Read Ninia Yali YESAYA 23 Bible Online

YESAYA 23 - Ninia Yali bible

YESAYA 23

¹ O Tirus fahet hweag-esakiyug ulug ebag on de su. Yaho hit ap Spanyol henap ik laut fene lahaik-wambuk noruk kahep on etma oba yatuk kamek. Hit o Siprus en henobam waharuk men hweag-hesauk kwit, kota Tirus anyo re mundoho luluhun aha, ne hit henobam mel hiren kapal feik waharuk kahepma mel de moluluk neg deheik.

²Yaho hit ap homi ik elan kwe welahep on mel, di angge su angge onggo balik lauk kahep on mel en de heneitogdoho ap homi hiron o Mesir ik laut foma fil etma lalug gandum onggo baleheg, hundureheg, ne unggul unuk amu on abirangge fam onggo bal-bal aheg, duruk kahep on etmano re nunggwe fahet aha ulug henele iek.

⁴Hat kota Sidon yei, halong wereg anyo mundoho eleg aha! Ik laut yahamag de on anyo en hat hobahet halong bouk fug alereg boruk kwit diroho uruk, “An de nomalik endetuk kahi fug on, nomaliki ap oho hwelani oho endetuk kahi fug” uruk.

⁵Tirus mundoho elehap debeheik uruk on hol hahup deg ap Mesir on oho re youk lahupdeg enowag elek duhup.

⁶Hit ap homi ik elan kwe welahep on etma oba yatuk kwit henahap wendaroho o oko Spanyol lakiek.

⁷Hakiek heneng kota Tirus endamet welatfag on anyo. Kota ahayeg-ahayeg ale duruk on anyore au a? Kota ap ik laut dahaloho foma fil etma lowag ulug, mon-enepuk on anyore ai a?

⁸Sumenggan onggo hundutil noruk on de ap dungon enomaliki neg o kwenangma mun leho enap fug no a? Tirus kota mun omamne humon wereg obam aure san elehap debehuk ulug wene melalsi?

⁹TUHAN Mun Along on anyo en neg wene ai debehuk ulug wene katukdoho melale fesi. Aren neg it en enenggik angge hwelauk fam mun enawonog atuk on mel, ap homi o kwenangma abirangge mun leho on omano mel, sebeloho feseruk ale ai ahae fotog ai huli elehap debesehuk besi.

¹⁰Ap kapal fam duruk alere mun eleg ahesa anggere, hit ap homi Spanyol welahep on su heneyabukmu wit da lakiek.[33]

¹¹TUHAN enggik laut fam bil hasireg, kerajaan omano mun hululipdoho enggikmu wasi. Aren fak lehet o Funisia wirig angge omano meiyaloho hwik duk kwag ulug wene mundoho melal-enepsi.

¹²TUHAN ele uruk kwit, “Kota Sidon yei! Hat eke nim hahayeg-hahayeg ale duruk karuhun fug. Ap homi re mun sebeloho fesehup. It muko o Siprus oko lahupmu famen oho re fano lioloho welamuhup fug” ulug isi. (

¹³It unggul unuk Asyur on en de fug famen de, it kota Banel on en kota Tirus elehapdoho fousareg, mene olok on etma it eneluk deg lit wereg. Iren ap lahalug fu enepukmu fahet maseroho wutswa famen oho, kota ai fak lehet wirig on omano meiyaloho belabe foluk, kota ai huhulmu welomag ulug debehup.)[34]

¹⁴Henobam kota hiren henenda obam hembisig welahep on anyo mun siahap atsi anggere, hit laut fam duruk kahep on etma oba yatuk kamek.

¹⁵Li andigim aik waruhu salim de Tirus ai tahun tujuh puluh tahun fam ap raja umur wereg ale hagdoho enapeleg amuhupdeg welamuhup. Li ai mundoho aruhu mu Tirus de hwe onggo fahet hambena duruk on hag suni su fam en uruk kwit:

¹⁶Hambena hwe su re, embeseswa hwe su re, hat ebet heowagdoho, hat wenggel heowagdoho hasuni wilip-wilip, kecapi watil-watil, uruk ale higitdoho.

¹⁷Tujuh puluh tahun ai mundoho debelug neg de, TUHAN en fobik Tirus fahet ebet hahureg Aren yabuk atam duruk katswa hag duruk kamag bohu. Aren de o kwenangma kerajaan wereg on abirangge nim onggo baleheg, hundureheg, duruk karuhu.

¹⁸At ambiangma hwelauk on mel, along atuk mu hwelauk on mel de foukdoho fahat-dauk karuhu fug, famen TUHAN fahet neg foruk karuhu. Ap homi TUHAN apne wauk on en de uang ai fam enesiburu enobam onggo hundutuk kamuhup.