Read Ninia Yali YESAYA 17 Bible Online

YESAYA 17 - Ninia Yali bible

YESAYA 17

¹ TUHAN ele uruk kwit, “Damsyik aire kota hag eke welaruhu fug, famen ai misig ele o huhul kwelabegma meiyaleg on neg welaruhu.

²O Siria fam kota etma re mundoho embesehup mu anunuroho[28] o welaruhu fug. We di wam su wam wereg ma aruhu mu re ap eke en enebe siloho wilibi fesouk fug alereg laruhu.

³Israel it enalong baloho fahat enusug on eleg aruhu, ne it Damsyik on de wundetdoho wereg ale anyo eleg aruhu. It ap Siria on apuhuno wereg on de ap homi Israel on hagdoho enelitno enepuk kweleg welamuhup. An TUHAN Mun nomamne wereg on en mundoho ihi,” ebag.

⁴TUHAN ele eke uruk kwit, “Fobik Israel on enalong wereg ale ai ahae fotog aruhu, ne it enangge sigdoho wereg ale mundoho eleg aruhu.

⁵Israel on de yabuk Refaim fam gandum mundoho baldukmu, we apuhuno dorangge neg wereg etano hag amuhup.

⁶E zaitun anggen mundoho dahanlug e enggik onggombi kwe atuk etano hagdoho it Israel on ai amuhup mu, dorangge neg enahap wendaramuhup. An TUHAN Allah Israel enakni anyo on en nele mundoho ihi,” ebag.

⁷Eta li em de ap homi sombandoho watlug wal-debag Allah amu eneg on Israel enakni fam let-nenebin ulug heng duruk kamuhup.

⁸Iren enenggik fam duruk on omano ambiangma angge fahet eke ebereg lamuhup fug. Iren duruk angge etma ebere amben angge yalduk mu obale mezbah omano mel kembu Dewi Asyera ahut ilit deg angge omano mel fam ebereg lamuhup.

⁹Ai salim kota Israel enobam omamne humon wirig omano dalo heg wamburuk kwit, o huhul kwelabegma aruhu, kota ap Hewi mel Amori[29] mel en it ap Israel on enakolen folug wilipswa ma hag deg laruhu.

¹⁰Israel ao, haren Allah hahap wendat hapuk on helep dom mun wirikdoho wereg on hag anyo embeserihin deg ahamdoho re yabuk kembu dewa enobahet[30] wiroho yatuk kahen.

¹¹Famen de, yabuk etma fam haren yatuk kahen angge omano bekit ahanuk lahakeg, owil yihikeg duruk famen de, anggen fano yihiku fug. Wereg laruhu anggere we anggolo ouk enepuk on mel eleg am fug angge ai mel neg welaruhu.

¹²Enenggul unuk angge enomamne deg lit wereg enap omano enele sahalduk; it enele anggunggare ik laut funalduk kwit dung duruk hag nik aleroho duruk.

¹³It waharuk kwit de ik fu waharuk kwit fulumno dil waharuk hag duruk. Famen Allah en it fahet henowarikoho lahi uruk en it enemu en heye yatma lahup. It mug eneplug lahup alere hol en asinahap alduk kwe furoho lauk hag, ite kwenang ahe hol sielu en fu haukmu hag, lahup.

¹⁴Nukoho mun hup atuk kweleg it enekol humon on waharuk karuhu famen o sekan duruk halug enakol anyo eleg aheg duruk kamuhup. Aire ap abirangge en nit nenangge del-dauk on en hahup alere airoho hahup eta.