Read Ninia Yali YESAYA 13 Bible Online

YESAYA 13 - Ninia Yali bible

YESAYA 13

¹ Allah en ap Babel on fam debesehuk ale ulug hweag-esowag ulug Yesaya hun Amos amloho fam wene febag on de su:

²Duk unggul ahap deg kwe etlema suweruk lahaplug kwea duruk kwit, hele ap dog ambiangdoho yabuk enap omano fam hwiruruk kwit, kota winik-wonog uruk obam ai sokole-sokole etma bin kukwag henggik bili fein.

³TUHAN en ap At enda besi ale ai it en dukwag ulug mundoho enayonggo fesesi. It etma re enalong deg lit enenda hambuk deg ma re Aren oho it fahet ahayeg deg. TUHAN en ap At olok enobam fesesi on ai fam unggum fesoukwag ulug neg wol-enepsi.

⁴Dom fam etman ap homi kabog-duruk kwit enaplohok hagdoho enele amusun etma holiek. Ap kerajaan angge it enunggul unuk enunggul unuk angge kabog dehesareg enele amusun uruk angge holiek. TUHAN Mun Along on anyo en ap weim yapul en ulug esan lohwaleg omano il olowat enepuk.

⁵It enebe re o kwenang ambiangma yatma enap waharuk. TUHAN olok en kwenang abirangge mundoho elehap debemin ulug it ai og enebeheik deg duruk.

⁶ TUHAN di ale su ale duk ale neg deg on anyo en nukoho mundoho elehap duhu on ai mundoho horog aik waha ma re oba yatuk kamek.

⁷Ap enebe hundomog en nenenggik de mun longgo isimu eleg welahe ane nenomamne mundoho eleg atsi oma re boruk kamuhup.

⁸It enobam enakol on humon enobam aruhumu ouk humon nenek duhup onde, hwe omalik endetuk kwit ouk heinet watuk hag duhup. It mundoho enenda fit amuhupdeg enorohole mep sahaloho deg lamuhup aire enenggali en, deg lamuhup.

⁹Nukoho TUHAN en on fobik waruhu, ai salim TUHAN en olok anyo hililoho besehumu, kwenangma dog humon yabil lauk kwit elahap debesehup mu, ap hundomog siag duruk onggo elehapdoho fesehu.

¹⁰ Sohwalanggen mundoho lol heg wambik waruhu, sohwalanggen seleg duruk ale elehap debesehu, mo wilibik waharuk li em eta mumdoho fohu, bigalem seleg duhu fug.

¹¹TUHAN ele uruk kwit, “An den kwenangma siag duruk onggo, ne it enolok fam duruk on enesiag onggo unggum og-esahuk. Ap winik-wonog uruk on enebe domog sebele fesehuk, ne ap leho fahat-dauk on mel, enolok leyereg on mel An den unggum og-esahuk.

¹²Ap dit dot deg angge neg enahap wendat amuhup on etare, it emas abut baleg on etma hag de fug.

¹³An TUHAN di ale su ale duk ale neg deg lahi on anyo en nolok deg lahi ale unuhuk fohuk salim aire bohol elek deheg, kwenang ebe wereg ma etano en lang deheg, dukwag ulug debehuk

¹⁴Ap bog yatma on Babel wereg on etma an den muko del fol esahukmu di kwe su kwe enemu domog del fol uruk kwit, no rusa ap en muko longgo uruk hag, ite domba hwalduk on elegma hag enenggwenang domog longgo uhup.

¹⁵Ap sa en eke senetil lauk kwit halug de mundoho daloho ware feseruk kamuhup neg.

¹⁶It enonggwareg inil kumu enesug kweleg enomalik fou omano al berel eseheg, enobam omano deloho hweleheg, enohwesi omano enomamne fam siahap debeseheg, duruk kamuhup.”

¹⁷TUHAN ele eke diroho isi, “An den unggul unuk Madai[24] on Babel etma huhul kuruk kwit hwelowag ulug hweag-esahuk, iren kwe bei angge ulug enenggik apmane emas, perak eke og-esahup fug.

¹⁸It enesehen enandog fam de ap sauwe on mundoho enowaruhup, iren de omalik fou on enenda eseheg, omalik doron enelaheg eseheg, duhup fug.

¹⁹ Kerajaan Babel fam etman o bumbuk mun fano on it ap homi etma wereg on en enahayeg hauk obam famen de An TUHAN en o Sodom inim Gomora inim fam siahap deberihik hag debehuk.

²⁰Ap misig ulug oho etma eke welaruhu fug. Ap Arab enap dag watil noruk enap ohore enobam sabu sum fam etma sal dahup fug, ne it ap kambing, domba hwalduk enap en enggelangge nowag ulug etma og-eneplug waharuk kamuhup fug.

²¹ Obale etma fam de di angge su angge maro on neg welamuhup. Sue simusimu it enobam fene etma ena wutuk kamuhup ne suwe unta etma welamuhup. Ne, o meiyaleg omano fene re no kambing maro on en hweik solog angge duruk kamuhup.

²²O Babel bumbuk elman mel ne ap raja obam bumbuk men mel de olomene ele mel, olomene amu on unuk serigala ele mel etman anggungga uruk kamuhup. O ai siag aruhu li re mundoho horog aik waha, ne nukoho aire hihiloho fouk fug alereg” isi iyug ebag.