Read Ninia Yali YESAYA 21 Bible Online

YESAYA 21 - Ninia Yali bible

YESAYA 21

¹TUHAN en Babel on fam debehu ale fahet hweag-esowag ulug ebag on de su: Hol sielu iliangge lei kwe en aplohok firik waharuk hag, o kwenang nik alereg fil etman anggin on henobam aik waruhu.

²An na og-hauk hagdoho fam hauk men de anggin hauk ale mel, hwenaroho duruk ale mel, elehap enepuk ale mel hauihik. Uruk kwit de hit Elam on esan lohwaleg bin kwik lakiek! Yaho hit Madai on esan lohwaleg walinggik lakiek! It Babel enap anggin-fanggin deberuk on anyo re ketia Allah en mundoho ambiangma debeikohoreg.

³Airoho urukmu hauihikdeg de an nil hauihik on anyo en nape kwe nong-hong urukmu re nil ha fug ale nesanggo holuk fug ale napuk katsi. An den nakol neg atihikdeg ouk de homi enomalik enderukoho ouk en nenek duruk etano hag hauihik.

⁴Nendama lebe-lebe uruk kwit fatorurukmu re nebe hambuk ha fug ale napuk katsi. Hup aik wamag ulug nangno hauk on anyo re we hambuk ha fug ale neg enam atuk katsi.

⁵An den eke hauk men de pesta perjamuan nakoho re ap bohon huratuk mu fahet fouk deg wereg ma hauihik; Iren de enahaik mel enasiburu mel nenggeg duruk kwit weregman fetagdoho etano wene melaleg eke uruk kwit, “Yaho hit ap dog yapuk on enowesi! Hiren dog bei angge etmano fik-fouk diek!” uruk katsi.

⁶Ai en TUHAN en an nobam uruk kwit, “Ap misig eke kahaleg welamag ulug feik lalug de aren hamisi ale etma diroho deg ulug hweag-nirik wamagdoho lakin.

⁷Aren hauk men lahe ap kuda fam lahalug dog yapuk enap biren heheg mel, ne it esan foma no keledai mel unta mel fam lahalug waharuk halug de aren fik-furoho il kumu esowag,” ulug hweag-nitsi.

⁸Ai en at kahaleg wereg[31] on anyo ele hwiruruk kwit, “Nakni an de nukoho hundig-hundig nukoho nim hup anggo nim kahaleg welahi” ulug isi.

⁹ Furin it ap esan kuda fam lahalug lauk on enebe biren heheg waharuk ai! Ai en ap kahaleg wereg on anyo en wene walug waharuk kwit, “Babel de mundoho sebel aik wambeheik! Iren kembu ahut ilitdeg mot-duruk angge omano re irik-erapdoho kwenang kwe deg-bogdeg” ulug uruk katsi.

¹⁰An nunggul unuk Israel on! Hat de gandum anggen al berelduk hagdoho sobit-sabat heauk kwit windik-wendal heausa. Ketiare hat hobahet wene ebe on At TUHAN ap homi Israel on enakni Allah di ale su ale mundoho duk ale neg deg on anyo urukmu holdihik on hweag-hutuk kahi.

¹¹Edom aruhu ale fahet hweag-esowag ulug ebag on de su. Ap eke o Edom en an nobam ele hweag-nutuk kwit, “Hat kahaleg welahen on ao, hup sure anunureg a? Hubet sekan duk fug kweleg de jam nunggwe en welatmisi?” ulug uruk katsi.

¹²Mu an den onggo uruk kwit, “Hubet de sekan dimisi famen de hup oho waikohoreg. Ne, hein og-neamihin halug de watlug hein og-nea ma” ulug hweag-itihik.

¹³Arab aruhu ale fahet hweag-esowag ulug ebag on de su: Yaho hit Dedan henap, hiren on ap onggo balukoho yatma lauk enap omano re somun anggema o Arab kwenang fam etmano nohoruk.

¹⁴Yaho hit o Tema kwenang fam ap homi welahep on! Ap ik obok en henekit waharuk on etma ik og-esakiek, ne ap o oko ekema lauk on etma re enesiburu nowag ulug og-esakiek.

¹⁵It aire karog aeg fang degman, sehen dog enggela fam kwelabegman ne dog oroholanggen siagdoho yapuk men waharuk anggere.

¹⁶Ai en TUHAN en an nobam uruk kwit, “Tahun misig higit atuk kweleg etare Kedar along wereg on aire mundoho ambiangma aruhu.

¹⁷Ap Kedar enap en sehen bising duruk enap etma re mun yin-hun deg enap. Famen de it famen we dorangge neg lil amuhup. Ulug ap homi Israel on enakni An TUHAN Allah en nele mundoho ihi” ulug hweag-nitsi.