Read Ninia Yali YESAYA 11 Bible Online

YESAYA 11 - Ninia Yali bible

YESAYA 11

¹ Raja Daud ambiangma on de e muhuk foruk on hag. E ebe mutuk mu erat fam en asimit wilipuk hag de fobik Daud ambiangma on en eke raja enam aruhu.

²Airoho enam aruhu mu TUHAN aheime obam wereg lit, enda wenggeleg deg ma, enda enggat deg lit melaloho feseheg, bekitdoho neg deheg, wene katukdoho neg kong deheg, duruk kwit Allah enda ahayeg boruk ale neg duruk kwit At obam dipdoho neg welaruhu.

³At ambono alere TUHAN ele holoho neg duruk ale ai duruk karuhu, Aren de il misigam neg fu halug wene katukdoho bilinggeheg, ite ap en uruk hol halug bilinggeheg, duruk karuhu fug.

⁴ Ap kunggu on de katukdoho neg ayo wit-enepuk karuhu, ap enamu en da fug alereg on de bekitdoho inibil atuk, karuhu. Ap siag duruk on de at ele mingming fam unggum og-esauk kamuhup, ne ap enolok fam duruk on de mundoho enowatuk karuhu.

⁵ Di ale su ale duruk kwit de, aren katukdoho deheg, dipdoho deheg, duruk karuhu.

⁶ Olomene serigala re domba nim seberoho welamuhup, no macan tutul de kambing aluluk yinggig laruhu. Sapi omalik de no singa omalik nim enggelangge[23] misigmu nauk kamuhup, airoho naukmu re omalik doron en hondog-eneplug lauk karuhu.

⁷Sapi re no beruang nim seberoho enggelangge nauk kamuhup, omalik de misigmu yinggig lamuhup. Singa en de enggelangge iringgig on no sapi nauk hagdoho nauk karuhu.

⁸Omalik fou on en kisu aeg kamol wereg on aluluk dot-dotor ale duruk men oho re aeg en balduk karuhu fug.

⁹ Duk Sion Allah anduk amu eneg on ai fam de, enolok ale duruk on mel, siahap ale duruk on mel, welaruhu fug. O kwenang ai fam de Allah enoluk atuk ale neg de, ik en laut ahum hopo deberuk hag, hoporeg laruhu.

¹⁰ Li andigim aik waruhu salim ap misig Raja Daud ambiangma on eke re di ap su ap en enorohole at fam welaruhu. Iren de at akit watlug, at ebe wereg ma fahet mit-motdoho lahabe foruk kamuhup.

¹¹Nukoho ai salim de TUHAN en At omamne fam omaliki ando foma o Asyur mel Mesir mel, o Patros kwenang kwe mel, Sudan mel, Elam mel, Babel mel, Hamat mel, ne ik alo anggen yat kwe en mel, og-eneplug sombandoho waruhu.

¹²TUHAN en de bendera misig eke di ap su ap fahet lahabe fohu. Aire Aren enunggul unuk Israel nim Yehuda nim o kwenang ambiang-ambiang del-fol deg on etmano kabogdoho og-eneplug waharuk ulug eneg angge fohu.

¹³Kerajaan Israel on en de Yehuda on fam il mahipdoho kumu hauk karuhu fug. Ne, Yehuda on en de Israel on nim seleireg lamuhup fug.

¹⁴It enebe misig seberoho re ap Filistin enap barat fil wereg enap fam dog sinalik kulug de, enunggul unuk timur fil wereg on deloho walug waharuk kamuhup. Iren de enunggul unuk Edom on mel, Moab on mel sebeloho fesehup, ne enunggul unuk Amon on de it enapma sebe uhup.

¹⁵ TUHAN en de ikalog humon Suez anyo iringgi fohu. Aren hol ahanhan on fi ha waruhu mu re Ik Efrat anyo re ag sabiren angge il horog angge deg aruhu, ne ap en ik dahalduk kwit de eneyog hulilip deg angge bugdoho dahalduk kamuhup.

¹⁶At omaliki ando wereg on fahet, Israel on o Mesir en wiliplug waharuk li em kobokwe welatsi hag, it Asyur en wilibik wamag ulug kwe humon yaho laruhu.