Read Ninia Yali YESAYA 15 Bible Online

YESAYA 15 - Ninia Yali bible

YESAYA 15

¹ TUHAN en Moab on fahet hweag-esowag ulug ebag on de su. Kota Ar nim Kir nim de we hup misig fam neg luluhun esahuk, ne o Moab de mundoho ap elegdoho dereng uhu.

²Ap homi Dibon[25] on de kembu dewa apne waukmu etmano oba yarukoho lit dukmu laharuk kamuhup. Ap homi Moab on de enahummu siagdoho kota Nebo mel Medeba mel fahet oba yatuk kamuhup. It fong waroho ulug enegdoho re iren enoruk hweroho feheg, enombanisong hweroho feheg, duruk kamuhup.

³Ap homi koboke kwe lauk on de fong waroho welahe ulug enegdoho re sum karung on wandoho welamuhup; ap homi en de kwenang bumbuk healeg kwe omano en mel, o dum fene[26] omano en mel fong wareheg, oba yareheg duruk kamuhup.

⁴Ap homi Hesybon on mel Eleale on mel de ngai-wai angge durukmu it enele re o Yahas etman hol-hauk kamuhup. It enele en de ap sehen anggen enap famen oho enakol eneg aruhu mu re enowag elek duruk kamuhup.

⁵Ap homi Moab on de o oko kota Zoar mel Eglat-Selisia mel laheg duhup. Foma re oba yatil o Kehulit kwe laharuk kamuhup; foma re anggin-fanggin enobam aik waharuk en de nenek-yobaril o Horonaim lauk kamuhup ale ai fahet An mun nenda esauk kahi!

⁶Ik Nimrim wirig atuk on mel elan kwe enggelangge wilibig on mel de mundoho bug-lelog isimu re enggela oluk on eke wereg fug.

⁷Ap homi en de ik Haarabim doron bal esalug it enengge koloroho hwelalug laul ulug duruk kamuhup.

⁸Di kwe su kwe o Moab nim huli-hulimu etma ap ngairuruk on neg enesanggo holduk kamuhup. Ne, oba yatuk on de o Eglaim mel Beer-Elim mel en holduk kamuhup.

⁹O Dibon fam etma re ik de ap mep nim mangno duhumu re il mep deg laruhu. Allah en de ap homi o etma wereg on fam mun nikaleroho on neg enobam feseik waruhu. Ne, ap enowatuk enap Aren mon-enebik waruhu on etman de Moab enap enoluk wereg on etmano mundoho enowaruhup.