Read Ninia Yali YESAYA 16 Bible Online

YESAYA 16 - Ninia Yali bible

YESAYA 16

¹It unggul unuk Moab enap o kota Sela leimu etman domba omalik eke oko o Yerusalem fam etma along wereg ahun akit enahummu fano angge ulug mondotfag.

²Monde febagdeg de it ap Moab on de Ik Arnon aegma etma onggo nangginoho ik wamulsa ahi boruk kwit nangno hauk kwit suwe a elman wilip atlug longgoruk on en duruk hag lag wag uruk wit nangno hauk katfag.

³Nangno hauk kwit iren unggul unuk Yehuda on hweag-esauk kwit de, “Nit nangginoho duruk kamuhuk ale furoho iek. O nukoho mo ahanhan en kun apma kuruk hag nit hit henapma welamuhuk en fano beyek. Nit de henambol yig-nesa fug, nit de o oko wamuhuk angge re hiren nit heraho nenobahayek.

⁴Nit de ap nenowarukoho duruk on etma fam en nenalong bale nenobahayek. Nit hit henanggwenangma etma hininim welamuhuk en fano welamek ulug hweag-nesakiek”. (Enomamne fam sebele feseruk on ap unggul elehap duruk on mundoho ambiangma aik lahu ne ap homi Israel on wereg ma sebele feseruk kwit wereg on etmano eleg aik lahu.

⁵Fobik en de ap misig eke Daud omba on raja inaruhureg, aren at unggul unuk on de enda hundig fam furoho hwal-enepuk karuhu. At en de dipdoho demdoho ale fahet de folo-folo ale neg duruk karuhu.)

⁶Unggul unuk Yehuda on enele uruk kwit, “Nit de Moab on winik-wonok uruk ale etma mundoho holduhuk. It ai winik-wonog uruk kwit leho fahat-dauk ale aire nit nenoluk deg. Enele uruk on oho re ebe eleg kweleg werahap duruk aire nenoluk deg.” Uruk kamuhup.

⁷Ai fahet de it Moab on etma re oba yag-yag atuk kamag. Iren nauk on unduk fano angge o kota Kir-Hareset fam en nauk katswa on etma ebet halug de oba yag-dauk kamag. It enahummu siag en enenda wat-dauk kwit airoho duruk kamag.

⁸Yabuk o Hesybon horog kwe mel, anggur yabuk o Sibma kwe etmano mel de mun elehap debousa, anggur yabuk wirigmu anggen ebe on dahanlug it enunggul unuk melal-enepuk on nowag ulug og-esaukmu siomo duruk on etmano mundoho elehap debehesa. Endam de anggur yabuk etma re dakdoho re o Yaezer fam etma deg latsi, ne mo lahaik waharuk fil de o leimu etma huli, ne mo obuk uruk fil de Laut Mati foma fil etma huli deg latsi mu famen atsi.

⁹Ketia an de o Yaezer fahet oba yatihik hagdoho ketia re o Sibma fahet oba yatuk kahi. Kwenang famen anggen baleg angge omano ap selei on en mundoho nausa ma, an den o Hesybon mel Eleale mel fahet oba nilue belaboho yatuk kahi.

¹⁰Yabuk mun hesilig welatsi on ai fahet ketia ap misig en ulug oho eke ahayeg wereg fug. Anggur yabukmu ai fahet mot-deheg suni apne weheg duk fug alereg. Ik anggur ahaik hwenanggukwag ulug ap misig en ulug oho eke berelduk fug. An den de iren enaheyeg en duruk on[27] etma bale feyek ulug hweag-esauihin.

¹¹O Moab mel, Kir-Heres mel deg ale eta fahet nil hauk kwit nenda wat-dauk kwit, nenda sig hute duruk kahi.

¹²Ap Moab on de dukmu etma enebiroho lahalug it kabog-durukmu etma di angge su angge folug somban ul ulug duruk famen ambiangma higit atuk fug.

¹³Aire TUHAN en o endam it Moab on fahet hweag-esowag ulug isi on.

¹⁴Ne, ketia TUHAN ele diroho uruk, “Tahun henahan debelug eta fam it Moab enap en enangge wereg on fahet enawonog atuk on etma mundoho eleg aruhu. Ne, ap homi holduk enebe hum alereg on etma re we dorangge neg atlug enomamne eleg on amuhup” ebag.