Read Ninia Yali YESAYA 18 Bible Online

YESAYA 18 - Ninia Yali bible

YESAYA 18

¹ Ik o Sudan dahaloho foma fil etma o kwenang misig eke fam en hweren ele ngu durukmu holduk.

²Kwenang ai famen ap o bumbuk misig unuk fam wene uruk enap omano Ik Nil emberim kwe perahu werema owag hag angge fam waharuk. Yaho hit ap yonggo angge wahep on ik etma fene henobam indipmu nikangge lalug, hit henunggul unuk on enebe enomamne deg lit enalong deg enap, enebe oho enowag yat enap, enahap sakoreg enap o kwenangma suman enakol enepuk etma fahet wene walug lakiek.

³Hit kwenangma suma abirangge welahep on yei! Bendera wiog dil dom-dom kwe etma duruk on furebeyek! Iren trompet ele fururuk on etma henesanggo holiek!

⁴TUHAN ele an nobam uru kwit, “Lil o hup ahanhan on fam di angge su angge anggen balduk li em lildukmu bik-bog wereg hag, ne o nukoho angge mo il ombagbag ebe on duruk anyo hag, An wereg lahimu etleman apma fil oma norohole healoho belap hauk karuhuk.

⁵Anggur anggen owag fam wirik am fug li, ne anggen dahanduk li horog aik waharuk eleg kweleg, owil ebe fam en loloho wambuk eleg kweleg, fili en anggur owag seleng duruk eta hag, it selei on en Sudan luluhun esahup.

⁶Ap sehen seneg enap enebe wareg etma re embesehupmu o hobi li suwe wareg filik nauk on mel ne sanim deg li maro on en wareg filik nauk on mel fahet nowag ulug embesehup,” isi iyug.

⁷Nukoho andigim aik waruhu mu salim ai it enunggul unuk enomamne deg lit enalong wereg on, enowag yatdeg lit enahap sakoreg on, o kwenangma on enakol enepuk on etman de it enanggwenang fam en ik etma dahal halug de enakni TUHAN di ale su ale mundoho duk ale neg deg on anyo obahet folug og-utuk kamuhup. Iren de Duk Sion fam At TUHAN Mun Along on anyo apne waukmu etma waharuk kamuhup.