Read Ninia Yali YESAYA 22 Bible Online

YESAYA 22 - Ninia Yali bible

YESAYA 22

¹O Lembah Penglihatan fahet hweag-esowag ulug ebag on de su: Yaho, hit ap homi Yerusalem welahep on nunggwe ulug hit henobam o dummu[32] laharuk kahep?

²It kota etman soni-soni angge esetuk kwit enahayegdoho nauk kwit duruk on ai duk fug ale famen duruk. Ap henobahet enebiroho duruk on omano oho weim fam waratswa aire aben dog fam enowatswa fug kweleg duruk kahep.

³Ap sehen seneg on enowesi panglima hiren on omano re owan enandog leg ha fug angge en heiye lausa ma ap en het enepswa. Ne, hiron en ap enomamne on ohore yatma aik lausa famen de het enebuhup neg.

⁴An fu nobaharuk eleg an de ap nunggul unuk on en waratswa on etma enobahet oba yatuk katmin en embeseyek, an hiren onggon napul ulug duk fug.

⁵Demdoho TUHAN Mun Leho on Di ale su ale duk ale neg deg on anyo en de nukoho su fam o Lembah Penglihatan etman nong-hong eheg, youk deheg, ap enele saha-faha eheg dukwag ulug momale fesi salim. O kota fak lehet omano mundoho moluluk disi, ne ap en let-nenebik manik ulug hwiruruk on de duk-duk kwe omano en anggungga holduk.

⁶Ap Siria on de kuda mel kereta dog yapuk on mel walug waharuk, ap Elam on de sehen minggin dog walug waharuk, ap Kir on de dog bei angge fik fouk debehup.

⁷Yehuda on en kwenang donggo hesilig fano kwe etma kereta dog yapuk on neg hopo dik uhu. Ap kuda fam lahalug dog yapuk on de o Yerusalem sokole kuruk kwe etma fang deg lit welamuhup.

⁸Ai salim Yehuda on nenalong baleg angge ulug deg on anyo re mun luluhun duhu. Ai salim dog angge forukmu omano sehen dog wereg ulug kumu hahup.

⁹Hiren hauk men de fak kota Yerusalem wirig on anyo humdoho langguk deg ma, buhunduk ale neg deg laruhu. Hiren o Yerusalem wirig omano olowatuk mu re foma humdoho meiyalegma buhunduk ale humdeg laruhu, helep etman oko fak lehet buhun-duhup. Ik sene yenggeldul ulug de,

¹¹hiren ik sene kota ilonggoma buhun-debelug, ik sene endamon fam yenggeluhup. Famen hit de Allah en wene endam ai duhuk ulug melaloho fesi anyo furebehup fug, ne aure amag ulug san debesi ulug furebehup fug.

¹²Ai salim de TUHAN Mun leho wereg on TUHAN di ale su ale duk ale neg deg on anyo en hit oba yatuk kwit fong waroho, henoruk hohoboroho baleheg, belahwi sum wan-deheg diek ulug hweag-hesahu.

¹³ Famen ahamdoho re hit henahayeg-henahayeg ale soni esetuk kamuhup. Hiren henowam kambing, domba ware folug ino nauk nenggeg, anggur ahaik nenggeg, duruk kwit, “Nit sono waramuhuk anggere, nenesiburu nenggeg nenahaik nenggeg duruk kamukohon!” ulug hwiruruk kamuhup.

¹⁴TUHAN Mun Leho on nim, Di ale su ale duk ale neg deg on en an nil hanim enam atsireg ele diroho isi, “Demdoho siag iren duruk on aire An den napelehapdoho fouk eleg angge weregman neg it enebe waramuhup. Ulug de An TUHAN en nele mundoho ihi” ulug hweag-nitsi.

¹⁵TUHAN Mun Leho wereg lit Di ale su ale duk ale neg deg on en an mingming napuk kwit, hun Sebna raja obam olma istana fahet kepala wereg on anyo akit lalug, TUHAN en diroho hweag-umuk eheik ulug hweag-irik lowag mingming napsi.

¹⁶“Honggwareg en boruk kwit hat sure sa boruk kahen? Haren indip ke fam honggwareg sal hapukmu fahet helep elma etma foruruk kahen?

¹⁷Habe hebeloho welamin An den de mun yat-batma hwik habuhuk. An den hat hebe helmag healug hi hulilip heyalug bohola imbilduk hagdoho o sili humon bumbuk elekwe imbil-ambal heahuk. Airoho habuhukmu re hangge kereta fahet hawonog atuk kahen on eta enaluluk wararuhun. Haren de hakni eyog indip kwe enenuk siahap deberihin mu etma wararuhun.

¹⁹Haren airoho dirihin ai fam de hat An den heyabuk elehapdoho feheg, pangkat leho on anyo famen belabe hobahakeg duhuk.

²⁰Ai salim An den namingming angge Elyakim hun Hilkia amloho anyo wol duhuk.

²¹Sum hat halong wereg lit fahet wan-duruk kahen on mel, bahaluk mel etma An den at wan-debehuk. Di angge su angge hat akni deg lahen angge omano at neg og-uruhuk. At de ap homi Yerusalem on mel Yehuda on mel fahet enakni welaruhu.

²² At de Raja Daud omba on apma wereg lit along humon welaruhu. Aren kerajaan ai along wereg ma fahet ki anggen at foroho laruhu. Aren husuruk halug eke en latuk kamuhup fug, aren latuk halug ap eke en husuruk kamuhup fug.

²³Ap sabu seneg angge fak lehet fam omamneroho lilduk hag At eyabuk omamne hambuk lele wareg on og-uruhuk. At fene en de ahain elekwe on abirangge motdeg welamuhup.

²⁴Famen de ahain elekwe on mel owesi autsi mel fahet de at onggwareg en let enesauk karuhu. Suknuruk angge fam waruk belanga suknig hag, it etma re at fam enenda belabeg lamuhup.

²⁵Ai aruhu halug de sabu seneg angge omamneroho het deg on aire dahandoho wambuhu. Aire at ahain elekwe on mel ori erekwi mel eleg aik lahup ale fahet mundoho re airoho duhu. An TUHAN en nele mundoho ihi” isi iyug ebag.