leho wereg a? E bayuk baleg en ap leheruk fug ite ap en e bayuk baleg leheruk,” ebag.

¹⁶Ap Asyur on en de enonggwareg en leho fahat dausa ma re TUHAN di ale su ale mundoho duk alereg on anyo en ap sehen seneg enap perwira ebe on etmano neg ouk anggin siag on fam unggum og-esahu. It enebe fam de ouk ahanhan angge enobam aruhu mu re indok en enahap han weratuk mu duruk hag hauk kamuhup.

¹⁷Allah mun amu eneg wereg on, it Israel on enambogbag aire indok ambulbul nukoho misig fam di angge su angge harep nauk on hag, ne alog-alog angge fam en oho harep nauk hag aruhu.

¹⁸O Asyur fam etma enggela ohwe mel, yabuk wirig mun kwenang heselig kwe mel, de ap ouk en hil-hil waratuk hag mundoho elehap debehu.

¹⁹E wilibig on de we dorangge neg wereg ma re omalik doron en oho wenahauk alereg laruhu.

²⁰Li fobik waruhu on fam de enunggul unuk Israel on en ando lil atswa on etma re it enebe wereg ale fahet ap enunggul unuk it sebel-enusug wereg lit it enebe mundoho elehap enebukoho duruk on etma fam enenda lahabeg lit welamuhup fug, ite Israel on enakni TUHAN Allah mun amu eneg on ai fam enenda lahap atlug welamuhup.

²¹Ap homi Israel on en enebe we dorangge neg de enenda Allah mun leho wereg on anyo fam aham duhup.

²² Ketia ap homi Israel on ebere ik laut elanma iliangge humdoho wereg etma hag deg famen we dorangge neg sombandoho wamuhup. TUHAN en it enobam unggum fesehu on aire mun horog aik waha. Ne, it unggum og-esahu ale aire it enobabe elekwe dipdoho elehap debesehu.

²³TUHAN di ale su ale mundoho duk alereg on anyo en o kwenang ai fam mundoho luluhun debehuk ulug isi on aire demdoho; ne aire TUHAN amu en neg duhuk ulug isimu re ahamdoho amu on duk fug alereg.

²⁴TUHAN di ale su ale mundoho duk alereg on o Sion wereg on anyo en At omaliki fam uruk kwit, “Ap homi Mesir on en hit henobam deberuk katswa hagdoho it Asyur on en hit enenggik omamne fam sebel henusug lit wereg lit anggin-fanggin on henobam foruk famen de hiren it enobam henekol enebuk fug.

²⁵Li horog eya fam de An den hit henobam nolok henobaharuk kahi on ai bale fohukdeg, An den it enebe elehapdoho fesehuk.

²⁶An TUHAN di ale su ale mundoho duk ale neg deg lahi on anyo en ap homi Midian on helep unggul Oreb fam en fetnangge enowatihik hagdoho it oho fetnangge fuk-enebuhuk. Ne, Asyur on de An den Mesir on fam unggum og-esauihik hagdoho debesehuk.

²⁷Ai salim de it Asyur on en enenggik omamne fam sebel henusug wereg ma etman An den fiselaroho henobahakukmu re iren hit fahet enenggik seneg ale eke deg lamuhup,”[21] ebag.

²⁸Tentara Asyur on en de o Ayat[22] mundoho sebelik kwehesa. It enebere o Migron baloho lahesa! It kwemangge nauk on de o Mikhmas folug lahesa!

²⁹It enebe re ik dahaloho nindig-atuk mu en dahandoho lahesareg de o Geba nohoruk! Nohorukmu re ap o kota Rama on de enowag eke duruk, ne ap homi o Gibea, Raja Saul obam kota ai on de enakol en heye lahesa.

³⁰Yaho hit Galim on henele amitmit diek! Hit ap homi Laisya on henesanggo holiek! Ap homi Anatot on henele onggo iek!

³¹Ap homi o Madmena on nim Gebim on nim de o oko lakiek.

³²Yoho su salim de hit henaselei on de kota Nop fam wereg lit de iren enenggik yinggilig de Duk Sion fil kota Yerusalem fil etma mum duruk.

³³TUHAN di ale su ale mundoho duk alereg on anyo en, it de e enggik degdoho belapuk hag it enebe airoho domag esahu. It enesahalimu etman leho on mel, koloma bogdeg on mel de muhuk folug domag esahu.

³⁴It enebe re e ohweimu en yaha fam muko belapuk hag TUHAN en it airoho debesehu. It enebere e o Libanon fam etman mun nikaleroho enomamne wereg famen de daloruhup neg!