Read Ninia Yali YESAYA 24 Bible Online

YESAYA 24 - Ninia Yali bible

YESAYA 24

¹TUHAN en kwenang unggum og-uruhumu re ap homi di angge su angge elegdoho lei mea aruhu. Aren kwenang enden esauk kwit hahureg ap homi buhuloho yeg-bog esahu.

²Ap homi abirangge en abut higit ale neg hahup: It imam mel, ap homi we on mel, onggo fam hun enepuk on mel, enaknisi on mel, enangge we elamna wauk on mel elamna heng enepuk on mel, dungon mel kungu on mel, higit misig ale aruhu.

³Kwenang erap ferapdoho lilipuk lalabag esahu, TUHAN amu en isi anggere, wene ai demdoho dip aruhu.

⁴Kwenang de iring atlug halo aruhu kwenangma ilowag-malowag aruhu. Bohol oho higitdoho iliowag-malowag aruhu.

⁵Ap homi en Allah ele melaleg sahalduk ai fam, ne iren At TUHAN nim wene sali li mundoho-mundoho fahet watswa on anyo dahandoho duruk ai fam ai en iren wene melaleg wereg on anyo aham duruk ai fam de, kwenang fam amben siag on saha-faha uhu.

⁶Iren duruk ale ai fahet de TUHAN en kwenangma hururung deberuk kwit, ap homi unggum og-esahu. It mundoho luluhun enepuk kwit dorangge neg enahap wendaruhu.

⁷Anggur indip liplip deg ma anggen dahan da fug alereg laruhu. Ap atam enahayeg welatswa famen ketia enenda hesilig welamuhup.

⁸Binggong kecapi ele ngururuk on oho rebana ele kong-duruk on oho holeg eleg angge welamuhup. Ap homi esan lohwalug noruk kwit enanggiluk duruk on etmano mun eleg aruhu.

⁹Anggur ahaik suni uruk ale fahet nauk on eke nauk kamuhup fug, ahalue unduk eberoho fahet nauk on eke welaruhu fug.

¹⁰Kota abirangge siahap aheg, ne ap olma wereg on mundoho enakol neg aruhu mu enobam sok mundoho lat dalug mu neg deg laheg, deg laruhu.

¹¹Anggur ahaik eleg atuk mu re ap en kwebene etma enele ngaril noruk kamuhup. O kwenang ai fam hundig-hundig etma enahayeg on mundoho eleg laruhu.

¹²Kota ai ilonggoma mun siahapdoho sel kwel uhu sokole kuruk kwe omano mundoho meiyal heg wambuhu reg siag aruhu.

¹³Aire o kwenangma abirangge unggul unuk mundoho fam aruhu ale. Aire e zaitun anggen fotogdoho dahanduk li, ne anggur anggen onggobimu on dahanduk li em atuk hag ite anggen yihig mundoho balduk li em atuk hag aruhu.

¹⁴Ap homi eneluk enahap wendat amuhup on etmano en enahayeg en suni uruk kamuhup. Ap homi il barat fil on en TUHAN along wereg ale anyo fahet fag-duruk kamuhup,

¹⁵ap homi timur fil wereg on en de at neg mot-duruk kamuhup. Ne, ap homi ik elan kwe wereg on etman de ap homi Israel on enakni TUHAN Allah ai unuk along bolug leho foruk kamuhup.

¹⁶Kwenang ambiang-ambiang etman suni Israel on enesugun fanoroho duruk ulug motdeg suni uruk kamuhup. Famen an de namelmel en i! Ap hwenaroho duruk on de hwenaroho duruk kwit neg wereg, iren ekenim hwenaroho duruk kwit wereg!

¹⁷Hit kwenangma welahep on abirangge holiek o! Luhut henebuhu on mel yepdoho helmag henebuhu on nim ap homi enowag elek duhup on nim en hit nangno henepuk kwit wereg.

¹⁸Ap enowag elek duruk kwit heye lauk on de sapna fam al berel atuk kamuhup, ne ap sapna famen lil atuk on de sabu yep deg ma luhut atuk kamuhup. Osit omamne on de bohol fam en belabik waruhu ne kwenang oboule re lang-fang uhu.

¹⁹Kwenang kuroho-karoho, luluhun-lalahandoho lahabuhureg elek-felek esahu.

²⁰Kwenang abung-abang deg angge anyo re ap ik nalug siomo duruk kwit dal-dal angge duruk hag deheg, ne o sabo salegma hol sielu waharuk kwit lang-fang duruk hag deheg, duhu. Kwenang aure ap homi enesiag anggin en sunuk duhu. At mundoho luluhun duhumu re nikangge inam fug ale aruhu.

²¹Ai salim de TUHAN en de at koloma along wereg on mel kwenangma raja nim, unggum og-esahu.

²²It ai kabogdoho misigmu hele waroho owik elma kwelabe feseruk hag, heleg wareg feselug kwelabe feserukmu etma weregman neg de unggum og-esahu li anyo horog aik waruhu.

²³TUHAN Mun Along on anyo raja atlug melal-enepuk kwit wereg ma bigalem de il mum aheg, mo seleg duk eleg angge welaheg deg laruhu. Aren de Duk Sion emberim fam etman Yerusalem on melal-enepukmu At omaliki melal-enepuk on etmano fam de At along wereg ale anyo ename foruk karuhu.