Read Ninia Yali YESAYA 2 Bible Online

YESAYA 2 - Ninia Yali bible

YESAYA 2

¹At Allah en ap homi Yehuda on mel Yerusalem on mel fahet hun Amos amloho Yesaya anyo en hweag-esowag ulug ebag on de su:

²Li fobik welamuhuk on eta fam de, duk o TUHAN Obam wirigmu aire eke sebeleg kweleg eke leho hag de mun leko unduhukmu, ap homi di unggul unuk su unggul unuk de uluk-uluk etma waharuk kamuhup.

³Airoho waharuk kwit iren de, “Nit de ap homi Israel on enakni TUHAN Allah obam wirigmu, lahaukohon. At TUHAN Andom[3] ebe Sion fam kota Yerusalem wereg lit, ele uruk, ai en de aren nit komo-nenepukmu niren at ele holoho duruk on mamul-nenebukwagdoho re lahaukohon” uruk kamuhup.

⁴ Aren airoho mamul-enepuk kwit ap homi enunggul unuk domog enawene ayo wiroho biling-enebeheg, ap homi ai on enawene enobam wereg ma bilinggoho elehap deheg, duruk karuhu. Airoho durukmu re karog weim yapuk on de yabuk keam hilinggeheg, ne fit bosimanggen on de enggelangge balduk angge hilinggeheg, duhup. Ap homi enunggul unuk domog en de weim apul en ulug salik lalug dog sinalik laheg, weim apul en ulug fik-fouk deheg, duruk kamuhup fug.

⁵Yaho hit ap homi Yakub ambiangman ondoho lahep on suma, nit de nenakni TUHAN aseleg fam lauk kamul en manik!

⁶Nenakni Allah o kwenang su fam de ap homi en it timur fil wereg enap en mel o Filistin[4] on en mel en eneg ale fam duruk ale omano hag deheg, ne iren ap bohon etma eneitogdoho endam et duruk ale etmano enahut wal-heheg deheg, duruk ai fam haren homaliki at Yakub ambiangman ondoho on etmano fotog-esauihin.

⁷It enobam etma re perak mel emas mel sahareg ma re enangge di angge su angge re wenahauk fug aleroho deg. Enangge kuda re mun hum-hamdoho deg ma enangge kereta oho re wenahauk fug aleroho deg.

⁸Di kwe su kwe re kembu wereg ma re iren ahut ilit debelug apne wauk.

⁹Ap homi enebe domog de enal belesim wat-esalug wendal esahup. Anggere TUHAN nakni, haren it enesiag hapelehapdoho fesouk fug!

¹⁰ Iren de TUHAN olok fam en nim ne at omamne mun ebe on fam en nim lil amul ulug de helep owik duk deg on en owikmu kweheg, kwenangma koru ele habuloho kweheg, duhup.

¹¹Ap winik-wonog uruk on de sebele fesehup, ne ap enonggwareg en leho fahat-dauk on de belabe fesehup. Ne, we TUHAN amu neg de leho foruk kamuhup.

¹²Nukoho ai salim de TUHAN Mun Omamne wereg on anyo en de ap enonggwareg en leho fahat-dauk on sebele feseheg, ap homi winik-wonog uruk on mel, enawonog atuk on mel de unggum og-eseheg, duhu.

¹³O Libanon fam e lak yatdoho wilibig on etma mel, ne o Basan fam e abirangge wilibig on etma mel de mundoho elehap debehu.

¹⁴Dom-dom mel duk-duk mel yit-yatdoho wolongdoho lahabeg on de kunukdoho doale feil lahu.

¹⁵Ap kahaleg wereg ma helep wiroho lahabeg on mel, o hembit angge helep huhulowag oho on mel de moluluk esahu.

¹⁶Kapal ebe hum-ham on mel, ne buhun-bahandoho wirig on mel de ik ahummu obuk esahu.

¹⁷Ap leho fahat-dauk on de sebele feseheg, ap enawonog atuk on de belabe feseheg, duhu. Mu re we TUHAN amu neg leho welaruhu.

¹⁸Di kembu su kembu etma re mundoho eleg aruhu.

¹⁹Nukoho TUHAN ebe inatlug kwenang elek-felek esahu salim de ap homi helep owik duk deg on elman kuhup on mel, TUHAN olok fam en nim ne At along mun ebe on fam en nim lil amul ulug kwenang koru elma kuhup on mel de lil amuhup fug. Nukoho ai aik waruhu salim de kembu perak on mel emas on mel iren wit-dalug apne wauk on etma re hesama lin-esahupmu bak mel kwindik mel nohoik kuruk kamuhup.

²²Anggere ap homi enebe eleg amuhup on etma re iren di ale su ale eke duk fug alereg ma re it enobam henenda dip debelug welam fug.