Read Ninia Yali YESAYA 14 Bible Online

YESAYA 14 - Ninia Yali bible

YESAYA 14

¹TUHAN en de nikangge At omaliki Israel on enda hundig eneplug At onggwareg angge on amag ulug momal-enebuhu. Aren de it enebe nikangge enobam indipmu enonggwareg en on etmano fam welamag ulug fesehu mu re ap bohon yatman watlug it ininim seberik waharuk kamuhup.

²Ap homi Israel on etma enobam indip TUHAN en og-esasimu etma nikangge wamag ulug de it enunggul unuk humdoho en let-enebuhup, ne etman de it enunggul unuk etma re it Israel on en enamingming angge on enebuhup. It Israel on en de it ap Israel enap sabu het enepswa enap omano sabu hetdoho feseheg, nit enomamne fam sebel enusug latswa on etmano Israel on en sebeloho fahat enusug laheg, duhup.

³TUHAN en de it Israel enap ouk-bouk heheg, anggin-fanggin heheg, yabuk enomamne hasimeg diek ulug hweag-esaukmu duruk on omane fam en mel fiselaroho fesehu.

⁴TUHAN en airoho duhumu halug Israel enap en raja Babel on horogap duruk kwit diroho uruk kamuhup, “Raja mundoho olok anggolo on anyo wambeheik! Aren nit anggin-fanggin nenobam foruk karuhu fug.

⁵It ap enolok fam enalong wereg lit melal-enepuk on anyo mel,

⁶enasuahal fam ap enunggul unuk sebeloho feseruk on mel, bale fouk fug angge hundig-handig it anggolo ale debeseruk on omano re mundoho horohe feheik.

⁷Ai ambiangma en de o kwenangma abirangge fam etma lombuk deg ma enenda seroho wereg lit ap homi enebe domog en suni uruk kamuhup.

⁸E ibin lak dom Libanon welahep on etma henahayeg diyug o raja ap sebelenepni anyo mundoho wambeheik anggere eke fobik murik lakiek ulug mingming henebuhu fug.

⁹Kwenangma ap waratuk mu omano en raja Babel on anyo enanggilukdoho enebe abirangge en wak waharuk. Mu re it ap waratswa on atam enomamne humdoho kwenangma welatswa on enaheime omamo enoluk atuk ne it ap raja enaheime ohore it melal-enepuk kwit hwerieg wereg ma etman inatuk.

¹⁰Airoho inatlug iren at fam hwiruruk kwit, ‘Ao! ketia hat de nit hag deg lahen homamne wereg fug mu haren eke da fug alereg lahen etma re!

¹¹Atam hat de binggong kecapi fam mot hapuk katswa famen, ketiare hamu kwenangma ap waratuk mu hilmu siagdoho welahen. Hweren kwenang ilonggoma wereg on etma re hat nohorukmu fahet wit aha ma imbalore hat ha selimut aha.’

¹² Raja Babel on ahwi, hat atam de sohwalanggen hubet dilelduk on anyo welatihin, famen de ketia boholman bule mundoho wambik waharihin! Atam haren ap unggul unuk-unggul unuk angge etmano sebeloho feseil lauk katihin famen de, ketiare kwenangma hamboko hwik heausa oma re.

¹³ Hat bohol hopdoho laharuk katihin deg, hat huratuk angge anyo re sohwalanggen amu on emberimmu leho ferihin. Haren boruk kwit il utara fil etma it dewa kabog-durukmu etma an raja unduhuk welatmin berihin.

¹⁴Haren uruk katihin alere, ‘An de hena emberimmu lehoma etlema lahalug de At Mun Leho wereg on hag atmin’ berihin.

¹⁵Famen de dem alere hat anyo re kwenangma ap waratlug laukmu apma ilonggoma etma wambikoho angge fahet uruk katihin.

¹⁶It etma wereg on en hat dim kumu heauk kwit ‘Ap o kwenang elek-felek eseheg, raja melal-enepuk kwit wereg ma etmano enenda nong-hong eseheg, duruk katsi on anyo re su a?

¹⁷Kota-kota luluhun duruk kwit o kwenangma ahamdoho lei meareg ma debeseruk katsi ahun anyore au a? At au en neg ap het deg on sebeloho fahat-enesug on omano henobam lakiek ulug wilip enepuk katsi fug on anyo au a’? ulug hein og-uruk kamuhup.

¹⁸It enunggul unuk domog melal-enepuk katswareg eleg atswa enap raja omano re enobale domog enanggilukdoho sal enebuhup

¹⁹famen de hat fahet hahap saldukmu eke wereg fug, hat de ahanuk kisiloho domag esauk omano hag, hat hahap de ap enebiroho duruk on sehen en enowatuk on omano enahap sal enepuk on omano en filigdoho helep owik elekwe omano hwik heahupmu wareg angge we sobit-sabat esauk hagdoho sobit heahup.

²⁰Haren de honggwareg hobam indip anyo elehapdoho feheg hunggul unuk on honggwareg en enowareheg, duruk katihin ale ai fahet de hat hebe wareg de raja amu on sal enepuk hag sal habuhup fug ai. Ap misig en ulug oho eke hat heyog indip kwe on enolok deg on ai enahap wendaruhu on eke wereg fug.

²¹Di kwe su kwe kota omano fano ap dukwag ulug eke hat homaliki on omano eke in amuhupdeg melal-enepuk kamuhup fug. Sabu het eneplug enowaruhup on anyo ketia horog atuk. Hat homaliki etma re enombawi siag duswa on enenggik ambiangma it waramuhup,” ebag.

²²TUHAN di ale su ale mundoho duk ale neg deg on anyo en ele diroho isi iyug, “An den Babel bin kuruk kwit elehapdoho besehuk mu, misig ulug oho eke An den lili fohup fug. Omalik doron famen ohore misig ulug eke eneluk angge fesehuk fug ulug An TUHAN Allah en nele ihi.

²³Babel ai An den ik loum durukmu omano debehukmu suwe sumu-sumu wereg ma aruhu. Babel an den mun fundoho ololo horebehuk en An TUHAN Allah di ale su ale duk ale neg deg lahi on anyo en ihi,” isi iyug.

²⁴ TUHAN di ale su ale duk ale neg deg on anyo ele matuk kwit, “An den mundoho wene melale ferihik ale aire higitdoho duhuk.

²⁵Ap Asyur on Israel An nanggwenang fam wereg on etma mundoho elehap debesehuk en deg lahi, An nanduk fene duk-duk wereg on etma re al berel enebuhuk en deg lahi. An den an nunggulunuk on ai fam it Asyur on en anggin enobam feseheg, enele omamne fam debeseheg, duruk men enahap wendat enebuhuk.

²⁶Su re an den kwenangma fahet duhuk ale wene melaleg lahi on: An den di unggul unuk su ununggul unuk enobam unggum fesehuk en nenggik leho lit welahi,” isi iyug.

²⁷Ai duhuk ulug aire TUHAN mun omamne humon anyo en wene katukdoho balsi. At enggik en unggum enobam fesehuk ulug leho lit wereg ma ap eke en kwe bale fouk fug alereg.

²⁸ Raja Ahas waratfag on tahun ai fam TUHAN en duhu ale ulug wene unduhuk febag on de su.

²⁹ Henunggul unuk Filistin henap, bayuk hit henowatuk angge anyo re mundoho somborisi. Famen de kisu misig eke waraman de kisu aeg mun olok on eke wam alereg, ne kisu anggen fam en kisu menawe ahwerabul sog duk alereg anggere airoho disi ulug hit henahayeg am fug.

³⁰Hit de siburu obok mun anggolo on henobam aik waheg ne ap hiron en ando welamuhup etma mundoho enowareheg, duhup. Famen de An TUHAN nomaliki on en it mundoho enenggik elegdoho deg on etma re nauk on hwelauk kamuhup, ne ap homi enemu da fug alereg on etma re enakol eleg angge enenda hambukdoho welamuhup.

³¹Yaho hit Filistin henap welahep kwe kota etma re henele hum-ngairuruk kwit oba yag-dauk kamek! Hit mundoho re henakol en henowag elek duruk kamek! Kwenang ahe hena il utara fil en mondotlug lahakeik aire it heneselei on esan lohwaleg waharukmu eneg aleroho deheik; it etma re ik debelug duruk eleg enap.

³²Ap Filistin enap en yonggo angge mon-enebik wahesa on fam de niren onggo keroho hweag-esaul? Niren hweag-esauk kwit de TUHAN en o Sion mundoho witsi ne At omaliki anggin-fanggin hauk on omano re enalong bal-enebuhu ulug hweag-esaul.